രാജ്യതലസ്ഥാനത്തിന് വന്‍ ഭീതി വിതച്ച കൊവിഡ് രോഗബാധിതരുടെ എണ്ണം കുറയുന്നതായാണ് ഏറ്റവും പുതിയ കണക്കുകള്‍ വ്യക്തമാക്കുന്നത്. കഴിഞ്ഞ 24 മണിക്കൂറിനിടെ ഇവിടെ 1211 പേര്‍ക്കാണ് കൊവിഡ് സ്ഥിരീകരിച്ചത്. നേരത്തെ രണ്ടായിരത്തിലേറെ പേര്‍ക്ക് പ്രതിദിനം രോഗം സ്ഥിരീകരിച്ച നിലയില്‍ നിന്നാണ് രോഗബാധിതരുടെ എണ്ണം ഇന്നത്തെ നിലയിലേക്ക് എത്തിയത്.

വളരെ പ്രതീക്ഷയോടെയാണ് സംസ്ഥാനത്തെ സാഹചര്യം വിലയിരുത്തപ്പെടുന്നത്. ദില്ലിയില്‍ ഇന്നത്തേതടക്കം ആകെ കൊവിഡ് പോസിറ്റീവായവരുടെ എണ്ണം 1,22,793 ആയി. കഴിഞ്ഞ 24 മണിക്കൂറിനിടെ 31 കൊവിഡ് ബാധിതര്‍ കൂടി മരിച്ചു. ഇതോടെ കൊവിഡ് ബാധിച്ച് മരിച്ചവരുടെ എണ്ണം 3628 ആയി. നിലവില്‍ ചികിത്സയില്‍ 16,031 പേരാണ് കൊവിഡ് ബാധിച്ച് ചികിത്സയില്‍ കഴിയുന്നത്.
രാജ്യത്ത് കോവിഡ് മരണ നിരക്കില്‍ വലിയ കുറവുണ്ടാകുന്നതായി കേന്ദ്ര ആരോഗ്യ മന്ത്രാലയം വ്യക്തമാക്കുന്നു. ഇപ്പോള്‍ ഇന്ത്യയില്‍ 2.49 ശതമാനമാണ് മരണനിരക്കെന്നും ഇത് ലോകത്തിലെതന്നെ ഏറ്റവും കുറഞ്ഞ മരണനിരക്കുകളില്‍ ഒന്നാണെന്നും മന്ത്രാലയം അറിയിപ്പില്‍ പറഞ്ഞു.
രോഗബാധ സ്ഥിരീകരിക്കുന്നവര്‍ക്ക് ആശുപത്രികളില്‍ ലഭിക്കുന്ന മികച്ച ചികിത്സയാണ് ഇതിന് കാരണമെന്നും മന്ത്രാലയം പറയുന്നു. രാജ്യത്തെ 29 സംസ്ഥാനങ്ങളിലും കേന്ദ്രഭരണപ്രദേശങ്ങളിലും മരണ നിരക്ക് ദേശീയ ശരാശരിയേക്കാള്‍ കുറവാണ്. ഇവയില്‍ തന്നെ മണിപ്പുര്‍, നാഗാലാന്റ്, സിക്കിം, മിസോറം, ആന്തമാന്‍നിക്കോബാര്‍ ദ്വീപുകള്‍ എന്നീ സംസ്ഥാനങ്ങളില്‍ മരണനിരക്ക് പൂജ്യമാണ്.
തൊട്ടുപിന്നില്‍ കേരളം, ത്രിപുര, അസം എന്നിവയടക്കം 14 സംസ്ഥാനങ്ങളില്‍ മരണനിരക്ക് ഒരു ശതമാനത്തില്‍ താഴെയാണെന്നും മന്ത്രാലയം അറിയിപ്പില്‍ പറയുന്നു. തുടക്കത്തില്‍ 2.82 ശതമാനമായിരുന്ന ഇന്ത്യയിലെ കോവിഡ് മരണനിരക്ക് കഴിഞ്ഞ മാസത്തോടെ 2.72 ശതമാനമായി കുറയുകയായിരുന്നു.
ഈ മാസം 10 ഓടെ അത് വീണ്ടും 2.49 ശതമാനമായി കുറഞ്ഞു. രോഗം ബാധിച്ചവര്‍ക്ക് മികച്ച രീതിയിലുള്ള ചികിത്സ ലഭ്യമാക്കുന്നതില്‍ കേന്ദ്രവും സംസ്ഥാന സര്‍ക്കാരുകളും ചേര്‍ന്നുള്ള പ്രവര്‍ത്തനത്തിന്റെ ഫലമായാണ് ഇത് സാധിച്ചത്. അതേപോലെ തന്നെ കാര്യക്ഷമമായ കണ്ടെയ്ന്‍മെന്റ് നടപടികള്‍, വ്യാപകമായ പരിശോധന, സമഗ്രവും നിലവാരം ഉറപ്പുവരുത്തിക്കൊണ്ടുള്ളതുമായ ചികിത്സാ പദ്ധതികള്‍ എന്നിവ ഉറപ്പാക്കിയതുമൂലമാണ് മരണനിരക്ക് ഇത്രയധികം കുറയ്ക്കാനായത്.എന്നും മന്ത്രാലയം വ്യക്തമാക്കി.