കൊടുംകുറ്റവാളി വികാസ് ദുബേ കൊല്ലപ്പെട്ടതായി റിപ്പോര്‍ട്ട്. പോലീസ് കസ്റ്റഡിയില്‍ നിന്ന് രക്ഷപ്പെടാന്‍ ശ്രമിക്കുന്നതിനിടെ പേലീസ് വെടിയേറ്റ് കൊല്ലപ്പെടുകയായിരുന്നുവെന്നാണ് സൂചന. മധ്യപ്രദേശില്‍നിന്ന് വികാസിനെയും കൊണ്ട് ഉത്തര്‍ പ്രദേശിലേക്ക് പുറപ്പെട്ട മൂന്നു പോലീസ് വാഹനങ്ങളില്‍ ഒന്ന് അപകടത്തില്‍പ്പെടുകയായിരുന്നു.

വികാസ് സഞ്ചരിച്ച കാറാണ് മറിഞ്ഞത്. തുടര്‍ന്ന് വികാസ് രക്ഷപ്പെടാന്‍ ശ്രമിക്കുകയും പോലീസ് വെടിവെച്ച് വീഴ്ത്തുകയുമായിരുന്നു. ആശുപത്രിയിലെത്തിച്ച ശേഷമാണ് മരിച്ചതെന്നും റിപ്പോര്‍ട്ടുണ്ട്. പോലീസിന്റെ ഔദ്യോഗിക വിശദീകരണം പുറത്തു വന്നിട്ടില്ല. എട്ടുപോലീസുകാരെ വെടിവെച്ചു കൊന്ന സംഭവത്തിലെ മുഖ്യപ്രതിയായ വികാസിനെ വ്യാഴാഴ്ചയാണ് പോലീസ് അറസ്റ്റ് ചെയ്തത്. മധ്യപ്രദേശിലെ ഉജ്ജയിനില്‍നിന്നാണ് ഇയാളെ അറസ്റ്റ് ചെയ്തത്.