രാജ്യത്ത് കൊവിഡ് വ്യാപനം അതിരൂക്ഷമായി തുടരുന്ന സാഹചര്യത്തിൽ പല സംസ്ഥാനങ്ങളും സമ്പൂർണ ലോക്ക് ഡൌൺ നടപ്പാക്കുന്നതിനുള്ള ആലോചനയിലാണ്.. മഹാരാഷ്ട്രയില്‍ പതിനായിരവും ആന്ധ്രാപ്രദേശില്‍ ആറായിരവും തമിഴ്‌നാട്ടില്‍ അയ്യായിരവും കടന്നാണ് ഓരോ ദിവസത്തെയും രോഗബാധയുടെ കണക്കുകൾ വരുന്നത് . കര്‍ണ്ണാടകയില്‍ ആകെ രോഗികള്‍ 75,000 പിന്നിട്ടു;മരണം 1,500 കടന്നു. ഉത്തര്‍ പ്രദേശ്, പശ്ചിമ ബംഗാള്‍ എന്നീ സംസ്ഥാനങ്ങളില്‍ 2,000 ത്തിലേറെ കൊവിഡ് കേസുകളാണ് റിപ്പോര്‍ട്ട് ചെയ്യുന്നത്.

കൊവിഡ് കേസുകള്‍ ആയിരം കടക്കുന്ന സംസ്ഥാനങ്ങളുടെ പട്ടികയിലേക്ക് ഇന്നലെ കേരളവും എത്തി.. ഒഡീഷയിലും രോഗബാധിതരുടെ എണ്ണം ആയിരം കവിഞ്ഞു. .കേരളത്തിൽ ബുധനാഴ്ചയാണ് പ്രതിദിന കൊവിഡ് കേസുകള്‍ ആയിരം കടന്നത്. ഇതോടെ പ്രതിദിന കൊവിഡ് കേസുകള്‍ ആയിരത്തിന് മുകളില്‍ റിപ്പോര്‍ട്ട് ചെയ്യുന്ന സംസ്ഥാനങ്ങളുടെ എണ്ണം പതിമൂന്നായി. 1038 പേര്‍ക്കാണ് കേരളത്തില്‍ ഇന്നലെ കൊവിഡ് സ്ഥിരീകരിച്ചത്. അതില്‍ 785 പേര്‍ക്ക് സമ്പര്‍ക്കത്തിലൂടെയാണ് രോഗബാധ സ്ഥിരീകരിച്ചത് എന്നതാണ് കൂടുതൽ ആശങ്ക ഉണ്ടാക്കുന്നത് .

സംസ്ഥാനത്ത് കൊവിഡ് രോഗവ്യാപനം രൂക്ഷമാകുന്ന സാഹചര്യത്തില്‍ പശ്ചിമ ബംഗാളില്‍ ഇന്ന് സമ്പൂര്‍ണ്ണ അടച്ചിടലാണ്. ആഴ്ചയില്‍ രണ്ട് ദിവസം സമ്പൂര്‍ണ്ണ അടച്ചിടല്‍ ഏര്‍പ്പെടുത്താനാണ് സര്‍ക്കാരിന്റെ തീരുമാനം. വ്യാഴം, ശനി ദിവസങ്ങളിലാണ് ഈ ആഴ്ചയിലെ അടച്ചിടല്‍ പ്രഖ്യാപിച്ചിരിക്കുന്നത്. സംസ്ഥാനത്ത് തുടര്‍ച്ചയായി കൊവിഡ് കേസുകള്‍ രണ്ടായിരത്തിലേറെ റിപ്പോര്‍ട്ട് ചെയ്യുന്ന സാഹചര്യത്തിലാണ് നടപടി.

ഇന്ന് മുതല്‍ മണിപ്പൂരില്‍ പതിനാല് ദിവസത്തേയ്ക്ക് സമ്പൂര്‍ണ്ണ അടച്ചിടല്‍ പ്രഖ്യാപിച്ചു. രോഗവ്യാപനം കുറവാണെങ്കിലും ഉറവിടം തിരിച്ചറിയാനാകാത്ത കൊവിഡ് കേസുകള്‍ റിപ്പോര്‍ട്ട് ചെയ്തതിനെ തുടര്‍ന്നാണ് സംസ്ഥാനത്ത് അടച്ചിടല്‍ പ്രഖ്യാപിക്കാന്‍ കാരണം. കൊവിഡ് മരണം റിപ്പോര്‍ട്ട് ചെയ്യാത്ത ചുരുങ്ങിയ സംസ്ഥാനങ്ങളില്‍ ഒന്നാണ് മണിപ്പൂര്‍. മധ്യപ്രദേശിലെ ഭോപ്പാലില്‍ വെള്ളിയാഴ്ച മുതല്‍ പത്ത് ദിവസത്തേയ്ക്ക് സമ്പൂര്‍ണ്ണ അടച്ചിടല്‍ നടപ്പാക്കാന്‍ ഒരുങ്ങുകയാണ് സര്‍ക്കാര്‍.

​കേരളത്തില്‍ കൊവിഡ് കേസുകള്‍ അതിതീവ്രമായി തുടരുന്ന സാഹചര്യത്തില്‍ സമ്പൂര്‍ണ്ണ അടച്ചിടല്‍ ഏര്‍പ്പെടുത്തുന്ന കാര്യം ഗൗരവമായി പരിഗണിക്കേണ്ടി വരുമെന്ന് സംസ്ഥാന സര്‍ക്കാര്‍ അറിയിച്ചു. സംസ്ഥാനത്ത് ലോക്ക് ഡൗണ്‍ ഏര്‍പ്പെടുത്തണമെന്ന ആവശ്യം വിദഗ്ധര്‍ അടക്കമുള്ളവര്‍ മുന്നോട്ട് വയ്ക്കുന്നുണ്ട്. വിഷയത്തില്‍ ഇതുവരെ തീരുമാനങ്ങള്‍ സ്വീകരിച്ചിട്ടില്ലെന്ന് മുഖ്യമന്ത്രി പിണറായി വിജയന്‍ പറഞ്ഞു.