തുടര്‍ച്ചയായ രണ്ടാം ദിവസവും ജമ്മു കശ്മീരില്‍ ഏറ്റുമുട്ടല്‍. ഏറ്റുമുട്ടലില്‍ മൂന്ന് ഭീകരരെ സൈന്യം വധിച്ചു. ഷോപ്പിയാനിലെ അംശിപ്പൊരയിലാണ് ഏറ്റുമുട്ടലുണ്ടായത്. പോലീസും സൈന്യവും സംയുക്തമായി നടത്തിയ തെരച്ചിലിലാണ് ഭീകരരുമായി ഏറ്റുമുട്ടലുണ്ടായത്. മേഖലയില്‍ കൂടുതല്‍ ഭീകരരുണ്ടെന്നാണ് സൂചന. പ്രദേശത്ത് ഏറ്റുമുട്ടല്‍ തുടരുകയാണെന്നാണ് റിപ്പോര്‍ട്ട്.

ജമ്മു കശ്മീരിലെ അനന്ത്നാഗ് ജില്ലയില്‍ തിങ്കളാഴ്ച രാവിലെയാണ് സുരക്ഷാസേനയും ഭീകരരും തമ്മിലുള്ള ഏറ്റുമുട്ടല്‍ ആരംഭിച്ചത്. പഹല്‍ഗാമിലെ ശ്രീഗുഫ് വാര മേഖലയിലാണ് ഏറ്റുമുട്ടല്‍ നടക്കുന്നത്. പ്രദേശത്ത് ഭീകരുടെ സാന്നിധ്യമുണ്ടെന്ന് പ്രത്യേകവിവരം ലഭിച്ചതിനെ തുടര്‍ന്ന് അനന്ത്നാഗ് പോലീസ്, 3 ആര്‍ആര്‍, സിആര്‍പിഎഫ് എന്നിവയുടെ സംഘങ്ങളടങ്ങിയ സംയുക്തസേന തിരച്ചിലാരംഭിച്ചതിനെ തുടര്‍ന്നാണ് ഏറ്റുമുട്ടലുണ്ടായതെന്ന് ഉന്നതപോലീസുദ്യോഗസ്ഥന്‍ അറിയിച്ചു.

തിരച്ചിലിനെത്തിയ സേനയ്ക്ക് നേരെ ഭീകരര്‍ വെടിവെയ്ക്കുകയായിരുന്നു. സേന തിരികെ വെടിവെച്ചതിനെ തുടര്‍ന്ന് ഏറ്റുമുട്ടല്‍ ആരംഭിക്കുകയായിരുന്നു. രണ്ടോ മൂന്നോ ഭീകരര്‍ പ്രദേശത്ത് കുടുങ്ങിയതായി സൂചനയുണ്ട്. സുരക്ഷാസേനയുമായി ഞായറാഴ്ചയുണ്ടായ ഏറ്റുമുട്ടലില്‍ മൂന്ന് ഭീകരര്‍ കൊല്ലപ്പെട്ടിരുന്നു. ലഷ്‌കര്‍-ഇ-തൊയ്ബയുമായി ബന്ധമുള്ള ഉസ്മാന്‍ എന്ന ഭീകരനാണ് ബാരാമുള്ളയിലെ സോപോര്‍ ജില്ലയിലുണ്ടായ കൊല്ലപ്പെട്ടവരില്‍ ഒരാളെന്ന് തിരിച്ചരിഞ്ഞിട്ടുണ്ട്. ഏറ്റുമുട്ടലില്‍ ഒരു സൈനികനും പ്രദേശവാസിയും കൊല്ലപ്പെട്ടു.

കഴിഞ്ഞ ദിവസം കുല്‍ഗാമിലെ നാഗാന്ദ്-ചിമ്മര്‍ മേഖലയിലും സൈന്യവും ഭീകരരും തമ്മില്‍ ഏറ്റുമുട്ടലുണ്ടായിരുന്നു. ഏറ്റുമുട്ടലില്‍ ജയ്‌ഷെ മുഹമ്മദിന്റെ മൂന്ന് ഭീകരരെയാണ് സൈന്യം വധിച്ചത്. ഇതോടെ രണ്ട് ദിവസത്തിനുള്ളില്‍ സൈന്യം വധിച്ച ഭീകരരുടെ എണ്ണം ആറായി. അതുപോലെതന്നെ ജമ്മു കശ്മീരില്‍ ഭീകരര്‍ അമര്‍നാഥ് തീര്‍ത്ഥാടകരെ ലക്ഷ്യം വെക്കുന്നതായി സൈന്യം. ദേശീയപാത 44 ന് സമീപം തീര്‍ത്ഥാടകര്‍ ആക്രമിക്കപ്പെടാന്‍ സാദ്ധ്യതയുണ്ടെന്ന് 9 രാഷ്ട്രീയ റൈഫിള്‍സ് കമാന്‍ഡര്‍ വിഎസ് താക്കൂര്‍ പറഞ്ഞു. അമര്‍നാഥ് തീര്‍ത്ഥാടനം ആരംഭിക്കാന്‍ നാല് ദിവസം മാത്രം ബാക്കി നില്‍ക്കേയാണ് മുന്നറിയിപ്പുമായി സൈനിക വൃത്തങ്ങള്‍ രംഗത്ത് എത്തുന്നത്.

അമര്‍നാഥ് തീര്‍ത്ഥാടകരെ ഭീകരര്‍ ലക്ഷ്യം വയ്ക്കുന്നതായി ഇന്റലിജന്‍സ് ഏജന്‍സികള്‍ വിവരം നല്‍കിയിട്ടുണ്ട്. അമര്‍നാഥ് തീര്‍ത്ഥാടനം സുഗമമായി നടത്തേണ്ടത് സൈന്യത്തിന്റെ കടമയാണ്. അമര്‍നാഥ് യാത്ര യാതൊരു തടസ്സവും കൂടാതെ സമാധാനപരമായി നടക്കുമെന്നും താക്കൂര്‍ അറിയിച്ചു. ദേശീയപാത 44 പ്രത്യേക ജാഗ്രത പുലര്‍ത്തേണ്ട സ്ഥലമാണ്. വടക്കന്‍ പ്രദേശങ്ങളിലേക്കായി കൂടുതല്‍ യാത്രക്കാരും സ്വീകരിക്കുന്ന വഴിയാണ് ഇത്. ഇതുവഴിയുള്ള യാത്ര തടസ്സപ്പെടുത്താന്‍ ഭീകരര്‍ പദ്ധതിയിട്ടിട്ടുണ്ടെന്നാണ് ലഭിച്ച ഇന്റലിജന്‍സ് വിവരം. വിവരത്തിന്റെ അടിസ്ഥാനത്തില്‍ ആവശ്യമായ നടപടികള്‍ സൈന്യം സ്വീകരിച്ചിട്ടുണ്ട്.

വെള്ളിയാഴ്ച കുല്‍ഗാമില്‍ ഇന്ന് മൂന്ന് ഭീകരരെ സൈന്യം വധിച്ചിട്ടുണ്ട്. അമര്‍നാഥ് തീര്‍ത്ഥാടനം ആരംഭിക്കാന്‍ ഇരിക്കേ ഇത് വലിയ കാര്യമാണെന്നും അദ്ദേഹം വ്യക്തമാക്കി.