കോവിഡിനെ നേരിടുന്നതില് രാജസ്ഥാന് ഒന്നാമതെന്നു കേന്ദ്ര സര്ക്കാര് വിലയിരുത്തല്
രോഗബാധ ഏറ്റവും കൂടുതലുള്ള 10 സംസ്ഥാനങ്ങളിലെ രോഗികളുടെ എണ്ണം, ഭേദമായവര്, മരണസംഖ്യ എന്നിവ പരിഗണിച്ചു തയാറാക്കിയ താരതമ്യപ്പട്ടികയില് കോവിഡിനെ നേരിടുന്ന കാര്യത്തില് രാജസ്ഥാന് ഒന്നാമതാണെന്ന് കേന്ദ്ര സര്ക്കാരിന്റെ വിലയിരുത്തല്.
ഇന്നലെ 68 പേരില്ക്കൂടി രോഗം സ്ഥിരീകരിച്ചതോടെ രോഗബാധിതര് 9720 പേരായി ഉയര്ന്നുവെങ്കിലും 6819 പേരും രോഗമുക്തരായിക്കഴിഞ്ഞു. 209 പേര് മാത്രമാണു രോഗത്തിനു കീഴടങ്ങിയത്. കോവിഡ് ബാധിതരുടെ എണ്ണം പതിനായിരത്തോട് അടുത്തെങ്കിലും പുതിയതായി രോഗം ബാധിക്കുന്നവരുടെ എണ്ണം കുറച്ചു നിര്ത്തുന്നതിനു കഴിഞ്ഞിട്ടുണ്ട്.
രാജസ്ഥാനില് നാലര ലക്ഷത്തോളം പേര്ക്ക് ഇതിനോടകം കോവിഡ് പരിശോധന നടത്തിക്കഴിഞ്ഞു. രാജ്യത്തു 12 ദിവസത്തിനുള്ളില് രോഗികളുടെ എണ്ണം ഇരട്ടിയാകുമ്പോള് ഇവിടെ അതു 18 ദിവസമാണ്. ഭില്വാഡയിലേതുപോലെ റെഡ് സോണുകളായി മാറിയ ഇടങ്ങളില് ഏര്പ്പെടുത്തിയ കര്ശന നിയന്ത്രണങ്ങള് വലിയ അളവില് ഇതിനു സഹായിച്ചിട്ടുണ്ട്.
മഹാരാഷ്ട്ര, ഗുജറാത്ത് എന്നിവിടങ്ങില് നിന്നായി 11 ലക്ഷത്തോളം തൊഴിലാളികള് മടങ്ങി വന്നെങ്കിലും ഗ്രാമീണ തലങ്ങളില് ഏര്പ്പെടുത്തിയ നിരീക്ഷണത്തിലൂടെ രോഗ വ്യാപനം ഗണ്യമായ തോതില് തടയാന് കഴിഞ്ഞിട്ടുണ്ടെന്ന് ആരോഗ്യമന്ത്രി രഘു ശര്മ പറഞ്ഞു. സംസ്ഥാനത്തു രോഗം ഭേദമാകുന്നവര് 67.59% ആണെന്നും മരണനിരക്കു 2.16% ആണെന്നും ദേശീയ ശരാശരിയേക്കാള് ഏറെ മുന്നിലാണ് ഇതെന്നും അദ്ദേഹം പറഞ്ഞു.
വൈറസ്ബാധ തുടങ്ങിയ ഉടന്തന്നെ ഏര്പ്പെടുത്തിയ മൊബൈല് മെഡിക്കല് വാനുകള്, ആരോഗ്യസേവന കേന്ദ്രങ്ങള് കുറവായ ഗ്രാമങ്ങളില് രോഗ ബാധിതരെ തുടക്കത്തിലെ കണ്ടെത്തി ചികില്സ ലഭ്യമാക്കുന്നതിനു സഹായകമായി. മറ്റു സംസ്ഥാനങ്ങളില്നിന്നു മടങ്ങിയെത്തിയവര്ക്ക് രാജസ്ഥാനിലെ ഗ്രാമങ്ങള് കര്ശന നിയന്ത്രണങ്ങള് ഏര്പ്പെടുത്തി.
ജയ്സാല്മേര്, ബാഡ്മേര്, ജലോര് തുടങ്ങിയ മരുപ്രദേശങ്ങളിലെ ഗ്രാമീണരാണു തങ്ങളുടേതായ ക്വാറന്റീന് സംവിധാനങ്ങളൊരുക്കി കോവിഡിനെ തടയുന്നത്. ഗ്രാമീണര്ക്കിടയില് സര്ക്കാര് വക ബോധവല്ക്കരണ പരിപാടികളും നടക്കുന്നുണ്ട്. സര്ക്കാര് രൂപീകരിച്ച ഗ്രാമസേവാ സമിതികളും ഗ്രാമപഞ്ചായത്ത് അധികൃതരുമാണ് ഇതിനു നേതൃത്വം നല്കുന്നത്. അതിര്ത്തി ജില്ലകളിലേക്ക് മടങ്ങിയെത്തുന്നവരില് പലരും കോവിഡ് ബാധിതരാണ്.
അഹമ്മദാബാദ്. സൂറത്ത്, മുംബൈ തുടങ്ങിയ പട്ടണങ്ങളില് ഇവിടെ നിന്നുള്ള നൂറു കണക്കിനു യുവാക്കളാണു ജോലി ചെയ്യുന്നത്. ഇവര്ക്കായി ഗ്രാമങ്ങള്ക്കു പുറത്തു കുടിലുകള് കെട്ടിയാണു ഗ്രാമീണര് സുരക്ഷ ഉറപ്പാക്കുന്നത്. ഗ്രാമങ്ങളിലേക്കു പുറത്തുനിന്നുള്ളവര് പ്രവേശിക്കുന്നതിനു കര്ശന വിലക്ക് ഏര്പ്പെടുത്തിയിട്ടുണ്ട്.
https://www.facebook.com/Malayalivartha
