മുതിര്‍ന്ന സിനിമ-സീരിയൽ നടനായ കിരണ്‍ കുമാറിന് കോവിഡ് 19 സ്ഥിരീകരിച്ചു. ഇന്നലെയാണ് അദ്ദേഹത്തിന്‍റെ കൊവിഡ് ടെസ്റ്റ് പോസ്റ്റീവായത്. ഇപ്പോള്‍ അദ്ദേഹം മുംബൈയിലെ വീട്ടിൽ ക്വാറന്‍റൈനിൽ കഴിയുകയാണ്.

തനിക്ക് രോഗലക്ഷണങ്ങള്‍ ഒന്നുമില്ലായിരുന്നെന്നും പക്ഷേ ടെസ്റ്റിന് വിധേയനായപ്പോള്‍ പോസിറ്റീവായിരുന്നെന്നും 74 കാരനായ താരം വെളിപ്പെടുത്തിയിരിക്കുകയാണ്

മെയ് 14 ന് ഒരു മെഡിക്കല്‍ പരിശോധനയ്ക്കായി ആശുപത്രിയില്‍ പോയ സമയത്ത്, അവിടെ കോവിഡ് -19 പരിശോധന നിര്‍ബന്ധമായിരുന്നതിനാൽ സ്വയം പരിശോധനയ്ക്ക് വിധേയനായതാണെന്നും അപ്പോള്‍ ഫലം പോസിറ്റീവ് ആയിരുന്നെന്നും ആണ് മാധ്യമങ്ങളെ ഫോണിലൂടെ അദ്ദേഹം അറിയിച്ചത് .. എന്നാല്‍ രോഗലക്ഷണങ്ങളായ പനി, ചുമ ശ്വാസതടസം ഒന്നും തന്നെ താരം പ്രകടിപ്പിച്ചിരുന്നില്ല.

ഫലമറിഞ്ഞ് ഇന്നേക്ക് പത്തുദിവസമായി. ഇതുവരെയായി ലക്ഷണങ്ങളൊന്നും തന്നെയില്ല. വീട്ടില്‍ ക്വാറന്റൈനില്‍ കഴിയാനാണ് ഡോക്ടര്‍മാര്‍ നിര്‍ദേശിച്ചിരിക്കുന്നത്.

വീട്ടിലെ മൂന്നാംനിലയിലാണ് കിരണ്‍ ഇപ്പോള്‍ കഴിയുന്നത്. നടന്റെ കുടുംബം രണ്ടാം നിലയില്‍ താമസിക്കുന്നുണ്ട്. കിരണിന്റെ രണ്ടാം ഘട്ടപരിശോധന തിങ്കളാഴ്ച നടന്നേക്കും.

പണ്ട് ബോര്‍ഡിംഗ് സ്കൂളിൽ കഴിഞ്ഞ സമയങ്ങള്‍ ഓര്‍ക്കുകയാണിപ്പോഴെന്നും നര്‍മ്മരൂപത്തിൽ താരം പറയുകയുണ്ടായി. മെയ് 26 നോ 27 നോ രണ്ടാമത്തെ പരിശോധന നടത്താനാണ് ഉദ്ദേശിക്കുന്നതെന്നും അദ്ദേഹം വ്യക്തമാക്കി

മുഛ്സേ ദോസ്തീ കരോഗേ, ജൂലി, ധട്കന്‍ തുടങ്ങിയവയാണ് കിരണ്‍ അഭിനയിച്ച ചിത്രങ്ങള്‍. മിലി, ഗൃഹസ്തി, സിന്ദഗി തുടങ്ങിയ സീരിയലുകളിലും അഭിനയിച്ചിട്ടുണ്ട്.

ഗായിക കനിക കപൂര്‍, നിര്‍മാതാവ് കരീം മൊറാനി, നടന്‍ പുരബ് കോഹ്ലി എന്നിവര്‍ക്കാണ് ബോളിവുഡില്‍ നേരത്തെ കോവിഡ് 19 സ്ഥിരീകരിച്ചത്. കരീം മൊറാനിയുടെ രണ്ടു പെണ്‍മക്കള്‍ക്കും കൊറോണ ബാധിച്ചിരുന്നു