സാമ്പത്തിക ഭദ്രതയുള്ള മൂന്നര ലക്ഷത്തോളം പേര്‍ പാചകവാതക സബ്‌സിഡി ഉപേക്ഷിച്ചതായി പ്രധാനമന്ത്രി നരേന്ദ്ര മോദി അവകാശപ്പെട്ടു. സാമ്പത്തികശേഷിയുള്ളവര്‍ സബ്‌സിഡി ഒഴിവാക്കണമെന്ന് മുമ്പ് നടത്തിയ ആഹ്വാനത്തിന്റെ ഫലമായി ഒരാഴ്ചയ്ക്കുള്ളില്‍ തന്നെ രണ്ടു ലക്ഷത്തോളം പേര്‍ ഇതിനു തയ്യാറായത് തന്നെ ആശ്ചര്യപ്പെടുത്തിയതായി ഫ്രാന്‍സ് സന്ദര്‍ശനവേളയില്‍ പ്രവാസികളുടെ സമ്മേളനത്തെ അഭിസംബോധന ചെയ്തു കൊണ്ട് മോഡി പറഞ്ഞു. കഴിഞ്ഞ വ്യാഴാഴ്ചയോടെ ഇതിന്റെ നിരക്ക് മൂന്നര ലക്ഷമായി.

ഇത്തരത്തില്‍ മിച്ചം പിടിച്ച ധനം സര്‍ക്കാര്‍ ട്രഷറികളിലേക്ക് എടുക്കുന്നതിനു പകരം പാചകത്തിന് വിറക് ഇന്ധനമായി ഉപയോഗിക്കുന്നവര്‍ക്ക് കുറഞ്ഞ ചിലവില്‍ പാചകവാതകം ലഭ്യമാക്കാനായി ചിലവഴിക്കും. ഇത് ഒരു പരിധി വരെ വിറകിനായി മരം വെട്ടി നശിപ്പിക്കുന്നത് തടയും. വനങ്ങള്‍ സംരക്ഷിക്കപ്പെടുകയും കാലാവസ്ഥാവ്യതിയാനങ്ങളെ തടയുകയും ചെയ്യും.ജന്‍ധന്‍ സ്‌കീമിലൂടെ പതിമൂന്നു കോടി ജനങ്ങള്‍ക്ക് ബാങ്ക് അക്കൗണ്ട് ആരംഭിച്ചതിനാല്‍ ഇടനിലക്കാരുടെ ചൂഷണമില്ലാതെ സബ്‌സിഡി ലഭ്യമാക്കാന്‍ സാധിച്ചു. വികസനത്തില്‍ പിന്നാക്കം നില്‍ക്കുന്ന ബീഹാര്‍, ജാര്‍ഖണ്ഡ്, പശ്ചിമ ബംഗാള്‍, ഒഡീഷ പോലുള്ള കിഴക്കന്‍ സംസ്ഥാനങ്ങളിലാണ് സര്‍ക്കാര്‍ കൂടുതല്‍ ശ്രദ്ധ കേന്ദ്രീകരിക്കുന്നതെന്നും അദ്ദേഹം കൂട്ടിച്ചേര്‍ത്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha