രാജസ്ഥാനില്‍ സംസ്ഥാന സര്‍ക്കാരിനെ അട്ടിമറിക്കാന്‍ ശ്രമിച്ചെന്ന് ആരോപിച്ച് കേന്ദ്രമന്ത്രി ഗജേന്ദ്ര ശെഖാവത്തിനെതിരെ കേസെടുത്താണ് ഗെഹ് ലോട്ട് സര്‍ക്കാര്‍ പ്രതികരിച്ചത്. എന്നാല്‍ അതേസമയം കേന്ദ്രമന്ത്രിയുടെ ടെലിഫോണ്‍ ചോര്‍ത്തിയ വിഷയത്തില്‍ സി.ബി.ഐ അന്വേഷണത്തിന് കേന്ദ്രത്തിന്റെ നീക്കം. കേന്ദ്ര ആഭ്യന്തരമന്ത്രി അമിത് ഷാ ഇതുസംബന്ധിച്ച് സി.ബി.ഐക്ക് നിര്‍ദേശം നല്‍കിയതായിയാണ് സൂചന. കേന്ദ്രമന്ത്രി ഗജേന്ദ്ര ശെഖാവ് ഉള്‍പ്പെടെയുള്ളവരുടെ ഫോണ്‍ ചോര്‍ത്തലില്‍ നിന്നുമാണ് കോണ്‍ഗ്രസിന് ബി.ജെ.പിയുടെ അട്ടിമറി നീക്കം മനസിലാക്കാന്‍ സാധിച്ചതും അതിന് തടയിടാന്‍ സാധിച്ചതും. എന്നാല്‍ കേന്ദ്ര ആഭ്യന്തരമന്ത്രാലത്തിന്റെ അനുമതിയില്ലാതെ ഒരു കേന്ദ്രമന്ത്രിയുടെ ഫോണ്‍ ചോര്‍ത്തിയത് കടുത്ത അച്ചടക്ക നടപടിയാണ്. ഇതാണ് ഇപ്പോള്‍ കേന്ദ്രം ആയുധമാക്കുന്നത്.

കേന്ദ്രമന്ത്രി ഇടപെട്ട് സര്‍ക്കാറിനെ അട്ടിമറിക്കാന്‍ ശ്രമിച്ചതിനെതിരെ കടുത്ത പ്രതിഷേധത്തിലാണ് കോണ്‍ഗ്രസ്. മന്ത്രി രാജിവയ്ക്കണമെന്ന് കേണ്‍ഗ്രസ് നേതാവ് അജയ് മാക്കന്‍ ആവശ്യപ്പെട്ടു. അല്ലാത്ത പക്ഷം മന്ത്രിയെ പുറത്താക്കാന്‍ കേന്ദ്ര സര്‍ക്കാര്‍ തയ്യാറാവണമെന്നും ഗജേന്ദ്ര ശെഖാവത്തിന് മന്ത്രിയായി തുടരാന്‍ അര്‍ഹതയില്ലെന്നും അജയ് മാക്കന്‍ പറഞ്ഞു. സംസ്ഥാന സര്‍ക്കാറിനെ അട്ടിമറിക്കാന്‍ കൈക്കൂലി നല്‍കാന്‍ ശ്രമിച്ചെന്ന് ആരോപിച്ച് ഗജേന്ദ്ര സിംഗ് ഷെഖാവത്തിനെതിരെ അഴിമതി വിരുദ്ധ നിയമപ്രകാരവും കേസെടുത്തു.

രാജസ്ഥാനില്‍ സമവായം ഉണ്ടായാലും സച്ചിന്‍ പൈലറ്റിനെ മന്ത്രിസഭയില്‍ തിരിച്ചുകൊണ്ടുവരാനാവില്ലെന്ന് സൂചിപ്പിച്ച് കോണ്‍ഗ്രസ് നേതാക്കള്‍ രംഗത്ത് വന്നിട്ടുണ്ട്. നിയമസഭ വിളിച്ച് വിശ്വാസ വോട്ടെടുപ്പ് നടത്താനുള്ള തയ്യാറെടുപ്പ് കോണ്‍ഗ്രസ് തുടങ്ങി. വിമത എംഎല്‍എമാര അറസ്റ്റ് ചെയ്യാന്‍ രാജസ്ഥാന്‍ പോലീസ് സ്പീക്കറുടെ അനുമതി തേടി. അശോക് ഗലോട്ട് ഇന്നലെ ഗവര്‍ണര്‍ക്ക് കൈമാറിയത് 102 എംഎല്‍എമാരുടെ പട്ടികയാണ്. നേരിയ ഭൂരിപക്ഷമേ ഉള്ളൂ എന്ന് ഇതില്‍ നിന്ന് വ്യക്തമാകും. ഈ പട്ടികയില്‍ സഖ്യകക്ഷിയായ ബി.ടി.പിയുടെ അംഗങ്ങളും സ്വതന്ത്രരുമുണ്ട്. സര്‍ക്കാരിന്റെ സ്ഥിരതയ്ക്ക് സച്ചിന്‍ പൈലറ്റിന്റെ ഒപ്പമുള്ളവരെ കൂടി തിരിച്ചെത്തിക്കണം. 19 പേര്‍ സച്ചിനൊപ്പം ഉറച്ചു നില്‍ക്കുകയാണ്.

സച്ചിന്‍ നല്‍കിയ ഹര്‍ജിയില്‍ നാളെ രാജസ്ഥാന്‍ കോടതി സ്വീകരിക്കുന്ന നിലപാടനുസരിച്ച് നിയമസഭ വിളിച്ചു ചേര്‍ക്കും. പ്രിയങ്ക ഗാന്ധി, സച്ചിന്‍ പൈലറ്റുമായി സംസാരിക്കുന്നുണ്ട്. മുഖ്യമന്ത്രിയാക്കണമെന്ന നിലപാടില്‍ മാറ്റമില്ലെന്ന് സച്ചിന്‍ അറിയിച്ചതായാണ് വിവരം. ഉപമുഖ്യമന്ത്രിസ്ഥാനം പോലും വീണ്ടും നല്കാന്‍ കഴിയില്ലെന്ന് കോണ്‍ഗ്രസ് പറയുന്നു. അശോക് ഗലോട്ടും വിട്ടുവീഴ്ചയില്ലാത്ത നിലപാടിലാണ്. സച്ചിനൊപ്പമുള്ള എംഎല്‍എമാരെ അറസ്റ്റ് ചെയ്യാന്‍ രാജസ്ഥാന്‍ പോലീസ് സ്പീക്കറുടെ അനുമതി തേടി.