കണ്‍ട്രോളര്‍ ആന്‍ഡ് ഓഡിറ്റര്‍ ജനറല്‍ (സിഎജി) പ്രിന്‍സിപ്പല്‍ ഡയറക്ടര്‍ ശാരദ സുബ്രഹ്മണ്യത്തെ പിരിച്ചു വിട്ടു. അഴിമതി ആരോപണങ്ങളുടെ പശ്ചാത്തലത്തില്‍ 2 മാസം മുന്‍പാണ് പിരിച്ചുവിട്ടത്. മേയ് 19-ന് ധനമന്ത്രാലയം ഇവരെ പിരിച്ചുവിടാന്‍ നല്‍കിയ ഉത്തരവിന്റെ വിവരം ഇപ്പോഴാണു പുറത്തുവന്നത്.

കോഫി ബോര്‍ഡ് ഫിനാന്‍സ് ഡയറക്ടറായിരിക്കെ കോടികള്‍ മ്യൂച്വല്‍ ഫണ്ടുകളില്‍ സ്വന്തം പേരില്‍ നിക്ഷേപിച്ചതിന്റെ പേരില്‍ ഇവര്‍ക്കെതിരെ സിബിഐ കേസുണ്ടായിരുന്നു. 91 ബാച്ച് ഇന്ത്യന്‍ ഓഡിറ്റ് ആന്‍ഡ് അക്കൗണ്ട്‌സ് സര്‍വീസ് ഉദ്യോഗസ്ഥയാണ്. യുപിഎസ്സി നടത്തിയ അന്വേഷണത്തിലും ഇവര്‍ ഗുരുതരമായ അഴിമതി നടത്തിയതായി കണ്ടെത്തിയതിനെത്തുടര്‍ന്നാണു ശിക്ഷാ നടപടി. ആരോപണങ്ങള്‍ക്ക് 250 പേജുള്ള മറുപടി ശാരദ സുബ്രഹ്മണ്യം നല്‍കിയിരുന്നു.

എന്നാല്‍ സിഎജിയും യുപിഎസ്സിയും ധനമന്ത്രാലയവും ആരോപണങ്ങളില്‍ വസ്തുതയുണ്ടെന്ന് കണ്ടെത്തി. ഇവര്‍ക്കെതിരെ കടുത്ത ശിക്ഷാനടപടികള്‍ ചട്ടങ്ങള്‍ പ്രകാരം എടുക്കാമെന്നു സിഎജി 2018-ല്‍ റിപ്പോര്‍ട്ട് നല്‍കിയിരുന്നു. ഇതിനെതിരെ ശാരദ സെന്‍ട്രല്‍ അഡ്മിനിസ്‌ട്രേറ്റീവ് ട്രൈബ്യൂണലിനെ സമീപിച്ചിരുന്നു. എന്നാല്‍ യുപിഎസ്സി അടക്കം ക്രമക്കേടുകള്‍ ശരിവച്ചതിനാല്‍ ഇടക്കാല ഉത്തരവു നല്‍കാന്‍ സിഎടി തയാറായില്ല. ശാരദയുടെ ഹര്‍ജി ഇപ്പോഴും സിഎടിയുടെ പരിഗണനയിലാണ്.

ബെംഗളൂരുവില്‍ കോഫി ബോര്‍ഡ് ഫിനാന്‍സ് ഡയറക്ടറായിരിക്കവെ ബെംഗളൂരു ഡവലപ്‌മെന്റ് അതോറിറ്റിയുടെ 2900 കോടി രൂപ കോഫിബോര്‍ഡ്, ബെംഗളൂരു മെട്രോ റെയില്‍ കോര്‍പറേഷന്‍, ചില മ്യൂച്വല്‍ ഫണ്ടുകള്‍ എന്നിവയിലേക്ക് വ്യക്തിപരമായി വകമാറ്റിയെന്നാണ് ആരോപണം. കോഫിബോര്‍ഡിന്റെ 16.2 കോടിയുടെ അധിക ഫണ്ട് വകമാറ്റി. 2002-ല്‍ ഫിനാന്‍സ് ഡയറക്ടറുടെ പേരില്‍ 1.04 കോടി രൂപ ഒരു മ്യൂച്വല്‍ ഫണ്ടില്‍ നിക്ഷേപിച്ചതായി അന്വേഷണത്തില്‍ കണ്ടെത്തിയിരുന്നു.

ശാരദയുടെ ഭര്‍ത്താവ് സന്ദീപ് ദാസിനെ ബെംഗളൂരു ഡവലപ്‌മെന്റ് അതോറിറ്റിയുടെ ഫണ്ടുകളില്‍ തിരിമറി നടത്തിയതിന് ഇന്ത്യന്‍ സിവില്‍ അക്കൗണ്ട്‌സ് സര്‍വീസില്‍ നിന്നു 2015-ല്‍ പിരിച്ചുവിട്ടിരുന്നു.

ബാങ്കിങ് മേഖലയിലെയും ഓഹരി വിപണിയിലെയും ചിലരുടെ കള്ളക്കളികളുടെ ഇരയാണു താനെന്നു ശാരദ മാധ്യമങ്ങളോടു പറഞ്ഞു. പിരിച്ചുവിടല്‍ നടപടി കോടതിയില്‍ ചോദ്യംചെയ്യുമെന്നും പറഞ്ഞു.