രാജ്യത്ത് കോവിഡ് സംബന്ധമായ മരണനിരക്ക് മറ്റു രാജ്യങ്ങളെ അപേക്ഷിച്ചു കുറവെന്ന് കണക്കുകള്‍. 2.49% ആണ് രാജ്യത്തെ മരണനിരക്ക്. ആദ്യമായാണു മരണ നിരക്ക് 2.5 ശതമാനത്തിനു താഴെയാവുന്നത്. എങ്കിലും രോഗികളുടെ എണ്ണം ക്രമാതീതമായി ഉയരുകയാണെന്നും ഇപ്പോഴത്തെ നില തുടര്‍ന്നാല്‍ സെപ്റ്റംബര്‍ പകുതിയോടെ രോഗികളുടെ എണ്ണം പെരുകുമെന്നും ആരോഗ്യ വിദഗ്ധര്‍ മുന്നറിയിപ്പു നല്‍കി.

ദേശീയ ശരാശരിയെക്കാള്‍ കുറഞ്ഞ മരണ നിരക്കാണ് 29 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമുള്ളത്. കേരളത്തില്‍ 0.34%. രാജ്യത്ത് 7 ലക്ഷത്തിലേറെപ്പേര്‍ രോഗമുക്തരായി. 1,37,91,869 സാംപിളുകള്‍ പരിശോധിച്ചു.

ഇപ്പോള്‍ നഗരങ്ങളില്‍ മാത്രം വ്യാപിച്ചിരിക്കുന്ന വൈറസ് ഗ്രാമങ്ങളിലേക്കെത്തുന്നത് ഗുരുതരമായ അവസ്ഥയുണ്ടാക്കും. കൃത്യമായ നടപടികളിലൂടെ അതു തടയണം. രാജ്യം സമൂഹവ്യാപന ഘട്ടത്തോട് അടുത്തുവെന്നാണ് സൂചനകള്‍. ഇന്ത്യയില്‍ കോവിഡ് വ്യാപനം പരമോന്നതി ആയിട്ടില്ലെന്നും ആരോഗ്യവിദഗ്ധര്‍ പറയുന്നു. ഓരോ സംസ്ഥാനത്തും രോഗികളുടെ എണ്ണം പരമാവധിയിലെത്തുന്നതു വ്യത്യസ്ത സമയങ്ങളിലായിരിക്കാം.

ലോക്ഡൗണ്‍ ഇളവുകള്‍ നല്‍കിയതോടൊപ്പം വീടുകള്‍ തോറും പരിശോധനകള്‍ വര്‍ധിപ്പിച്ചിരുന്നുവെങ്കില്‍ ഇപ്പോഴത്തെ അപകടാവസ്ഥ തടയാമായിരുന്നുവെന്നാണു പബ്ലിക് ഹെല്‍ത്ത് ഫൗണ്ടേഷന്‍ അധികൃതരുടെ അഭിപ്രായം.