പശ്ചിമ ബംഗാളിലെ ഉത്തര്‍ ദിനാജ്പുര്‍ ജില്ലയിലെ ഹെംതാബാദില്‍ നിന്നുള്ള ജനപ്രതിനിധിയെ വീടിനു സമീപം തൂങ്ങിമരിച്ച നിലയില്‍ കണ്ടെത്തി. 

ബി.ജെ.പി എം.എല്‍.എ-ആയ ദേബേന്ദ്ര നാഥ് റോയിയെയാണ് മരിച്ച നിലയില്‍ കണ്ടെത്തിയത്.

എം.എല്‍.എയുടെ കുടുംബം ഇത് കൊലപാതകമാണെന്ന് ആരോപിച്ചു. എം.എല്‍.എയുടെ അസ്വാഭാവിക മരണത്തില്‍ സി.ബി.ഐ അന്വേഷണം വേണമെന്ന് ബി.ജെ.പി ആവശ്യപ്പെട്ടു. വീടിനു സമീപമുള്ള ഷോപ്പിലെ ബാല്‍ക്കണിയില്‍ തുങ്ങിനില്‍ക്കുന്ന നിലയിലായിരുന്നു മൃതദേഹം.

സംഭവത്തില്‍ ഞെട്ടല്‍ രേഖപ്പെടുത്തിയ ബി.ജെ.പി ദേശീയ അധ്യക്ഷന്‍ ജെ.പി നദ്ദ, ഇത് ഹീനമായ കൊലപാതകമാണെന്നും ആരോപിച്ചു. മമത ബാനര്‍ജിയുടെ കീഴില്‍ ഗുണ്ടാ രാജാണ് സംസ്ഥാനത്ത് നടക്കുന്നത്. ക്രമസമാധാന നില താറുമാറായി. ഭാവിയില്‍ ഇത്തരം സര്‍ക്കാരുകളോട് ക്ഷമിക്കില്ല. സംഭവത്തെ ശക്തമായി അപലപിക്കുന്നതായും നദ്ദ പറഞ്ഞു.