തെലുങ്കാനയിലെ പെടാപ്പള്ളി ജില്ലയിലെ കോട്ടൂര്‍ ഗ്രാമത്തില്‍ 58-കാരനായ എം നരസയ്യ എന്നയാള്‍ ഇക്കഴിഞ്ഞ മെയ് 26-ന് മരണമടഞ്ഞത് ഹൃദയാഘാതം മൂലമാണെന്നായിരുന്നു എല്ലാവരും ധരിച്ചിരുന്നത്. എന്നാല്‍ ആശ്രിത നിയമനത്തിലൂടെ പിതാവിന്റെ ജോലി തട്ടിയെടുക്കാന്‍ അഭ്യസ്തവിദ്യനായ മകന്‍ അച്ഛനെ ശ്വാസം മുട്ടിച്ചു കൊലപ്പെടുത്തിയതാണെന്ന വിവരം പുറത്തുവന്നത് നാടിനെ ഞെട്ടിച്ചു.

ഇയാളുടെ 25-കാരനായ മൂത്തമകന്‍ എം തിരുപ്പതി അറസ്റ്റിലായി. കിടപ്പ് രോഗിയായ മാതാവിന്റെയും 19-കാരനായ അനുജന്റെയും അനുമതിയോടെയായിരുന്നു തിരുപ്പതി അച്ഛനെ കൊന്നത്. മെയ് 26-ന് നടന്ന സംഭവം കൊലപാതകമാണെന്ന് തെളിഞ്ഞത് ശനിയാഴ്ചയാണ്.

സിംഗാറേനി കോളറീസ് ലിമിറ്റഡ് എന്ന കമ്പനിയില്‍ പമ്പ് ഓപ്പറേറ്ററായി ജോലി ചെയ്തു വരികയായിരുന്നു എം നരസയ്യ. ഏതാനും ദിവസങ്ങള്‍ക്ക് ഉള്ളില്‍ ഇയാള്‍ വിരമിക്കുമായിരുന്നു. ഈ സമയത്താണ് പോളിടെക്നിക് കോഴ്സ് പൂര്‍ത്തീകരിച്ച് ജോലിക്കായി കാത്തിരിക്കുകയായിരുന്ന മകന്‍ തിരുപ്പതി
ഞെട്ടിക്കുന്ന സംഭവം ആസൂത്രണം ചെയ്തത്. രോഗബാധിതയായ കഴിയുന്ന മാതാവ് താരയുടെയും അനുജന്‍ രാകേഷിന്റെയും പിന്തുണ പിതാവിനെ കൊല്ലുന്ന കാര്യത്തില്‍ തിരുപ്പതിക്ക് കിട്ടിയിരുന്നു.

തിരുപ്പതി സഹോദരനെയും മാതാവിനെയും മെയ് 23-ന് ഗോദാവരിഖനി നഗരത്തിലേക്ക് അയച്ചു. പിന്നാലെ രാത്രിയില്‍ ഗ്രാമത്തില്‍ നടന്ന ഒരു പാര്‍ട്ടിയില്‍ നന്നായി മദ്യപിച്ച ശേഷം വീട്ടിലെത്തി ഉറങ്ങിക്കിടക്കുകയായിരുന്ന പിതാവിനെ ഒരു പുതപ്പ് ഉപയോഗിച്ച് ശ്വാസം മുട്ടിച്ച് കൊല്ലുകയായിരുന്നു. കൊലപാതകത്തിന് ശേഷം മുത്തശ്ശിയുടെ വീട്ടിലേക്ക് പോയ തിരുപ്പതി അവിടെ കിടന്നുറങ്ങി. പിറ്റേന്ന് രാവിലെ വീട്ടില്‍ തിരിച്ചെത്തുകയും പിതാവ് ഹൃദയാഘാതം മൂലം മരിച്ചെന്നും നാട്ടുകാരെയും ബന്ധുക്കളെയും വിളിച്ച് അറിയിക്കുകയും ചെയ്തു. എല്ലാവരും ചേര്‍ന്ന് സംസ്‌ക്കാരം നടത്തുകയും ചെയ്തു.

പിതാവ് മദ്യപിച്ച് കിടന്ന് ഉറങ്ങുന്നതിനിടയില്‍ ഹൃദയാഘാതം വന്നു മരിച്ചെന്ന് ധര്‍മാരം പോലീസ് സ്റ്റേഷനെ അറിയിച്ചശേഷം പിതാവിന്റെ ജോലി ലഭിക്കാനുള്ള എഫ്ഐആര്‍ നല്‍കണമെന്ന് ആവശ്യപ്പെട്ടു. നരസയ്യയ്ക്ക് നേരത്തേ തന്നെ ഹൃദ്രോഗം ഉണ്ടായിരുന്ന സാഹചര്യമാണ് തിരുപ്പതി മുതലാക്കിയത്. ഇതിന്റെ പേപ്പറുകള്‍ കൈവശം സൂക്ഷിച്ചിരുന്നത് അവരെ കാണിക്കുകയും ചെയ്തു.

എന്നാല്‍ പോലീസിന് സംഭവത്തില്‍ സംശയം തോന്നുകയും മൃതദേഹം പോസ്റ്റുമാര്‍ട്ടത്തിന് വിധേയമാക്കുകയും ചെയ്തു. അപ്പോഴാണ് പിതാവിനെ ശ്വാസം മുട്ടിച്ചതായി കണ്ടെത്തിയത്. ഇന്‍സ്പെക്ടര്‍ പ്രേംകുമാര്‍ കുടുംബാംഗങ്ങളെ ചോദ്യം ചെയ്തപ്പോള്‍ തിരുപ്പതി കൊലപാതകത്തിന്റെ ചുമതല ഏറ്റെടുക്കുകയും സമ്മതിക്കുകയും ചെയ്തു. പിതാവിന്റെ ജോലി കിട്ടാന്‍ മറ്റ് കുടുംബാംഗങ്ങളുടെ അറിവോടും സമ്മതത്തോടും കുടിയാണ് താന്‍ എല്ലാം ചെയ്തതെന്നും പറഞ്ഞു.

അനാരോഗ്യം മൂലം മുമ്പ് നരസയ്യ ജോലി മതിയാക്കി മകനെ ജോലിക്ക് എടുപ്പിക്കാന്‍ ശ്രമം നടത്തിയിരുന്നു. എന്നാല്‍ നരസയ്യയുടെ അപേക്ഷ കമ്പനി തള്ളിയതിനാല്‍ ഈ നീക്കം വിജയിച്ചിരുന്നില്ല.

തെലുങ്കാനയുടെയും കേന്ദ്ര സര്‍ക്കാരിന്റെയും സംയുക്ത സംരംഭത്തില്‍ പ്രവര്‍ത്തിക്കുന്ന കമ്പനിയാണ് എസ് സിസിഎല്‍. സര്‍വീസില്‍ ഇരിക്കുമ്പോള്‍ ആള് മരിച്ചു പോയാല്‍ അനന്തരാവകാശിക്ക് ജോലി കൊടുക്കണമെന്നാണ് നിയമം. തിരുപ്പതിയുടെ സഹോദരന്‍ രാകേഷിനെയും മാതാവിനെയും അറസ്റ്റ് ചെയ്തിട്ടുണ്ട്.