സ്​കൂൾ വിദ്യാർഥിനിയെ കൂട്ടബലാത്സംഗം ചെയ്​തു കൊലപ്പെടുത്തിയ സംഭവത്തിൽ ബംഗാളിൽ വൻ പ്രതിഷേധം. സമരാനുകൂലികൾ കൊൽക്കത്തയെ സിലിഗുരിയുമായി ബന്ധിപ്പിക്കുന്ന ദേശീയപാത 31ൽ വാഹനങ്ങൾ തടഞ്ഞ് തീയിട്ടു.

കൊൽക്കത്തയിൽ നിന്ന്​ 500 കിലോമീറ്റർ അകലെ ചോപ്രായിലാണ്​ ഇത്തരത്തിലൊരു സംഭവം അരങ്ങേറിയത്. പ്രതിഷേധക്കാരെ പിരിച്ചുവിടാനായി ​പൊലീസ്​ ലാത്തിവീശുകയും കണ്ണീർ വാതകം പ്രയോഗിക്കുകയും ചെയ്​തു. അതേസമയം ഞായറാഴ്​ച ഉച്ചക്ക്​ ശേഷം ആരംഭിച്ച പ്രതിഷേധത്തിനിടെ മൂന്നു ബസുകളും ഒരു പൊലീസ്​ വാഹനവും പ്രദേശവാസികൾ അഗ്​നിക്കിരയാക്കിയിരുന്നു.

പത്താംക്ലാസ്​ വിദ്യാർഥിനിയെ കാണാതായതിനെ തുടർന്ന്​ വീട്ടുകാർ ​തിരയുന്നതിനിടെ മരക്കൊമ്പിൽ കെട്ടിത്തൂക്കിയ നിലയിൽ മൃതദേഹം കണ്ടെത്തുകയായിരുന്നു. പെൺകുട്ടിയെ കൂട്ടബലാത്സംഗത്തിന്​ ശേഷം കൊലപ്പെടുത്തിയതാണെന്ന്​ പ്രദേശവാസികൾ ആരോപിച്ചു. പ്രദേശത്തുനിന്ന്​ രണ്ടു സൈക്കിളും മൊബൈൽ ഫോണുകളും കണ്ടെടുത്തു. ഇവ പൊലീസിന്​ കൈമാറി. അതേസമയം പോസ്​റ്റ്​മോർട്ടം റിപ്പോർട്ടിൽ പെൺകുട്ടിയുടെ മരണം വിഷം ഉള്ളിൽ ചെന്നത്​ മൂലമാണെന്നും ശരീരത്തിൽ മുറിവുകളോ മറ്റു പാടുകളോ ഇല്ലെന്നും​ ​പൊലീസ്​ അറിയിച്ചു.