അദ്വാനി ഒറ്റപ്പെടുന്നു, ഒറ്റക്കെട്ടായെടുത്ത തീരുമാനം അദ്വാനിയെ കരുതി മാറ്റണ്ടെന്ന്‌ ബിജെപിയും ആര്‍എസ്‌എസും, വിവാദങ്ങളില്‍ നിന്നും മാറി മോഡി
ഏറ്റവും പ്രതാപിയായ ബിജെപി നേതാവ്‌ എല്‍കെ അദ്വാനി പാര്‍ട്ടിയില്‍ ഒറ്റപ്പെടുന്നതിന്റെ സൂചനകളായിരുന്നു പാര്‍ട്ടി സ്ഥാനങ്ങളില്‍ നിന്നുള്ള അദ്ദേഹത്തിന്റെ രാജി. എന്നാല്‍ അദ്വാനിയുടെ പുറകെ പോണ്ട എന്ന നിലപാടിലേക്ക്‌ ബിജെപിയും ആര്‍എസ്‌എസും പോകുകയാണ്‌. ഒരു വ്യക്തിയെ മാത്രം കണക്കിലെടുത്ത്‌ പൊതുവായെടുത്ത തീരുമാനങ്ങള്‍ മാറ്റണ്ടെന്നാണ്‌ ആര്‍എസ്‌എസിന്റേയും നിലപാട്‌.
ഇതിനിടയ്‌ക്ക്‌ രാജിയില്‍ നിന്നും അദ്വാനിയെ പിന്മാറ്റാനുള്ള ശ്രമങ്ങളും നടക്കുന്നുണ്ട്‌. എന്നാല്‍ അദ്വാനിയെ തീരുമാനത്തില്‍ നിന്നും മാറ്റാന്‍ സാധിച്ചില്ലെങ്കില്‍ അദ്ദേഹത്തെ അദ്ദേഹത്തിന്റെ വഴിക്ക്‌ വിടാനാണ്‌ ബിജെപിയുടെ തീരുമാനം.
അതേസമയം മുതിര്‍ന്ന ബിജെപി നേതാവ്‌ എല്‍കെ അദ്വാനി പാര്‍ട്ടി പദവികള്‍ രാജിവച്ചതിന്‌ പിന്നില്‍ ആര്‍എസ്‌എസിന്റെ സമ്മര്‍ദ്ദമില്ലെന്ന്‌ ബിജെപി അധ്യക്ഷന്‍ രാജ്‌നാഥ്‌ സിംഗ്‌ പറഞ്ഞു. ഇത്തരത്തില്‍ വരുന്ന വാര്‍ത്തകള്‍ അടിസ്ഥാന രഹിതമാണെന്നും രാജ്‌നാഥ്‌ വ്യക്തമാക്കി.
ബിജെപിയോട്‌ അങ്ങനെ ചെയ്യണം ഇങ്ങനെ ചെയ്യണം എന്നൊന്നും ആര്‍എസ്‌എസ്‌ ഒരിക്കലും നിര്‍ദ്ദേശിക്കാറില്ല. അദ്വാനിയുടെ രാജി സംബന്ധിച്ച്‌ ഏതെങ്കിലും തരത്തിലുള്ള പ്രസ്‌താവനകള്‍ ആര്‍എസ്‌എസ്‌ നടത്തിയിട്ടില്ലെന്നും രാജ്‌നാഥ്‌ പറഞ്ഞു.
ഇത്രയൊക്കെ വിവാദമുണ്ടായിട്ടും ഗുജറാത്ത്‌ മുഖ്യമന്ത്രി നരേന്ദ്ര മോഡി വിവാദങ്ങളില്‍ നിന്നൊക്കെ അകന്ന്‌ നില്‍ക്കുകയാണ്‌. താന്‍ ഏറെ ബഹുമാനിക്കുന്ന അദ്വാനിയുടെ ഭാഗത്തുനിന്നുള്ള ശക്തമായ എതിര്‍പ്പ്‌ മോഡി പ്രതീക്ഷിച്ചിരുന്നില്ല.
https://www.facebook.com/Malayalivartha
