പൊതുമേഖലാ സ്ഥാപനമായ ഭാരത് പെട്രോളിയം കോര്‍പ്പറേഷ(ബിപിസിഎല്‍)നിലെ ജീവനക്കാര്‍ക്ക് സ്വകാര്യ വത്കരണത്തിന്റെ ഭാഗമായി വി.ആര്‍.എസ് നടപ്പാക്കുന്നു. 45 വയസ്സിനുമുകളിലുള്ളവര്‍ക്കാണ് വി.ആര്‍.എസ് അനുവദിക്കുന്നത്. ഇതുപ്രകാരം കമ്പനിയിലെ 60 ശതമാനം ജീവനക്കാരും വി.ആര്‍.എസിന് യോഗ്യരാണെന്നാണ് വിലയിരുത്തല്‍. നിലവില്‍ 11,894 പേരാണ് കമ്പനിയില്‍ ജോലി ചെയ്യുന്നത്.

ഓഹരി വിറ്റഴിക്കല്‍ നടപടികളുമായി സര്‍ക്കാര്‍ മുന്നോട്ടുപോകുന്നതിനാല്‍ ജീവനക്കാരിലേറെപ്പേര്‍ അസംതൃപ്തരാണെന്നാണ് സംഘടനകള്‍ പറയുന്നത്. ഈ സാഹചര്യത്തില്‍ കൂടുതല്‍പേര്‍ വി.ആര്‍.എസിന് അപേക്ഷിച്ചേക്കും. വി.ആര്‍.എസിന് താല്‍പര്യമുള്ളവര്‍ ഓഗസ്റ്റ് 13നകം അപേക്ഷ നല്‍കണം. സെപ്റ്റംബര്‍ 30ഓടെ സൂക്ഷ്മ പരിശോധന പൂര്‍ത്തിയാക്കി തുടര്‍നടപടികളിലേയ്ക്കുകടക്കും. വയസ്സ്, വിദ്യാഭ്യാസ യോഗ്യത, പ്രകടനം എന്നിവ വിലിയിരുത്തിയാകും അന്തിമതീരുമാനമെടുക്കുക. കഴിഞ്ഞ സാമ്പത്തികവര്‍ഷത്തില്‍ ജീവനക്കാര്‍ക്കുള്ള ശമ്പളത്തിനും മറ്റുമായി കമ്പനിക്ക് ചെലവായത് 3,664.18 കോടി രൂപയാണ്.

ബി.പി.സി.എല്ലില്‍ 53.3 ശതമാനം ഓഹരി പങ്കാളിത്തമാണ് സര്‍ക്കാരിനുള്ളത്. ആഭ്യന്തര പെട്രോളിയം രംഗത്ത് ആഗോള കമ്പനികളെ എത്തിക്കാന്‍ കേന്ദ്രസര്‍ക്കാരിന് താത്പര്യമുണ്ട്. ഏറെക്കാലമായി പൊതുമേഖലാ കമ്പനികളുടെ കുത്തകയാണ് റീട്ടെയില്‍ എണ്ണവിതരണം. ഇതില്‍ മാറ്റമുണ്ടാക്കുകയും ലക്ഷ്യമാണ്. ലോകത്തെ ഏറ്റവും വലിയ എണ്ണക്കമ്പനിയായ സൗദി ആരാംകോ ഇന്ത്യയില്‍ നിക്ഷേപ താത്പര്യം അറിയിച്ചിട്ടുണ്ട്. റഷ്യയുടെ റോസ്‌നെഫ്റ്റിന് ഇന്ത്യയില്‍ നിക്ഷേപമുണ്ട്. മറ്റു വന്‍കിട കമ്പനികളായ ബ്രിട്ടീഷ് പെട്രോളിയം (ബി.പി) ടോട്ടല്‍, ഷെല്‍, ഷെവ്‌റോണ്‍, കൊണോകോഫില്‍പ്‌സ് എന്നിവയും ഇന്ത്യയില്‍ റീട്ടെയില്‍ ഇന്ധന വിതരണത്തിന് ഒരുങ്ങുകയാണ്.

ഇതിനിടെ ഓഹരി വാങ്ങുന്നതിനുള്ള കമ്പനികളുടെ താല്‍പര്യം ക്ഷണിച്ചുകൊണ്ടുള്ള ഇ.ഒ.ഐ സമയപരിധി ഈ മാസം 31 ന് അവസാനിക്കും. ഇത് നീട്ടാനാണ് സാധ്യതയെങ്കിലും ഈ സാമ്പത്തിക വര്‍ഷം തന്നെ ഓഹരികള്‍ വില്‍ക്കാനാണ് സാധ്യത. കോവിഡിന്റെ പശ്ചാത്തലത്തില്‍ സാമ്പത്തിക പ്രതിസന്ധികള്‍ തരണം ചെയ്യുന്നതിന്റെ ഭാഗമായിയാണ് വില്‍പ്പന വേഗത്തിലാക്കാന്‍ കേന്ദ്ര സര്‍ക്കാര്‍ തീരുമാനിച്ചത്. ഇതിന്റെ ഭാഗമായി ക്യാബിനറ്റ് സെക്രട്ടറി രാജീവ് ഗവുബയുടെയും നീതി ആയോഗ് ചീഫ് എക്‌സിക്യൂട്ടിവ് അമിത് കാന്തിന്റെ നേതൃത്വത്തില്‍ യോഗം ചേര്‍ന്നിരുന്നു.