വ്യാഴാഴ്ച അര്‍ധരാത്രിയോടെയാണ് ഗ്രാമത്തിലെ 19 വയസ്സുകാരിയെ വീട്ടില്‍ നിന്ന് കാണാതായത്. പെണ്‍കുട്ടിയെ തട്ടിക്കൊണ്ടുപോയതാണെന്നും പണം നല്‍കിയാല്‍ വിട്ടുനല്‍കാമെന്നുമുള്ള ഫോണ്‍ സന്ദേശം ലഭിച്ചു. തട്ടിക്കൊണ്ടുപോയ മകളെ വിട്ടുകിട്ടാന്‍ മാതാപിതാക്കളോട് ആവശ്യപ്പെട്ടത് ഒരുകോടി രൂപ. ഉത്തര്‍പ്രദേശിലെ ഏട്ടാ ജില്ലയിലെ നാഗ്ലഭാജ്‌ന ഗ്രാമത്തിലാണ് കഴിഞ്ഞദിവസം നാടകീയമായ സംഭവങ്ങള്‍ അരങ്ങേറിയത്. പെണ്‍കുട്ടി തന്നെയാണ് ശബ്ദം മാറ്റി മാതാപിതാക്കളോട് ഒരു കോടി രൂപ മോചനദ്രവ്യം ആവശ്യപ്പെട്ടത്. എന്നാല്‍ കുടുംബം പരാതി നല്‍കിയതോടെ പൊലീസ് അന്വേഷണം ആരംഭിച്ചു.

തുടര്‍ന്ന് മൊബൈല്‍ ഫോണ്‍ ലൊക്കേഷന്‍ പിന്തുടര്‍ന്ന് പെണ്‍കുട്ടിയെ കണ്ടെത്തുകയും ചെയ്തു. എന്നാല്‍ പൊലീസിനെ കണ്ട് കാമുകന്‍ ഓടിരക്ഷപ്പെട്ടു. തുടര്‍ന്ന് പെണ്‍കുട്ടിയെ ചോദ്യം ചെയ്തതോടെയാണ് സ്വയം ആസൂത്രണം ചെയ്ത തട്ടിക്കൊണ്ടുപോകല്‍ നാടകമായിരുന്നു സംഭവത്തിന് പിന്നിലെന്ന് വ്യക്തമായത്.
അയല്‍ക്കാരനായ യുവാവുമായി കഴിഞ്ഞ രണ്ടുവര്‍ഷത്തിലേറെയായി പെണ്‍കുട്ടി പ്രണയത്തിലായിരുന്നു. എന്നാല്‍ പെണ്‍കുട്ടിയുടെ കുടുംബം ഈ ബന്ധത്തെ എതിര്‍ത്തു. ഇതോടെയാണ് കാമുകനൊപ്പം നാടുവിടാന്‍ പദ്ധതിയിട്ടത്. അടുത്തിടെ കുടുംബം ഒരു സ്‌കൂള്‍ തുറക്കാന്‍ പോകുന്നതും ഇതിനായി ഒരു കോടി രൂപ സ്വരൂപിച്ചതും പെണ്‍കുട്ടി അറിഞ്ഞു. നാടുവിടുന്നതിനുള്ള പണം തട്ടിയെടുക്കാന്‍ പറ്റിയ സമയമാണിതെന്ന് മനസിലാക്കിയ പെണ്‍കുട്ടി കാമുകനോടൊപ്പം ചേര്‍ന്ന് പദ്ധതി ആസൂത്രണം ചെയ്തു.
തുടര്‍ന്ന് വ്യാഴാഴ്ച രാത്രി വീടുവിട്ടിറങ്ങുകയും കാമുകനോടൊപ്പം സമീപത്തെ ഒരു ഫാംഹൗസില്‍ തങ്ങുകയും ചെയ്തു. ഇവിടെ നിന്നാണ് തന്നെ തട്ടിക്കൊണ്ടുപോയെന്നും ഒരു കോടി രൂപ വേണമെന്നും പറഞ്ഞ് മാതാപിതാക്കളെ നിരന്തരം ഫോണില്‍ ബന്ധപ്പെട്ടത്. പദ്ധതി ഗംഭീരമായിരുന്നെങ്കിലും പൊലീസിന്റെ അത്യാധുനിക അന്വേഷണരീതികളെക്കുറിച്ച് ഇരുവര്‍ക്കും അറിവുണ്ടായിരുന്നില്ല. പെണ്‍കുട്ടിയുടെ മൊബൈലില്‍നിന്നുതന്നെയാണ് തുടര്‍ച്ചയായി പണം ആവശ്യപ്പെട്ട് വിളിച്ചത്. മാത്രമല്ല, പണത്തിനായി നിരന്തരം വിളിച്ചതും പൊലീസിന് സംശയം ജനിപ്പിച്ചു.
ഏതെങ്കിലും ഗുണ്ടാസംഘങ്ങളാകും സംഭവത്തിന് പിന്നിലെന്നാണ് പൊലീസ് ആദ്യം കരുതിയത്. എന്നാല്‍ പണം ആവശ്യപ്പെട്ട് തുടരെ തുടരെ വിളിച്ചതും ധൃതി കാണിച്ചതും സംശയം വര്‍ധിപ്പിച്ചു. തുടര്‍ന്ന് പെണ്‍കുട്ടിയുടെ മൊബൈല്‍ ഫോണ്‍ ലൊക്കേഷന്‍ കണ്ടെത്തുകയും ചെയ്തു. വീട്ടില്‍നിന്നും 200 മീറ്റര്‍ മാറിയുള്ള ഒരു ഫാംഹൗസിലായിരുന്നു പെണ്‍കുട്ടി. പൊലീസ് സ്ഥലത്തെത്തി കെട്ടിടം വളഞ്ഞു. ഇതുകണ്ടതോടെ കാമുകന്‍ ഓടിരക്ഷപ്പെട്ടു. പിന്നീട് പെണ്‍കുട്ടിയെ പൊലീസ് ചോദ്യംചെയ്തതോടെയാണ് തട്ടിക്കൊണ്ടുപോകല്‍ നാടകം വ്യക്തമായത്. സംഭവത്തില്‍ രണ്ടുപേര്‍ക്കെതിരേയും കേസെടുത്തതായും ഒളിവില്‍ പോയ കാമുകന് വേണ്ടി തിരച്ചില്‍ തുടരുകയാണെന്നും പൊലീസ് പറഞ്ഞു.