ലഡാക്കിലെ ഗാല്വന് താഴ്വരയില് തിങ്കളാഴ്ച രാത്രി ചൈനീസ് സൈന്യവുമായുണ്ടായ ഏറ്റുമുട്ടലില് കേണലടക്കം 20 ഇന്ത്യന്സൈനികരെങ്കിലും വീരമൃത്യു വരിച്ചതായി കരസേന...
ലഡാക്കിലെ ഗാല്വന് താഴ്വരയില് തിങ്കളാഴ്ച രാത്രി ചൈനീസ് സൈന്യവുമായുണ്ടായ ഏറ്റുമുട്ടലില് കേണലടക്കം 20 ഇന്ത്യന്സൈനികരെങ്കിലും വീരമൃത്യു വരിച്ചതായി കരസേന സ്ഥിരീകരിച്ചു. ചൈനയുടെ നാല്പ്പതിലേറെ സൈനികരും സംഘര്ഷത്തില് കൊല്ലപ്പെട്ടതായി സര്ക്കാര്വൃത്തങ്ങളെ ഉദ്ധരിച്ച് വാര്ത്താ ഏജന്സി എ.എന്.ഐ. റിപ്പോര്ട്ട് ചെയ്തു. അതിര്ത്തിത്തര്ക്കം രമ്യമായി പരിഹരിക്കുന്നതിന് കമാന്ഡര് തല ചര്ച്ചയും സൈനിക പിന്മാറ്റവും പുരോഗമിക്കുന്നതിനിടെയാണ് സംഘര്ഷം. വെടിവെപ്പിലല്ല സൈനികര് കൊല്ലപ്പെട്ടതെന്നും കല്ലും വടികളുമുപയോഗിച്ചുള്ള ശാരീരികാക്രമണമാണുണ്ടായതെന്നുമാണ് സൈന്യം നല്കുന്ന വിശദീകരണം.
1975-നുശേഷം ആദ്യമായാണ് ഇരുസേനയും തമ്മിലുള്ള സംഘര്ഷത്തില് രക്തം ചിന്തുന്നത്. 132 ഇന്ത്യന് സൈനികര്ക്ക് പരിക്കേറ്റതായും സ്ഥിരീകരിക്കാത്ത റിപ്പോര്ട്ടുണ്ട്. കിഴക്കന് ലഡാക്കിലെ ഗാല്വന് താഴ്വരയില് തിങ്കളാഴ്ച രാത്രിനടന്നത് സൈനിക മര്യാദകള് പാടേ ലംഘിച്ചുള്ള ചൈനീസ് ക്രൂരത. അറുനൂറോളം വരുന്ന ചൈനീസ് സൈനികരാണ് എണ്ണത്തില് കുറവായ ഇന്ത്യന്സേനയെ നേരിടാനെത്തിയത്. ഇവര് കടുത്ത ആക്രമണമാണ് നടത്തിയതെന്നും റിപ്പോര്ട്ടുകള് സൂചിപ്പിക്കുന്നു. സേനാപിന്മാറ്റം നടക്കുന്നതിനിടെ എതിര്വശത്തെ ഉയര്ന്ന കുന്നിന്മുകളില് സ്ഥാനംപിടിച്ച ചൈനീസ് ഭടന്മാര് അവിടെനിന്ന് പിന്മാറാന് തയ്യാറാകാതിരുന്നതിനെത്തുടര്ന്ന് ചര്ച്ചയ്ക്കുവേണ്ടിയാണ് കേണല് സന്തോഷ് കുമാറും ഹവീല്ദാര് കെ. പളനിയും സിപ്പോയ് കുന്തന്കുമാര് ഓഝയും അവിടേക്കുപോയത്.
സംഭാഷണത്തിനുശേഷം മടങ്ങുന്നതിനിടെ ഇവര്ക്ക് വഴിതെറ്റി. ഇതേവഴിക്കുവന്ന മറ്റൊരു ചൈനീസ് പട്രോള് സംഘം ഇവരെ തടഞ്ഞു. ഈ തര്ക്കത്തിനിടെ േകണലിന് തലയ്ക്കടിയേറ്റു. തുടര്ന്ന് മറ്റുരണ്ടുപേര് ചേര്ന്ന് കേണലിനെ രക്ഷിക്കാന് ശ്രമിച്ചു. അവരെയും ചൈനീസ് സംഘം ആക്രമിച്ചു. ഉന്തും തള്ളിനുമിടെ കേണലും മറ്റു രണ്ടുപേരും നദിയിലേക്കുവീണു. ഇത് ദൂരെ നിന്നുകണ്ട ഇന്ത്യന്സേന അവിടേക്ക് പാഞ്ഞെത്തി. ചൈനീസ് സംഘവുമായി സംഘര്ഷത്തിലായി. മുപ്പതോളംപേരാണ് ഇന്ത്യന് സംഘത്തിലുണ്ടായിരുന്നത്.
അതോടെ യഥാര്ഥ നിയന്ത്രണരേഖയ്ക്ക് അപ്പുറത്തുനിന്ന് വലിയസംഘം ചൈനീസ് സേന ഇരച്ചെത്തുകയായിരുന്നു. ഇവര് ഇന്ത്യന്സൈനികര്ക്കുനേരെ ബലപ്രയോഗമാരംഭിച്ചു. ഇതിനിടെ നദിയില്വീണ മൂന്നുപേരുടെയും മരണം സംഭവിച്ചിരുന്നു. തുടര്ന്ന് ഇതുവരെ കണ്ടിട്ടില്ലാത്ത തരത്തിലുള്ള സംഘര്ഷമാണ് അവിടെ നടന്നത്. ഇന്ത്യന് സൈന്യത്തിനുനേരെ കല്ലുകളും കമ്പിപ്പാരയും ഷവലുകളുമുപയോഗിച്ചായിരുന്നു ആക്രമണം. ഇന്ത്യന് സൈനികരും തിരിച്ചടിച്ചു. ഇന്ത്യന് സൈനികരില് പലരെയും കൊക്കയിലേക്ക് വലിച്ചെറിയുകയും വീണവരുടെ മേലേക്ക് വലിയ കല്ലുകള് വലിച്ചെറിയുകയും ചെയ്തു. കൂടുതല് ഇന്ത്യന്സൈനികര് അവിടേക്കുവരുകയും കടുത്ത ചെറുത്തുനില്പ്പ് നടത്തുകയും ചെയ്തു. ഇതോടെ ചൈനീസ് ഭാഗത്തും വലിയതോതില് ആള്നാശമുണ്ടായി.
പൂജ്യം ഡിഗ്രി സെല്ഷ്യസിലും താഴെ, കൊടുംതണുപ്പിലാണ് ഏറ്റുമുട്ടലുണ്ടായത്. മൂന്നുമണിക്കൂറോളം സംഘര്ഷം നീണ്ടുനിന്നു. ഒട്ടേറെ ഇന്ത്യന്സൈനികര് ചൈനീസ് കസ്റ്റഡിയിലായി. ഇവരില് പലര്ക്കും ഗുരുതരമായി പരിക്കേറ്റിരുന്നു. ചൊവ്വാഴ്ച രാത്രിയോടെ ഇവരെ ഇന്ത്യക്ക് വിട്ടുകിട്ടി. ഇരുസൈന്യങ്ങളും ഗാല്വന് താഴ്വരയില്നിന്ന് പിന്മാറുകയുംചെയ്തു.
"
https://www.facebook.com/Malayalivartha
