ആനയുടേത് കൊലപാതകമാണെന്നും സുലഭമായി കിട്ടുന്ന നാടന്‍ ബോംബ് ഉപയോഗിച്ച് കേരളത്തില്‍ മൃഗങ്ങളെ കൊന്നൊടുക്കുകയാണെന്നും ബിജെപി നേതാവ് മേനകാ ഗാന്ധി. മലപ്പുറത്താണ് ഇതു നടന്നതെന്നും മലപ്പുറം ജില്ല കുറ്റകൃത്യങ്ങളുടെ കേന്ദ്രമാണെന്നും മുന്‍ കേന്ദ്രമന്ത്രിയും സുല്‍ത്താന്‍പുര്‍ എംപിയുമായ മേനക പറഞ്ഞിരുന്നു.

രാജ്യത്ത് ഏറ്റവും കൂടുതല്‍ അക്രമങ്ങള്‍ നടക്കുന്നത് മലപ്പുറം ജില്ലയിലാണെന്നും അവിടെ ദിവസവും മനുഷ്യരെയും മൃഗങ്ങളെയും കൊല്ലുകയാണെന്നും ബുധനാഴ്ച നടത്തിയ പ്രസ്താവനയ്ക്കു പിന്നാലെയാണ് അതേമട്ടില്‍ ഇന്നലെ വീണ്ടും ആരോപണമുന്നയിച്ചത്. ആനയ്ക്കുണ്ടായ ദയനീയാന്ത്യത്തെ വര്‍ഗീയവല്‍ക്കരിക്കുന്ന രീതിയിലായിരുന്നു ബുധനാഴ്ച മേനക നടത്തിയ പ്രസ്താവന.

കാട്ടുപന്നികളെ കൊല്ലാന്‍ അനുവാദം കൊടുത്തിരിക്കുകയാണ് കേരളത്തില്‍. സുലഭമായി കിട്ടുന്ന ബോംബുകള്‍ പഴങ്ങളില്‍ വച്ച് പന്നികളെയടക്കം കൊല്ലുകയാണ്. രാഹുല്‍ ഗാന്ധിയും ശശി തരൂരും അടക്കമുള്ളവര്‍ പ്രതികരിക്കണം. ആന റോഡിലൂടെ നടന്ന് ഭക്ഷണം തേടുകയായിരുന്നു. ആരോ ഒരാള്‍ ബോംബുവച്ച പൈനാപ്പിള്‍ കൊടുത്ത് അതിനെ കൊല്ലുകയായിരുന്നു ചാനല്‍ ചര്‍ച്ചയില്‍ മേനക പറഞ്ഞു.

'അവിടുത്തെ പഞ്ചായത്ത് ഭരണാധികാരികള്‍ ആനകളെ മാത്രമല്ല, പക്ഷികളെയും മറ്റു മൃഗങ്ങളെയും വിഷംവച്ചു ദിവസവും കൊല്ലുന്നു. എന്നും കൊലപാതകങ്ങള്‍ നടക്കുന്നു. ഏറ്റവുമധികം സ്ത്രീകളെ കൊല്ലുന്ന സ്ഥലമാണ്. ഹിന്ദുക്കളും മുസ്ലിംകളും തമ്മില്‍ കലാപം നടക്കുന്നു. വളരെ ഭയാനകമായ സ്ഥിതിയാണു മലപ്പുറത്ത്. കേരളത്തിലെ സര്‍ക്കാരിന് അവരെ പേടിയാണ്. ഏറ്റവും ദുര്‍ബലരായ ഉദ്യോഗസ്ഥരെയാണ് അവിടേക്ക് അയയ്ക്കുന്നത്, എന്നിങ്ങനെയാണ് മലപ്പുറം ജില്ലയെപ്പറ്റി ബുധനാഴ്ച മേനക പറഞ്ഞത്.

കേരളത്തില്‍ ആനയുടെ പേരില്‍ ഇന്‍ഷുറന്‍സെടുക്കുന്നു. എന്നിട്ട് കാലില്‍ മുറിവുണ്ടാക്കി ഏതെങ്കിലും തരത്തില്‍ പഴുപ്പു വരുത്തി കൊല്ലുകയും ഇന്‍ഷുറന്‍സ് തുക വാങ്ങുകയുമാണ്. എന്തിനെ കൊന്നാലും കേരള സര്‍ക്കാര്‍ മിണ്ടില്ല. ഓരോ വര്‍ഷവും അറുന്നൂറിനടുത്ത് ആനകളെ കൊല്ലുന്നു. ഓരോ 3 ദിവസവും ഒരു ആന ചെരിയുന്നു. അവയെ മര്‍ദിച്ചു കൊല്ലുകയാണ്. ആനകളെ എഴുന്നെള്ളിക്കുന്നു. ആന വിരളുമ്പോള്‍ വെടിവച്ചു കൊല്ലുന്നു.

ഒന്നിനും കൊള്ളാത്ത വനം മന്ത്രിയും വൈല്‍ഡ് ലൈഫ് സെക്രട്ടറിയും വൈല്‍ഡ് ലൈഫ് വാര്‍ഡനുമാണ് കേരളത്തിലുള്ളതെന്ന് ഇരുവരുടെയും പേരെടുത്തു പറഞ്ഞ് മേനകാ ഗാന്ധി ആരോപിച്ചു.