തലസ്ഥാനത്തെ ഡിപ്ലോമാറ്റിക് ബാഗേജ് വഴിയുള്ള സ്വര്‍ണ്ണക്കടത്ത് കേസില്‍ യുഎഇ കൗണ്‍സുലേറ്റിന്റെ ഇടപെടല്‍ വളരെ ഗൗരവകരമായ രീതിയിലാണ് എന്ന് കണ്ടെത്തിയതോടെ. ചില കാര്യങ്ങളില്‍ അതായത് കൗണ്‍സുലേറ്റലെ ഉദ്യോഗസ്ഥരുടെ സുരക്ഷാ കാര്യങ്ങളില്‍ സംസ്ഥാനം അവിശുദ്ധ ഇടപെടല്‍ നടത്തി എന്നും തെളിയുന്നുണ്ട് അത് ഒരിക്കലും നടക്കാന്‍ പാടില്ലാത്തതാണ്. അതുകൊണ്ടുതന്നെ വിദേശകാര്യമന്ത്രാലയത്തെ അറിയിക്കാതെ മറ്റൊരു കോണ്‍സുലേറ്റിനും നല്‍കാത്ത പരിഗണന ഡി.ജി.പി. ലോക്‌നാഥ് ബെഹ്‌റ യു.എ.ഇ. കോണ്‍സുലേറ്റിനു നല്‍കിയതില്‍ കേന്ദ്രം ദുരൂഹത ആരോപിക്കുന്നതും. സംഭവത്തില്‍ ഗൗരവമുള്ള ഇടപെടല്‍ ഉണ്ടായിട്ടുണ്ടെന്നു ബോധ്യപ്പെട്ടാല്‍ കേന്ദ്രം ചീഫ് സെക്രട്ടറിയോട് വിശദീകരണം തേടും. ഇതും എന്‍ഐഎയുടെ അന്വേഷണപരിധിയില്‍ ഉള്‍പ്പെടുത്തും.

ഓരോ സംസ്ഥാനത്തുമെത്തുന്ന നയതന്ത്ര പ്രതിനിധികള്‍ക്ക് എന്തൊക്കെ സഹായം ചെയ്യണമെന്ന് കൃത്യമായി കേന്ദ്ര വിദേശകാര്യ മന്ത്രാലയം നിര്‍ദേശിക്കാറുണ്ട്. എല്ലാവരെയുെ അതിഥിയായിക്കണ്ട് സ്വീകരിക്കണമെന്നതാണ് പൊതുരീതി എങ്കിലും അതിനെല്ലാം ലിമിറ്റേഷനുകളുണ്ട്. മുമ്പൊരിക്കല്‍ പാകിസ്താന്‍ അംബാസഡര്‍ കേരളത്തിലെത്തിയപ്പോള്‍ വാഹനമൊരുക്കാന്‍ കൂലിവാങ്ങണമെന്ന നിര്‍ദേശമാണ് വിദേശകാര്യ മന്ത്രാലയം സര്‍ക്കാരിനു നല്‍കിയത്. കഴിഞ്ഞ യു.ഡി.എഫ്. സര്‍ക്കാരിന്റെകാലത്താണ് പാകിസ്താന്‍ അംബാസഡര്‍ അഞ്ചുദിവസത്തെ കേരളസന്ദര്‍ശനത്തിനെത്തിയത്. ആവശ്യമായ സുരക്ഷ നല്‍കണമെന്ന് കേന്ദ്രം നിര്‍ദേശിച്ചു.

