മുംബൈയില് ആശങ്ക... മഴക്കാലം ആരംഭിച്ചതിനുപിന്നാലെ വൈറല്, ബാക്ടീരിയല് രോഗങ്ങള്ക്കൂടി തലപൊക്കുന്നു.... കൊറോണയും, ഡെങ്കി പനിയും തമ്മില് അടുത്ത ബന്ധം?; തിരിച്ചറിയാന് സാധിക്കുന്നില്ല
മുംബൈയില് തിങ്കളാഴ്ച മുതല് സ്വകാര്യ സ്ഥാപനങ്ങളും നിബന്ധനകള്ക്ക് വിധേയമായി തുറക്കും. എന്നാല് ജീവനക്കാര്ക്ക് വേണ്ടി ബസുകളോ, ഓട്ടോറിക്ഷകളോ ടാക്സികളോ ഓടില്ല. ഇവയെല്ലാം അവശ്യ സര്വീസുകാര്ക്ക് വേണ്ടി മാത്രമായിരിക്കും ഓടുക. അതേ സമയം ദീര്ഘദൂര തീവണ്ടികള് ഓടുന്നതിനെത്തുടര്ന്ന് റെയില്വേ സ്റ്റേഷനിലേക്ക് പോകാനും അവിടെ നിന്നുള്ള യാത്രക്കാരെ ലക്ഷ്യത്തില് എത്തിക്കുന്നതിനും വേണ്ടി ടാക്സികള് ഓടും. ലോക്കല് ട്രെയിന്, മോണോ റെയില്, മെട്രോ എന്നിവ ഓടിക്കേണ്ടെന്നാണ് സര്ക്കാരിന്റെ തീരുമാനം. കാര്യങ്ങളിങ്ങനെ ആണെങ്കിലും മറ്റൊരുവാര്ത്ത ആശങ്കപ്പെടുത്തുന്നു.
മഴക്കാലം ആരംഭിച്ചതിനുപിന്നാലെ വൈറല്, ബാക്ടീരിയല് രോഗങ്ങള്ക്കൂടി തലപൊക്കുന്നതിനൊപ്പം മുംബൈയില്നിന്ന് ആശങ്കപ്പെടുത്തുന്ന മറ്റൊരു വാര്ത്തയുംകൂടി വരുന്നു. കോവിഡ്19 പോസിറ്റീവായ 3 പേര്ക്ക് ഡെങ്കി രോഗവും ബാധിച്ചെന്നതാണ് റിപ്പോര്ട്ട്. മാര്ച്ചില് ലാന്സെറ്റില് പ്രസിദ്ധീകരിച്ച റിപ്പോര്ട്ടില് ഇരു രോഗത്തെയും വ്യക്തമായി തിരിച്ചറിയാന് സാധിക്കുക ബുദ്ധിമുട്ടാണെന്നും 'ക്ലിനിക്കല്, ലാബ് ലക്ഷണങ്ങളില് സമാനത' കാണിക്കുന്നുണ്ടെന്നും പറയുന്നു.
ഈ മൂന്നുപേര്ക്കും കോവിഡ്19 രോഗത്തിന്റെ ലക്ഷണങ്ങളാണ് പ്രകടമായിരുന്നതെന്ന് ബ്രീച്ച് കാന്ഡി ആശുപത്രിയിലെ ഫിസിഷ്യന് ഡോ. പ്രതിത് സംദാനി പറഞ്ഞു. ഇതില് 82 വയസ്സുകാരന് ന്യുമോണിയയുണ്ട്. ഡെങ്കി രോഗമാണെന്നാണ് പരിശോധനയില് തെളിഞ്ഞത്. ഡെങ്കി ലക്ഷണങ്ങളില്ലതാനും. എന്നാല് ആര്ടി പിസിആര് പരിശോധനയിലും സിടി സ്കാനിലും കോവിഡ്19 രോഗമുണ്ടെന്നു തെളിഞ്ഞിരുന്നു. മറ്റു രണ്ട് രോഗികള്ക്കും പ്ലേറ്റ്ലറ്റുകള് കുറയുക പോലുള്ള ഡെങ്കിയുടെ യാതൊരു ലക്ഷണവും ഇല്ല.
രണ്ടു വൈറല് രോഗങ്ങള് തമ്മില് രക്തത്തിലുണ്ടാകുന്ന ചെറിയ വ്യത്യാസം കാരണമായിരിക്കാം ഇതു സംഭവിക്കുന്നത്. എന്നാല് പനിയും തലവേദനയും പോലുള്ള ചെറിയ ലക്ഷണങ്ങളല്ലാതെ ഈ രണ്ടു രോഗത്തെയും വേര്തിരിച്ചറിയുക ബുദ്ധിമുട്ടാണ്.
സിംഗപ്പൂരില് റാപിഡ് സെറോളജിക്കല് പരിശോധന നടത്തിയ രണ്ടു രോഗികള്ക്ക് ഡെങ്കിയുണ്ടെന്നു തെറ്റായി തെളിഞ്ഞിരുന്നു. എന്നാല് വീണ്ടും വിശദമായി നടത്തിയ പരിശോധനയില് ഇവര്ക്ക് സാര്സ് കോവ്2 എന്ന കൊറോണ വൈറസ് ആണ് ബാധിച്ചിരിക്കുന്നതെന്നു തെളിഞ്ഞതും ഇതിനോടു ചേര്ത്തു വായിക്കാവുന്നതാണ്. കോവിഡ് രോഗികളെ ഡെങ്കി രോഗികളെന്നും തിരിച്ചും തെറ്റിദ്ധരിക്കപ്പെടാനുള്ള സാധ്യതയുണ്ടെന്നും ഈ പഠനം വ്യക്തമാക്കുന്നു.
ഇത്തരം പരിശോധനാഫലങ്ങള് പുറത്തുവന്നതോടെ, കോവിഡ്19 ടെസ്റ്റിങ്ങിന് ആവശ്യമായ കൃത്യമായ കിറ്റുകള് വേണ്ടതിന്റെ പ്രാധാന്യം വ്യക്തമായിട്ടുണ്ടെന്നും ലാന്സെറ്റില് വന്ന റിപ്പോര്ട്ടില് പറയുന്നു
"
https://www.facebook.com/Malayalivartha