ലോക്ക്ഡൗണിനെത്തുടര്‍ന്ന് അന്യദേശത്തു നിന്നും വീട്ടിലെത്താന്‍ ആളുകള്‍ പല തന്ത്രങ്ങളാണ് പയറ്റുന്നത്. കാട്ടിലെ ഊടുവഴികളിലൂടെയും മറ്റും സ്വന്തം നാട്ടിലേക്ക് കടക്കാന്‍ ശ്രമിക്കുന്നവര്‍ മുതല്‍ വലിയ നദികള്‍ നീന്തിക്കടക്കുന്നവര്‍ വരെ ഇക്കൂട്ടത്തിലുണ്ട്.

എന്നാല്‍ ലോക്ക് ഡൗണിനെത്തുടര്‍ന്ന് വീട്ടിലെത്താന്‍ അലഹബാദ് സ്വദേശിയായ പ്രേം മൂര്‍ത്തി പാണ്ഡെ എന്ന യുവാവ് സ്വീകരിച്ച വഴി ഏവരെയും കടത്തിവെട്ടും. അന്ധേരി ഈസ്റ്റിലെ ആസാദ് നഗറില്‍ നിന്ന് വീട്ടിലെത്താന്‍ ഇയാള്‍ സ്വീകരിച്ച മാര്‍ഗം ഏവരുടെയും കണ്ണു തള്ളിച്ചിരിക്കുകയാണ്.

സവാള വില്‍പ്പനക്കാരനായാണ് ഇയാള്‍ നാടുകടന്നത്. മുംബൈ വിമാനത്താവളത്തിലെ ജോലിക്കാരനാണ് ഇയാള്‍. മെയ് മൂന്നുവരെ ലോക്ക്ഡൗണ്‍ നീട്ടിയതോടെ ഇനിയും ലോക്ക്ഡൗണ്‍ നീട്ടിയേക്കുമെന്ന ഭയത്തിലാണ് നാട്ടിലെത്താന്‍ ശ്രമം തുടങ്ങിയത്.

ലോക്ക് ഡൗണ്‍ ആണെങ്കിലും പച്ചക്കറികള്‍ ഉള്‍പ്പെടെയുള്ള അവശ്യസാധനങ്ങളുടെ ചരക്ക് നീക്കത്തിന് ഇളവുകളുണ്ടെന്നറിഞ്ഞ ഇയാള്‍ ഏപ്രില്‍ 17ന് ഒരു മിനി ട്രക്ക് വാടകയ്ക്ക് വിളിച്ച്‌ നാസിക്കില്‍ ചെന്ന് 10,000 രൂപയ്ക്ക് തണ്ണിമത്തന്‍ കയറ്റി മുംബൈയിലെത്തിച്ചു. നാസിക്കിലെ പിംപല്‍ഗാവ് മാര്‍ക്കറ്റില്‍ നിന്നാണ് പ്രേം മൂര്‍ത്തി തണ്ണിമത്തന്‍ വാങ്ങിയത്.

ഇവിടെ സവാള കുറഞ്ഞ വിലയ്ക്ക് ലഭിക്കുമെന്ന് മനസിലാക്കിയ ഇയാള്‍ 2.32 ലക്ഷം രൂപമുടക്കി 25,520 കിലോ സവാള വാങ്ങി. തുടര്‍ന്ന് ഒരു ട്രക്ക് വാടകയ്ക്ക് വിളിച്ച്‌ അതില്‍ സവാളയുമായി 12,000 കിലോമീറ്റര്‍ അകലെയുള്ള അലഹാബാദിലേക്ക് യാത്ര തിരിക്കുകയും ചെയ്തു.

ഏപ്രില്‍ 23 ന് ഇയാള്‍ മുന്ദേര മാര്‍ക്കറ്റിലെത്തിയെങ്കിലും സവാള വില്‍ക്കാന്‍ കഴിഞ്ഞില്ല. തുടര്‍ന്ന് സവാളയുമായി തൊട്ടടുത്തുള്ള തന്റെ ഗ്രാമമായ കോട്വ മുബാറക്പുരിലെത്തി അവിടെ സവാള ഇറക്കി വാഹനം തിരികെ അയച്ചു.

എന്നാല്‍, കൊറോണ വ്യാപകമായ മഹാരാഷ്ട്രയില്‍ നിന്ന് ലോക്ക്ഡൗണ്‍ ലംഘിച്ച്‌ ഒരാള്‍ എത്തിയതറിഞ്ഞ് പോലീസ് സ്ഥലത്തെത്തുകയും ഇയാള്‍ക്കെതിരെ കേസ് ചാര്‍ജ് ചെയ്യുകയും ചെയ്തു. തുടര്‍ന്ന് ആരോഗ്യ പ്രവര്‍ത്തകര്‍ ഇയാളെ പരിശോധിച്ചു.

ഇപ്പോള്‍ വീട്ടില്‍ സ്വയം നിരീക്ഷണത്തില്‍ കഴിയുകയാണ് യുവാവ്. എന്തായാലും ഒടുക്കത്തെ ബുദ്ധിയാണ് ഇയാള്‍ക്കെന്നാണ് സംഭവമറിഞ്ഞവരെല്ലാം ഒരേപോലെ പറയുന്നത്.