ഛത്തീസ്ഗഡില്‍ മാവോയിസ്റ്റുകളുമായുണ്ടായ ഏറ്റുമുട്ടലില്‍ പ്രത്യേക ദൗത്യസേനയിലെ ഏഴ് പൊലീസുകാര്‍ കൊല്ലപ്പെട്ടു. പരിക്കേറ്റ പത്ത് പേരില്‍ രണ്ടുപേരുടെ നില അതീവ ഗുരുതരമാണ്. പരിക്കേറ്റവരെ ഹെലികോപ്ടറില്‍ റായ്പൂരിലെ ആശുപത്രയിലേക്ക് കൊണ്ടുപോയി.
പ്‌ളാറ്റൂണ്‍ കമാന്‍ഡര്‍ ശങ്കര്‍ റാവു, ഹെഡ് കോണ്‍സ്റ്റബിള്‍മാരായ രോഹിത് സോധി, മനോജ് ഭഗേല്‍, കോണ്‍സ്റ്റബിള്‍മാരായ വി.കെ. മോഹന്‍, രാജ്കുമാര്‍ മാര്‍കം, കിരണ്‍ ദേഷ്മുഖ്, രാജ്മന്‍ ടിക്കാം എന്നിവരാണ് കൊല്ലപ്പെട്ടത്.
സുക്മ ജില്ലയിലെ ദ്രോണപാല്‍ ചിന്തഗൂഫ മേഖലയില്‍ പിദ്‌മേദ് ഗ്രാമത്തില്‍ ഇന്നലെ രാവിലെ പത്ത് മണിയോടെ യാണ് ഏറ്റുമുട്ടല്‍ നടന്നത്. പതിയിരുന്ന മാവോയിസ്റ്റുകള്‍ 61 അംഗ ദൗത്യ സംഘത്തെ ആസൂത്രിതമായി ആക്രമിക്കുകയായിരുന്നുവെന്ന് പൊലീസ് പറഞ്ഞു. തുടര്‍ന്ന് ദൗത്യസേന തിരിച്ചടിച്ചു. മാവോയിസ്റ്റ് സംഘത്തില്‍ നൂറോളം പേരുണ്ടായിരുന്നു. ഒന്നര മണിക്കൂര്‍ നീണ്ട വെടിവയ്പില്‍ മാവോയിസ്റ്റുകള്‍ ആരും കൊല്ലപ്പെട്ടില്ലെന്നാണ് അറിയുന്നത്. മരിച്ച പൊലീസുകാരുടെ ആയുധങ്ങള്‍ മാവോയിസ്റ്റുകള്‍ കൊള്ളയടിച്ചതായും റിപ്പോര്‍ട്ടുണ്ട്.
യുവ ഗോത്ര നേതാവായ ഹിദ്മ നയിക്കുന്ന മാവോയിസ്റ്റുകളുടെ രണ്ടാം ബറ്റാലിയന്റെ താവളമാണ് ഏറ്റുമുട്ടല്‍ നടന്ന പ്രദേശം. മാവോയിസ്റ്റുകളുടെ ദണ്ഡകാരണ്യ മേഖലാ കമ്മിറ്റി അംഗവുമാണ് ഹിദ്മ.
കഴിഞ്ഞകുറേ മാസങ്ങള്‍ക്കിടെയുണ്ടായ ഏറ്റവും കടുത്ത ആക്രമണമാണിത്. സി.ആര്‍.പി.എഫിന്റെ രണ്ട് ടീമുകള്‍ സ്ഥലത്തേക്ക് പുറപ്പെട്ടിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha