മഹാരാഷ്ട്രയിലും മധ്യപ്രദേശിലും ഗോവധം നിരോധിച്ചതുപോലെ രാജ്യം മുഴുവന്‍ ഗോവധനിരോധനം നടപ്പാക്കുമെന്ന് ആഭ്യന്തര മന്ത്രി രാജ്‌നാഥ് സിങ്. ഗോവധം രാജ്യത്തെവിടെയും അംഗീകരിക്കാനാവില്ലെന്നാണ് രാജ്‌നാഥ് സിങ്ങിന്റെ നിലപാട്.
ഗോവധനിരോധനം രാജ്യത്തുടനീളം നടപ്പാക്കാനുള്ള ശ്രമം നടത്തുമെന്ന് പറഞ്ഞ മന്ത്രി, ഇക്കാര്യത്തില്‍ സമവായത്തിന് ശ്രമിക്കുമെന്നും വ്യക്തമാക്കി. ജൈനമതത്തിലെ ശ്വേതാംബര വിഭാഗത്തിന്റെ നേതാക്കളുമായി സംസാരിക്കവെയാണ് ഇക്കാര്യം മന്ത്രി പറഞ്ഞത്. ബിജെപി ഭരിക്കുന്ന മഹാരാഷ്ട്രയിലും മധ്യപ്രദേശിലും ഗോവധം നിരോധിച്ചതിനെ ചോദ്യം ചെയ്യാന്‍ ആര്‍ക്കുമാകില്ലെന്നും ഗോവധം നിരോധിക്കുകയെന്നത് സര്‍ക്കാരിന്റെ നയങ്ങളിലൊന്നാണെന്നും മന്ത്രി പറഞ്ഞു.
മഹാരാഷ്ട്രയിലും മധ്യപ്രദേശിലും കടുത്ത ഉപാധികളോടെയാണ് മൃഗസംരക്ഷണ നിയമ ഭേദഗതി ബില്‍ പാസ്സാക്കിയിട്ടുള്ളത്. ഈ ബില്ലുകള്‍ രാഷ്ട്രപതിയുടെ പരിഗണനയ്ക്ക് അയക്കാന്‍ കേന്ദ്രം അല്‍പം പോലും താമസം വരുത്തിയതുമില്ല. മഹാരാഷ്ട്രയിലെ ഭേദഗതി ഗോവധം മാത്രമല്ല, പോത്തുകളെയും കാളകളെയും കൊല്ലുന്നതും നിരോധിച്ചിട്ടുണ്ടെന്നും മന്ത്രി പറഞ്ഞു.
ഗോവധത്തിനൊപ്പം പോത്തുകളെയും കാളകളെയും കൊല്ലുന്നതും നിരോധിച്ചുകൊണ്ടുന്ന ബില്‍ ഈ ബജറ്റ് സമ്മേളനത്തില്‍ത്തന്നെ അവതരിപ്പിക്കണമെന്ന് ആചാര്യ ശിവമുനി മന്ത്രിയോടാവശ്യപ്പെട്ടു. എന്നാല്‍, ലോക്‌സഭയിലേതുപോലെ രാജ്യസഭയിലും ഭൂരിപക്ഷമുള്ള സാഹചര്യത്തില്‍ മാത്രമേ അത്തരമൊരു നീക്കം നടത്താന്‍ സര്‍ക്കാരിന് സാധിക്കൂ എന്ന് മന്ത്രി പറഞ്ഞു. എന്നാല്‍, ഇക്കൊര്യത്തില്‍ ഒരു സമവായത്തിന് സര്‍ക്കാര്‍ ശ്രമിക്കുമെന്നും മന്ത്രി ഉറപ്പുനല്‍കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha