ചൈനയുമായി ആഴ്ചകളോളം നീണ്ടുനിന്ന അതിര്‍ത്തി സംഘര്‍ഷം ഏറെ കുറെ അവസാനിച്ചിരിക്കുകയാണ്. ഇന്ത്യചൈന സൈനികര്‍ തര്‍ക്കപ്രദേശത്തു നിന്നു പിന്‍മാറി തുടങ്ങി എന്നാണ് റിപ്പോര്‍ട്ടുകള്‍ . എന്നാല്‍, ചൈനയെ ഇത്രപെട്ടെന്ന് പിന്‍മാറാന്‍ പ്രേരിപ്പിച്ച ഘടങ്ങള്‍ എന്തൊക്കെയായിരിക്കും. ദേശീയ സുരക്ഷാ ഉപദേഷ്ടാവ് അജിത് ഡോവല്‍ ചൈനീസ് വിദേശകാര്യ മന്ത്രി വാങ് യി ഞായറാഴ്ച സംസാരിച്ചതിന് മണിക്കൂറുകള്‍ക്ക് ശേഷമാണ് ഗാല്‍വാന്‍ താഴ്വരയില്‍ നിന്നും ലഡാക്കിലെ പാങ്കോംഗ് സോയില്‍ നിന്നും ചൈനീസ് സൈന്യം പിന്മാറാന്‍ തുടങ്ങിയത്. സമാധാനം പുനഃസ്ഥാപിക്കുക എന്ന ലക്ഷ്യത്തോടെയാണ് പിന്‍മാറുന്നതെന്ന് ചൈന പറഞ്ഞെങ്കിലും അത് ഇന്ത്യയുടെ വലിയ വിജയം തന്നെയാണ്. ആയുധമെടുത്ത് യുദ്ധം ചെയ്യാതെ തന്നെ ചൈനയെ അടക്കി നിര്‍ത്താന്‍ ഇന്ത്യയ്ക്ക് സാധിച്ചു.

നിരവധി അവകാശവാദങ്ങളുമായി രംഗത്തെത്തിയ ചൈനീസ് സൈന്യം ഒന്നും നേടാതെയാണ് പിന്‍വാങ്ങുന്നത്. ഇടക്കിടെ ഉണ്ടായ സംഘര്‍ഷത്തില്‍ ഇന്ത്യയേക്കാള്‍ കൂടുതല്‍ സൈനികരെയും നാശനഷ്ടവും നേരിട്ടത് ചൈനയ്ക്ക് തന്നെയാണ്. എന്നാല്‍, ഈ സംഘര്‍ഷത്തിനു തൊട്ടുപിന്നാലെ ലോകം ഒന്നടങ്കം ഇന്ത്യക്ക് പിന്നാലെ അണിനിരക്കുന്നത് കണ്ടതോടെ ചൈന ഭയന്നു. അവരുടെ സുഹൃത്തുക്കള്‍ പോലും എതിര്‍ത്തുപറയാന്‍ തുടങ്ങിയതോടെ പിന്‍മാറുകയല്ലാതെ വഴിയില്ലാതായി. ഇക്കാര്യത്തില്‍ അമേരിക്കയും റഷ്യവും ജപ്പാനും ഓസ്‌ട്രേലിയയും ഇന്ത്യയുടെ കൂടെ നിന്നതോടെ കാര്യങ്ങള്‍ കൈവിട്ടുപോകുമെന്ന് ചൈനയ്ക്കും മനസിലായിരുന്നു.

ലോകത്ത് ബെയ്ജിങ്ങിനേക്കാള്‍ കൂടുതല്‍ ചങ്ങാതിമാര്‍ ഡല്‍ഹിക്കുണ്ടെന്ന് ചൈന മനസിലാക്കിയ ദിവസങ്ങളായിരുന്നു കണ്ടത്. ലോകത്ത് ശാന്തിയും സമാധാനത്തിനും വേണ്ടി പ്രവര്‍ത്തിക്കുന്ന മികച്ച ശക്തികളെല്ലാം ഇന്ത്യയോടൊപ്പം അണിനിരന്നു. അവരില്‍ ചിലര്‍ ഐക്യരാഷ്ട്ര സുരക്ഷാ സമിതിയിലെ ശക്തരായ അംഗങ്ങളാണെന്നത് ചൈന മനസിലാക്കിയിരുന്നു.

ഇന്ത്യ-ചൈന അതിര്‍ത്തി സംഘര്‍ഷത്തില്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് നടത്തിയ പ്രതികരണം മറ്റൊരുതലത്തിലായിരുന്നു. ട്രംപിന്റെ പൂര്‍ണ പിന്തുണ ഇന്ത്യയ്‌ക്കൊപ്പമായിരുന്നു. ഇതോടൊപ്പം ദക്ഷിണ ചൈന കടലില്‍ മൂന്നു വിമാനവാഹിനി കപ്പലുകള്‍ വിന്യസിച്ച് അമേരിക്കയുടെ നിലപാട് വ്യക്തമാക്കുക കൂടി ചെയ്തു. ഇതോടെ ചൈന പരുങ്ങലിലായി.

റഷ്യയുടെ കിഴക്കന്‍ നഗരമായ വ്‌ലാഡിവോസ്റ്റോക്കിന്റെ ഉടമസ്ഥാവകാശം ചില ചൈനീസ് മാധ്യമങ്ങള്‍ അവകാശപ്പെട്ടപ്പോള്‍ റഷ്യക്കാരും ചൈനക്കാരും സോഷ്യല്‍ മീഡിയയില്‍ ഏറ്റുമുട്ടിയിരുന്നു. ഇതും ചൈനയ്ക്ക് തിരിച്ചടിയായി. റഷ്യയുടെ പിന്തുണ ഇന്ത്യയ്‌ക്കൊപ്പം നിന്നു.

റഷ്യയെ സംബന്ധിച്ചിടത്തോളം, പ്രതിരോധ മന്ത്രി രാജ്നാഥ് സിങ്ങിന്റെ മോസ്‌കോ സന്ദര്‍ശനത്തോടെ അവര്‍ പൂര്‍ണമായും ഇന്ത്യയുടെ കൂടെയായി. മിസൈലുകളും ബോംബുകളും പോര്‍വിമാനങ്ങളും വാങ്ങുന്ന കാര്യം വേഗത്തിലാക്കാന്‍ റഷ്യ സമ്മതിച്ചു, ഉഭയകക്ഷി പ്രതിരോധ ബന്ധം ശക്തമായതോടെ റഷ്യയും ഇന്ത്യയും ഒന്നായി. ഇന്ത്യയ്ക്ക് ആയുധങ്ങള്‍ വില്‍ക്കരുതെന്ന ചൈനീസ് അഭ്യര്‍ഥന റഷ്യ നിശബ്ദമായി നിരസിച്ചു.

ഇതോടൊപ്പം ജപ്പാനും റഷ്യയും ഇന്ത്യന്‍ നാവിക സേനയ്ക്ക് വേണ്ട സഹായങ്ങള്‍ ചെയ്യുമെന്നായി. ഇന്ത്യന്‍ മഹാസമുദ്രത്തില്‍ ജപ്പാനുമൊത്ത് ഇന്ത്യന്‍ നാവിക സേന നിരീക്ഷണവും പരിശീലനവും സജീവമാക്കിയതോടെ ചൈന പരുങ്ങലിലായി. ആയുധമെടുക്കാതെ വിവിധ രാജ്യങ്ങളുമായുള്ള ഇന്ത്യയുടെ നയതന്ത്രബന്ധങ്ങളാണ് ചൈനയെ അതിര്‍ത്തിയില്‍ ഓടിച്ചതെന്ന് ചുരുക്കം.

ഇതോടൊപ്പം തന്നെ ചൈനീസ് കമ്പനികള്‍ അവിടത്തെ സര്‍ക്കാരിനെതിരെ തിരിയാനും തുടങ്ങി. ഒരൊറ്റ രാത്രിയില്‍ 59 ചൈനീസ് ആപ്പുകളാണ് ഇന്ത്യ നിരോധിച്ചത്. പിന്നാലെ ചൈനീസ് ഇറക്കുമതിക്ക് വന്‍ നിയന്ത്രണമേര്‍പ്പെടുത്തി. ഇതോടെ ചൈനീസ് കമ്പനികള്‍ ഇന്ത്യ എന്ന വിപണി എന്നേക്കുമായി മറക്കേണ്ടിവരുമെന്ന സ്ഥിതി വരെ വന്നിരിക്കുകയാണ്. വരും ദിവസങ്ങളില്‍ കൂടുതല്‍ കമ്പനികളെ നിരോധിക്കുന്നത് ഒഴിവാക്കി ബിസിനസ് നിലനിര്‍ത്താനാണ് ഇപ്പോള്‍ ചൈന ആലോചിക്കുന്നത്.