നിയന്ത്രണരേഖയില് ഇന്ത്യന് സൈന്യം നടത്തുന്ന സാധാരണ പട്രോളിംഗിനെ ചൈനീസ് സൈന്യം തടസപ്പെടുത്തുന്നതായി കേന്ദ്ര സര്ക്കാര്
നിയന്ത്രണരേഖയില് ഇന്ത്യന് സൈന്യം നടത്തുന്ന സാധാരണ പട്രോളിംഗിനെ ചൈനീസ് സൈന്യം തടസപ്പെടുത്തുന്നതായി കേന്ദ്ര സര്ക്കാര്. അതിര്ത്തി സംരക്ഷണത്തില് ഇന്ത്യയുടേത് ഉത്തരവാദിത്തപരമായ സമീപനമാണെന്നും വിദേശകാര്യ മന്ത്രാലയം അറിയിച്ചു.
വെസ്റ്റേണ് സെക്ടറിലോ സിക്കിമിലോ ഇന്ത്യ, നിയന്ത്രണരേഖ ലംഘിച്ചിട്ടില്ല. ലഡാക്കില് ചൈനീസ് സൈന്യം പലതവണ അതിര്ത്തി ലംഘിച്ചു. ഇതിലൊരു അതിര്ത്തിലംഘനം ഇരു സൈന്യങ്ങളും തമ്മില് സംഘര്ഷത്തിലേക്ക് നയിച്ചു. ഇന്ത്യ-ചൈന അതിര്ത്തി പ്രദേശങ്ങളിലെ യഥാര്ഥ നിയന്ത്രണരേഖയുടെ വിന്യാസം ഇന്ത്യന് സൈനികര്ക്ക് നന്നായി അറിയാം. അത് കൃത്യതയോടെയും സൂക്ഷ്മതയോടെയുമാണ് പാലിക്കുന്നത്. രാജ്യത്തിന്റെ പരമാധികാരവും സുരക്ഷയും ഉറപ്പാക്കാന് പ്രതിജ്ഞാബദ്ധമാണെന്നും വിദേശകാര്യ മന്ത്രാലയം വ്യക്തമാക്കി.
അടുത്തിടെ ഇന്ത്യ-ചൈനീസ് സൈനികര് തമ്മില് നേര്ക്കുനേര് വന്ന സാഹചര്യമുണ്ടായിരുന്നു. ഗല്വാന് നദിക്കു സമീപത്തായി ചൈന നിര്മാണ പ്രവര്ത്തനങ്ങള് വര്ധിപ്പിച്ചതിനെ തുടര്ന്ന് ഇന്ത്യ ഈ മേഖലയില് സൈനിക ശക്തി വര്ധിപ്പിക്കുകയും ചെയ്തു. ഈ പശ്ചാത്തലത്തിലാണ് വിദേശകാര്യ മന്ത്രാലയത്തിന്റെ വിശദീകരണം.
അതേസമയം ഇന്ത്യയുടെ അതിര്ത്തിയില് ചൈന നടത്തുന്ന നീക്കങ്ങള് തികച്ചും പ്രകോപനപരമെന്ന് വിശേഷിപ്പിച്ച് അമേരിക്ക.
ചൈനയുമായുള്ള അതിർത്തി സംഘർഷത്തിനിടയിലാണ് ഇന്ത്യയെ പിന്തുണച്ച് അമേരിക്ക രംഗത്തെത്തുന്നത്. ബീജിംഗിന്റെ നിലപാടുകള് പ്രകോപനപരവും അസ്വസ്ഥതയുളവാക്കുന്നതുമാണെന്നും ഒരു മുതിര്ന്ന അമേരിക്കന് നയതന്ത്രജ്ഞ ആലിസ് വെല്സ് പ്രതികരിച്ചു. ലഡാക്കിലെ ഇന്ത്യാ- ചൈനാ സംഘര്ഷം നിലനില്ക്കുന്നതിനെക്കുറിച്ചായിരുന്നു അവരുടെ പരാമര്ശം.
ദക്ഷിണ ചൈനാക്കടലിലായാലും ഇന്ത്യയുടെ അതിര്ത്തിയിലായാലും ചൈനയുടെ പ്രകോപനങ്ങളും അസ്വസ്ഥജനകമായ പെരുമാറ്റവും അമേരിക്ക കാണുന്നുണ്ട്. ചൈനയുടെ കടന്നുകയറ്റങ്ങള് എല്ലായ്പ്പോഴും വെറുതെ മാത്രമാകില്ലെന്ന് തെളിയിക്കുന്നതാണ് അതിര്ത്തിയിലെ സംഭവങ്ങള്. വിയറ്റ്നാം, മലേഷ്യ, ഫിലിപ്പൈന്സ്, ബ്രൂണെ തുങ്ങിയ രാജ്യങ്ങളുടെ അവകാശങ്ങളെ മറികടന്ന് ദക്ഷിണ ചൈനാ കടലില് പരമാധികാരം പ്രഖ്യാപിച്ചിരിക്കുകയാണ് ചൈന.
"കിഴക്കന് ചൈനാ കടലിലും ഇതുതന്നെയാണ് അവസ്ഥ. ഇവിടത്തെ നിരവധി ദ്വീപുകളില് ചൈന സൈനിക താവളങ്ങള് സജ്ജമാക്കി. ഈ ഭാഗങ്ങളില് ധാതു നിക്ഷേപവും വാതക നിക്ഷേപവുമുള്ളതിനൊപ്പം ആഗോള സമുദ്ര ഗതാഗതത്തിന്റെ നിര്ണായക ഭാഗം കൂടിയാണ്. അതിനാല് എല്ലാവര്ക്കും പ്രയോജനം നല്കുന്ന അന്താരാഷ്ട്ര സംവിധാനമാണ് അമേരിക്ക ആഗ്രഹിക്കുന്നത്. അല്ലാതെ ചൈനയ്ക്ക് മേല്ക്കോയ്മയുള്ള സംവിധാനത്തെയല്ല", ആലിസ് വെല്സ് പറഞ്ഞു.
ലഡാക്കിലും സിക്കിമിലും ഇരുരാജ്യങ്ങളുടെയും സൈനികര് തമ്മില് അടുത്തിടെ ഏറ്റുമുട്ടിയിരുന്നു. ഇതിനുശേഷ൦ ഇരു രാജ്യങ്ങളും അതിര്ത്തിയില് സൈനിക ബലം വര്ദ്ധിപ്പിച്ചിരിയ്ക്കുകയാണ്.
ചൈണ പാങ്കോംഗ് സോയ്ക്ക് ചുറ്റുമുള്ള പ്രദേശങ്ങളിൽ സാന്നിധ്യം സൈനികരുടെ എണ്ണം ഗണ്യമായി വർദ്ധിപ്പിക്കുകയും തടാകത്തിലേക്ക് കൂടുതൽ ബോട്ടുകൾ എത്തിക്കുകയും ചെയ്തിരിയ്ക്കുകയാണ്. ഇരു രാജ്യങ്ങളും ഈ പ്രദേശത്ത് കൂടുതല് സൈനികരെ വിന്യസിച്ചിരിയ്ക്കുകയാണ്.
https://www.facebook.com/Malayalivartha
