സര്‍ക്കാരിനുള്ള പിന്തുണ പിന്‍വലിച്ച പ്രാദേശിക പാര്‍ട്ടിയുടെ എംഎല്‍എമാര്‍ വീണ്ടും പിന്തുണ പ്രഖ്യാപിച്ച സാഹചര്യത്തില്‍ രാജസ്ഥാന്‍ മുഖ്യമന്ത്രി ഗവര്‍ണര്‍ കല്‍രാജ് മിശ്രയെ ശനിയാഴ്ച രാത്രി സന്ദര്‍ശിച്ചു. കോവിഡ് മഹാമാരിയുടെ പശ്ചാത്തലത്തില്‍ സംസ്ഥാനം സ്വീകരിച്ച നടപടികളെക്കുറിച്ചു ധരിപ്പിക്കാനായിരുന്നു സന്ദര്‍ശനം എന്നാണ് ഗവര്‍ണറുടെ ഓഫിസ് പുറത്തുവിട്ട വാര്‍ത്താക്കുറിപ്പില്‍ പറയുന്നത്.
വിശ്വാസവോട്ട് തേടണമെന്ന ബിജെപിയുടെ ആവശ്യം വര്‍ധിച്ചുവരുന്ന സാചര്യത്തില്‍ തന്നെ പിന്തുണയ്ക്കുന്ന എംഎല്‍എമാരുടെ പട്ടികയും 45 മിനിറ്റ് നീണ്ടുനിന്ന കൂടിക്കാഴ്ചയില്‍ ഗെലോട്ട് ഗവര്‍ണര്‍ക്കു കൈമാറിയെന്നാണ് സൂചന. അടുത്ത ബുധനാഴ്ച നിയമസഭാ സമ്മേളനം വിളിച്ചുചേര്‍ക്കുമെന്നും റിപ്പോര്‍ട്ടുണ്ട്. ഇത്തവണ വിശ്വാസം നേടിയാല്‍ പിന്നെ ആറു മാസത്തേക്ക് സര്‍ക്കാരിനു ഭീഷണിയുണ്ടാകില്ല.

ആ സമയം കൊണ്ട് പാര്‍ട്ടിയില്‍ തനിക്കെതിരെ ഉയരുന്ന വിമത സ്വരങ്ങളെ നിലയ്ക്കു നിര്‍ത്താനാകുമെന്നാണു ഗെലോട്ടിന്റെ വിലയിരുത്തല്‍. സച്ചിന്‍ പൈലറ്റ് വിമതസ്വരം ഉയര്‍ത്തിയതിനു പിന്നാലെയാണ് കോണ്‍ഗ്രസിനെ പിന്തുണയ്ക്കുന്ന ബിടിപിയുടെ രണ്ട് എംഎല്‍എമാര്‍ പിന്തുണ പിന്‍വലിച്ചത്. ഇപ്പോള്‍ ഇവര്‍ വീണ്ടും കോണ്‍ഗ്രസ് ക്യാംപില്‍ എത്തി.

ഗെലോട്ടിനെ പിന്തുണയ്ക്കുന്ന എംഎല്‍എമാരുടെ കൃത്യ എണ്ണം പുറത്തുവിട്ടില്ലെങ്കിലും ഏതു പ്രതിസന്ധിയെയും തരണം ചെയ്ത് ശക്തി തെളിയിക്കാനുള്ള കരുത്ത് മുഖ്യമന്ത്രിക്കുണ്ടെന്ന് കോണ്‍ഗ്രസ് നേതാവിനെ ഉദ്ധരിച്ച് ദേശീയ മാധ്യമങ്ങള്‍ റിപ്പോര്‍ട്ട് ചെയ്തു. നിയമസഭാ യോഗത്തില്‍ പങ്കെടുക്കാതിരിക്കുകയോ വിപ്പ് ലംഘിക്കുകയോ ചെയ്താല്‍ സച്ചിന്‍ പൈലറ്റിനും വിമത എംഎല്‍എമാര്‍ക്കുമെതിരെ കടുത്ത നടപടിയുണ്ടാകുമെന്നും നേതാവ് വ്യക്തമാക്കി.

പൈലറ്റും 18 വിമത എംഎല്‍എമാരും ഉള്‍പ്പെടെ 107 പേരാണ് കോണ്‍ഗ്രസിനുള്ളത്. 200 അംഗ സഭയില്‍ കേവല ഭൂരിപക്ഷമായ 101 അംഗങ്ങളുടെയധികം പിന്തുണ ഗെലോട്ടിനുണ്ടെന്നും ഈ അംഗങ്ങളുടെ പട്ടികയാണ് ഗവര്‍ണര്‍ക്കു കൈമാറിയതെന്നും അദ്ദേഹത്തോട് അടുത്ത വൃത്തങ്ങള്‍ സൂചിപ്പിക്കുന്നു. അയോഗ്യതാ നോട്ടിസ് നല്‍കിയതിനെത്തുടര്‍ന്ന് ഹൈക്കോടതിയില്‍ പോയ പൈലറ്റിനെയും വിമത എംഎല്‍എമാരെയും സമ്മര്‍ദത്തിലാക്കാനും നിയമസഭ വിളിച്ചുചേര്‍ക്കുന്നതിലൂടെ ഗെലോട്ട് ലക്ഷ്യമിടുന്നു.അതേസമയം കോടതിയിലും പുറത്തുമായി തുടരുന്ന രാഷ്ട്രീയ പോരില്‍ ഇതുവരെ പുറകില്‍ നിന്ന് കളിച്ച ബിജെപി ചിത്രത്തിലേക്ക് വരികയാണ്. രാജസ്ഥാന്‍ കോണ്‍ഗ്രസ് സര്‍ക്കാര്‍, കേന്ദ്രമന്ത്രിയുടെയും വിമത എംഎല്‍എമാരുടേയും ഫോണ്‍ ചോര്‍ത്തിയെന്ന ആരോപണം രാജസ്ഥാന്‍ രാഷ്ട്രീയത്തില്‍ കോളിളക്കം സൃഷ്ടിക്കുന്നതിനിടെയാണ് ബിജെപിയുടെ പുതിയ നീക്കം.ഗെലോട്ട് സര്‍ക്കാരിനെ താഴെയിറക്കാന്‍ നടന്ന ഗൂഢാലോചനയെ കുറിച്ച് കേന്ദ്ര മന്ത്രിക്കെതിരെ കേസെടുത്ത് രാജസ്ഥാന്‍ സ്‌പെഷ്യല്‍ ഓപ്പറേഷന്‍ ഗ്രൂപ്പ് അന്വേഷണം നടത്തുന്നതിനിടെയാണ് രാജസ്ഥാന്‍ കോണ്‍ഗ്രസ് സര്‍ക്കാര്‍,

കേന്ദ്രമന്ത്രിയുടെയും വിമത എംഎല്‍എമാരുടേയും ഫോണ്‍ ചോര്‍ത്തിയെന്ന ആരോപണത്തില്‍ ചീഫ് സെക്രട്ടറിയോട് . കേന്ദ്ര ആഭ്യന്തരമന്ത്രാലയം റിപ്പോര്‍ട്ട് തേടിയത്. വിമത എംഎല്‍എമാരുടെയും കേന്ദ്ര മന്ത്രി ഗജേന്ദ്ര ശെഖാവത്തിന്റെയും ശബ്ദരേഖ ഇന്നലെയാണ് കോണ്‍ഗ്രസ് പുറത്തുവിട്ടത്.നിയമവിരുദ്ധമായാണ് കേന്ദ്ര മന്ത്രിയുടെ ഫോണ്‍ ചോര്‍ത്തിയതെന്നാണ് ബിജെപി ആരോപണം. കേന്ദ്രമന്ത്രിയുടെ ഫോണ്‍ ചോര്‍ത്തലില്‍ സിബിഐ അന്വേഷണം വേണമെന്ന് ബിജെപി ആവശ്യപ്പെട്ടിരുന്നു. അശോക് ഗെലോട്ട് സര്‍ക്കാര്‍ നേരിടുന്ന പ്രതിസന്ധി കോണ്‍ഗ്രസ് ഹൈക്കമാന്റിന്റെ പരാജയമാണെന്നും ബിജെപി ആരോപിക്കുന്നു.