വാഹനസൗകര്യം ഉറപ്പാക്കണമെന്നായിരുന്നു അംബാസഡറുടെ ഒരാവശ്യം. ഇത് സര്‍ക്കാര്‍ വിദേശകാര്യ മന്ത്രാലയത്തിന്റെ ശ്രദ്ധയില്‍പ്പെടുത്തി. സ്വകാര്യ വാഹനങ്ങള്‍ ഏര്‍പ്പെടുത്തിക്കൊടുക്കാമെന്നായിരുന്നു മറുപടി. ഇതിന്റെ കൂലി സര്‍ക്കാര്‍ വഹിക്കരുതെന്നും അംബാസഡറില്‍നിന്ന് ഈടാക്കാമെന്നും കേന്ദ്രം അറിയിച്ചു. ഇതിനൊപ്പം, സര്‍ക്കാര്‍വാഹനം ഒരുകാരണവശാലും വിട്ടുനല്‍കരുതെന്നും നിര്‍ദേശംനല്‍കി. ഇന്ത്യയുമായി നല്ലബന്ധത്തിലായിരുന്ന മലേഷ്യയിലെ ഒരു മന്ത്രി കേരളത്തിലെത്തിയപ്പോഴും നല്‍കേണ്ട സൗകര്യങ്ങളെക്കുറിച്ച് കേന്ദ്രം വിശദീകരിച്ചിരുന്നു. ഔദ്യോഗിക സന്ദര്‍ശനത്തിനെത്തിയപ്പോള്‍ സുരക്ഷയും വാഹനവും മറ്റു സൗകര്യങ്ങളുമെല്ലാം നല്‍കാനാണു നിര്‍ദേശിച്ചത്. അതേസമയം, അയ്യപ്പഭക്തനായ മന്ത്രി ശബരിമല സന്ദര്‍ശിക്കാനെത്തിയപ്പോള്‍ സുരക്ഷമാത്രം ഒരുക്കിയാല്‍മതിയെന്നും കേന്ദ്രം അറിയിച്ചു.

നയതന്ത്രപ്രതിനിധികള്‍ക്കുള്ള പരിഗണന, അവര്‍ പ്രതിനിധാനംചെയ്യുന്ന രാജ്യവുമായി ഇന്ത്യയ്ക്കുള്ള ബന്ധം അനുസരിച്ചാണ്. അതിനാല്‍, സംസ്ഥാനങ്ങള്‍ സ്വന്തംനിലയില്‍ തീരുമാനമെടുക്കാന്‍ പാടില്ല. ഈ വ്യവസ്ഥകളെല്ലാം യു.എ.ഇ. കോണ്‍സുലേറ്റിലെ നയതന്ത്രപ്രതിനിധികളുടെ കാര്യത്തില്‍ സംസ്ഥാനം തെറ്റിച്ചതിന്റെ കാരണമാണ് കേന്ദ്രം ഗൗരവത്തോടെ പരിശോധിക്കുന്നത്.

സംസ്ഥാനത്ത് യു.എ.ഇ., മാലി, റഷ്യ, ജര്‍മനി, ശ്രീലങ്ക എന്നിവയുടെ കോണ്‍സുലേറ്റുകളാണുള്ളത്. ഇതില്‍ യു.എ.ഇ. കോണ്‍സുലേറ്റിലെ പ്രതിനിധികള്‍ക്കുമാത്രമാണ് ഡി.ജി.പി. പോലീസ് സുരക്ഷ ഒരുക്കിയത് അതാണ് ഇപ്പോള്‍ പ്രശ്നമായി മാറിയിരിക്കുന്നത്. സംസ്ഥാനത്തെ മറ്റു കോണ്‍സുലേറ്റുകളുടെ കാര്യത്തില്‍ സര്‍ക്കാരിനോ പോലീസിനോ വീഴ്ചയുണ്ടായിട്ടില്ലെന്നാണ് വിദേശകാര്യമന്ത്രാലയം വിലയിരുത്തുന്നത്. മറ്റു നാല് കോണ്‍സുലേറ്റുകളുമായും സര്‍ക്കാര്‍ പ്രതിനിധികള്‍ നേരിട്ട് ബന്ധപ്പെട്ടിട്ടുമില്ല എന്നതും വസ്തുതയാണ്.