മലപ്പുറം ജില്ലക്കെതിരേയും മുസ്ലീം വിഭാഗത്തനെതിരേയും സാമുദായിക, - പ്രാദേശിക സ്പര്‍ദ്ധ വളര്‍ത്തുന്ന പ്രചാരണങ്ങള്‍ നടത്തിയതുമായി ബന്ധപ്പെട്ട് ബിജെപി എം പി മനേക ഗാന്ധിക്കെതിരെ കേസ്. വളാഞ്ചേരി സ്വദേശിയും സുപ്രീം കോടതി അഭിഭാഷകനുമായ അഡ്വ. കെ ആര്‍ സുഭാഷ് ചന്ദ്രന്‍ ജില്ല പൊലീസ് മേധാവി യു അബ്ദുള്‍ കരീമിന് നല്‍കിയ പരാതിയിലാണ് കേസ്.

ജില്ലയിലെ ജനങ്ങള്‍ക്കെതിരെ സ്പര്‍ദ്ധ വളര്‍ത്തുംവിധം ബോധപൂര്‍വ്വം വ്യാജ പ്രചരണം നടത്തിയതിന് ഇന്ത്യന്‍ ശിക്ഷാ നിയമത്തിലെ 153 വകുപ്പുകള്‍ പ്രകാരമാണ് കേസെടുത്ത്. മുസ്ലീം ഭൂരിപക്ഷ ജില്ലയായ മലപ്പുറം ജിഹാദികളുടേയും അക്രമങ്ങളുടേയും കേന്ദ്രമാണെന്ന തരത്തിലാണ് വ്യാജ പ്രചരണങ്ങളെന്ന് പരാതിയില്‍ പറയുന്നു. ഇന്ത്യയില്‍ ഏറ്റവുമധികം അക്രമങ്ങള്‍ നടക്കുന്ന ജില്ലയാണ് മലപ്പുറമെന്നും ദേശീയ തലത്തില്‍ കുറ്റകൃത്യങ്ങളില്‍ മുന്‍പന്തിയില്‍ നില്‍ക്കുന്ന മലപ്പുറം ജില്ലയിലെ അക്രമങ്ങള്‍ക്കു കാരണം മുസ്ലീം സമുദായം ഭൂരിപക്ഷമായതാണെന്നും വിവിധ സോഷ്യല്‍ മീഡിയ (ട്വിറ്റര്‍, ഫേസ് ബുക്ക് ) അക്കൗണ്ടുകളിലൂടെ വ്യാജമായി ആരോപിക്കുന്ന വിവരവും പരാതിയിലുണ്ട്.

ജില്ലക്കു പുറത്തുനടന്ന സംഭവത്തെ ബോധപൂര്‍വ്വം ഒരു സമുദായത്തിനെതിരെ തിരിക്കുക എന്ന ലക്ഷ്യത്തോടെ ബോധപൂര്‍വ്വമായ ആദ്യ പ്രചരണം നടത്തിയത് മുന്‍ കേന്ദ്രമന്ത്രി മനേക ഗാന്ധിയാണ്. ഇതേ തുടര്‍ന്ന് ഉത്തരേന്ത്യയിലെ നിരവധിയായ സോഷ്യല്‍ മീഡിയ അക്കൗണ്ടുകളിലൂടെ മലപ്പുറം ജില്ലക്കെതിരെ കടുത്ത വര്‍ഗ്ഗീയ പ്രചരണമാണ് നടക്കുന്നത്. മറ്റു ചില സംഘടനകളും പരാതി നല്‍കിയിരുന്നു. ആറു പരാതികളില്‍ ഒറ്റ എഫ്‌ഐആറിലാണ് കേസ്.