ഇന്ത്യയുടെയും ചൈനയുടെയും ഉന്നത സേനാ നേതൃത്വങ്ങള് ഈ മാസം ആറിനു നടത്തുന്ന ചര്ച്ചയില് അതിര്ത്തി സംഘര്ഷത്തില് പരിഹാരമുണ്ടാകുമെന്ന പ്രതീക്ഷയില് ഇന്ത്യ... കിഴക്കന് ലഡാക്കില് അതിര്ത്തിയുടെ സുരക്ഷാ ചുമതലയുള്ള 14 കോര് മേധാവി ലഫ്. ജനറല് ഹരീന്ദര് സിങ് ചര്ച്ചയില് ഇന്ത്യയെ പ്രതിനിധീകരിക്കും
ഇന്ത്യയുടെയും ചൈനയുടെയും ഉന്നത സേനാ നേതൃത്വങ്ങള് ഈ മാസം ആറിനു നടത്തുന്ന ചര്ച്ചയില് അതിര്ത്തി സംഘര്ഷത്തില് പരിഹാരമുണ്ടാകുമെന്ന പ്രതീക്ഷയില് ഇന്ത്യ. കിഴക്കന് ലഡാക്കില് അതിര്ത്തിയുടെ സുരക്ഷാ ചുമതലയുള്ള 14 കോര് മേധാവി ലഫ്. ജനറല് ഹരീന്ദര് സിങ് ചര്ച്ചയില് ഇന്ത്യയെ പ്രതിനിധീകരിക്കും. ബ്രിഗേഡിയര്, മേജര് ജനറല് തലങ്ങളില് കഴിഞ്ഞ ദിവസങ്ങളില് നടന്ന ചര്ച്ചകള് ഫലം കണ്ടിരുന്നില്ല. ഇപ്പോഴിതാ അതിര്ത്തിത്തര്ക്കം പരിഹരിക്കാന് ഉന്നത സേനാനേതൃത്വങ്ങള് തമ്മിലുള്ള ചര്ച്ചയ്ക്കു മുന്നോടിയായി സംഘര്ഷ മേഖലകളിലൊന്നില് അല്പം പിന്വാങ്ങി ഇന്ത്യ ചൈന സേനകള്.
കിഴക്കന് ലഡാക്കിലെ ഗല്വാന് താഴ്വരയില് യഥാര്ഥ നിയന്ത്രണരേഖയില് (എല്എസി) നിന്ന് ചൈന 2 കിലോമീറ്ററും ഇന്ത്യ ഒരു കിലോമീറ്ററും പിന്നോട്ടു മാറിയതായി സേനാവൃത്തങ്ങള് പറഞ്ഞു. അതിര്ത്തിയില് നാളെ നടക്കുന്ന സേനാതല ചര്ച്ചയില് അനുരഞ്ജനത്തിന്റെ അന്തരീക്ഷം സൃഷ്ടിക്കാന് ഇതു സഹായിക്കുമെന്നാണു പ്രതീക്ഷ. എന്നാല്, പാംഗോങ് ട്സോ തടാകത്തിന്റെ വടക്കന് തീരത്ത് ഇരുസേനകളും പിന്വാങ്ങിയിട്ടില്ല.
ഇതിനിടെ, ബൊഫോഴ്സ് പീരങ്കികള് ഇന്ത്യ അതിര്ത്തിയിലെത്തിച്ചു. ചൈന സന്നാഹം ശക്തമാക്കിയതിനു പിന്നാലെയാണ് 60 പീരങ്കികള് സജ്ജമാക്കിയത്. സന്നാഹത്തില് പിന്നാക്കം പോകുന്നതു ചര്ച്ചകളില് ചൈനയ്ക്കു മേല്ക്കൈ നല്കുമെന്നു വിലയിരുത്തിയാണു നീക്കം. അതിര്ത്തിയോടു ചേര്ന്നുള്ള റോഡ് നിര്മാണം നിര്ത്തണമെന്ന ചൈനയുടെ ആവശ്യവും അംഗീകരിക്കേണ്ടെന്നാണ് തീരുമാനം. പാക്ക്, ചൈന അതിര്ത്തികളില് സംഘര്ഷം പുകയുന്നതിനിടെ ദക്ഷിണ കശ്മീരിലെ അനന്ത്നാഗില് യുദ്ധവിമാനങ്ങള്ക്കായി എയര്സ്ട്രിപ് നിര്മിക്കാന് വ്യോമസേന. ശ്രീനഗര് ജമ്മു ദേശീയപാതയ്ക്കു സമാന്തരമായാണ് 3.5 കിലോമീറ്റര് എയര്സ്ട്രിപ് ഒരുക്കുന്നത്. നിര്മാണം വേഗം പൂര്ത്തിയാക്കാന് ദേശീയപാത അതോറിറ്റിയോട് ആവശ്യപ്പെട്ടു.
ചൊവ്വാഴ്ച ലഡാക്കിലെത്തിയ വടക്കന് കമാന്ഡ് മേധാവി ലഫ്. ജനറല് വൈ.കെ. ജോഷി, ചര്ച്ചയ്ക്കു മുന്നോടിയായി ഹരീന്ദറുമായി കൂടിക്കാഴ്ച നടത്തി. കിഴക്കന് ലഡാക്കിലെ പാംഗോങ് ട്സോ തടാകത്തിന്റെ വടക്കന് തീരം, ഗല്വാന് താഴ്വര എന്നിവിടങ്ങളില് കടന്നുകയറാനുള്ള നീക്കത്തില് നിന്നു ചൈന പിന്മാറണമെന്ന ആവശ്യത്തില് ഇന്ത്യ ഉറച്ചുനില്ക്കുമെന്നു സേനാ വൃത്തങ്ങള് അറിയിച്ചു. അതിര്ത്തിയോട് ചേര്ന്നുള്ള പ്രദേശങ്ങളിലെ നിര്മാണം ഇന്ത്യ നിര്ത്തിവയ്ക്കണമെന്നാണു ചൈനയുടെ ആവശ്യം. തങ്ങളുടെ അധികാരപരിധിയിലുള്ള കാര്യങ്ങളില് ചൈന ഇടപെടേണ്ടെന്ന് ഇന്ത്യ വാദിക്കുന്നു.
ഇരു കൂട്ടരും നിലപാടുകളില് ഉറച്ചുനില്ക്കുന്നതിനാല് പ്രശ്നപരിഹാരം എളുപ്പമല്ലെങ്കിലും ഉന്നത നേതൃത്വത്തിന്റെ ഇടപെടല് അനുരഞ്ജന പാത തുറക്കുമെന്ന പ്രതീക്ഷയിലാണു സേന. അതിര്ത്തി മേഖലകളില് ചൈനീസ് സൈനികരുടെ എണ്ണം ഉയര്ന്നിട്ടുണ്ടെന്നും പ്രതിരോധ സജ്ജരായി ഇന്ത്യന് സേന നിലയുറപ്പിച്ചിട്ടുണ്ടെന്നും പ്രതിരോധ മന്ത്രി രാജ്നാഥ് സിങ് പറഞ്ഞു.
https://www.facebook.com/Malayalivartha
