രാജസ്ഥാന്‍ മുഖ്യമന്ത്രി അശോക് ഗെഹ്ലോട്ട് എന്ത് പ്രതിസന്ധി വന്നാലും അഞ്ചു കൊല്ലവും ഭരിക്കും എന്നായിരുന്നു കോണ്‍ഗ്രസ്സ് തറപ്പിച്ചു പറഞ്ഞത് .സച്ചില്‍ പൈലറ്റ് എന്ന ജനപ്രിയനായ നേതാവിനെ കരിവാരിത്തേക്കാന്‍ കിട്ടിയ ഒരവസരവും ഗെഹ്ലോട്ട് പാഴാക്കിയതുമില്ല .വര്‍ഷങ്ങളായി പൈലറ്റുമായി നിലനില്‍ക്കുന്ന അഭിപ്രായവ്യത്യാസവും ശത്രുതയുമെല്ലാം മറനീക്കി പുറത്ത് വരുകയും ചെയ്തു .സച്ചിന്‍ പൈലറ്റിനെ എന്നെന്നേക്കുമായി കോണ്‍ഗ്രസില്‍ നിന്നും കെട്ടുകെട്ടിക്കാനായുള്ള ശ്രമങ്ങളാണ് ഇപ്പോഴും അശോക് ഗെഹ്ലോട്ട് തുടരുന്നത് .കോണ്‍ഗ്രസിനെയും രാജസ്ഥാനിലെ ജനങ്ങളെയും സച്ചിന്‍ പൈലറ്റ് വഞ്ചിച്ചു എന്നാണ് ഗെഹ്ലോട്ട് പൊതുവേദികളിലെല്ലാം തന്നെ തുറന്നടിച്ചിരിക്കുന്നത് .കോണ്‍ഗ്രസ് നിയമസഭാ സാമാജികരില്‍ സച്ചിനെ പിന്തുണയ്ക്കുന്നവര്‍ അയോഗ്യരാണെന്ന് ഗെഹ്ലോട്ട് പ്രസ്താവിക്കുകയും ബി എസ് പി എം എല്‍ എ മാര്‍ കോണ്‍ഗ്രസില്‍ ലയിച്ചു എന്ന് നിയമസഭാ സ്പീക്കര്‍ പറയുകയും ചെയ്ത സാഹചര്യത്തിലാണ് കടുത്ത നടപടിയിലേക്ക് ഇപ്പോള്‍ മായാവതിയും കടന്നിരിക്കുന്നത്.

ബി എസ് പി മത്സരിച്ചത് കൈപ്പത്തി ചിഹ്നത്തിലല്ല എന്നും കോണ്‍ഗ്രസില്‍ ബി എസ് പിയുടെ എം എല്‍ എ മാര്‍ ലയിച്ചു എന്നത് ശുദ്ധ അസംബന്ധമാണെന്നും മായാവതി പറഞ്ഞു .അതിനാല്‍ തന്നെ രാജസ്ഥാനില്‍ നിര്‍ണായക നീക്കവുമായി ബി.എസ്.പി. വിശ്വാസവോട്ടെടുപ്പില്‍ കോണ്‍ഗ്രസിന് എതിരെ വോട്ട് ചെയ്യാന്‍ എം.എല്‍.എമാര്‍ക്ക് വിപ്പ് നല്‍കി. ആറ് എം.എല്‍.എമാരാണ് ബി.എസ്.പിക്കുള്ളത്.
കോണ്‍ഗ്രസിന് അനുകൂലമായി വോട്ട് ചെയ്താല്‍ അയോഗ്യരാക്കുമെന്നും നിലവില്‍ മുന്നറിയിപ്പു നല്‍കിയിട്ടുണ്ട്. ബി.എസ്.പി. എം.എല്‍.എമാര്‍ നിയമസഭാകക്ഷിയോഗത്തിലും പങ്കെടുത്തിരുന്നില്ല.
200 അംഗ നിയമസഭയാണ് രാജസ്ഥാനിലേത്. ഇതില്‍ ആറ് എം.എല്‍.എമാരാണ് ബി.എസ്.പിക്ക് ഉള്ളത്. ഇവര്‍ക്കാണ് കോണ്‍ഗ്രസിന് അനുകൂലമായി വോട്ട് ചെയ്യരുതെന്ന് പാര്‍ട്ടി ദേശീയ നേതൃത്വം നിര്‍ദേശം നല്‍കിയിരിക്കുന്നത്. സഭ ചേരുന്ന ഘട്ടത്തില്‍ വിശ്വാസ വോട്ടെടുപ്പോ മറ്റ് എന്ത് നടപടിയുണ്ടായാലും കോണ്‍ഗ്രസിന് എതിരെ തന്നെ വോട്ട് ചെയ്യണമെന്നാണ് നിര്‍ദേശം നല്‍കിയിരിക്കുന്നത്.നേരത്തെ ഈ ആറ് എം.എല്‍.എമാരും സംസ്ഥാനത്ത് കോണ്‍ഗ്രസില്‍ ലയിച്ചതായി പ്രഖ്യാപനം വന്നിരുന്നു. എന്നാല്‍ ഈ ലയനം നിയമവിരുദ്ധമാണെന്നും വിപ്പ് നല്‍കിയ കൂട്ടത്തില്‍ ബി.എസ്.പി.ദേശിയ നേതൃത്വം വ്യക്തമാക്കിയിട്ടുണ്ട്.

ബി.എസ്.പി. ദേശീയ പാര്‍ട്ടി ആയതിനാല്‍ സംസ്ഥാന തലത്തില്‍ മറ്റൊരു പാര്‍ട്ടിയില്‍ ലയിക്കാന്‍ സാധിക്കില്ലെന്നും ഇത് അയോഗ്യത ക്ഷണിച്ചുവരുത്തുന്ന നീക്കമാണെന്നും ബി.എസ്.പിയുടെ . ദേശീയ ജനറല്‍ സെക്രട്ടറി സതീശ് ചന്ദ്ര മിശ്ര നല്‍കിയിട്ടുള്ള വിപ്പില്‍ പറയുന്നത്.

ബി.എസ്.പിയുടെ നിലപാടോടെ രാജസ്ഥാനില്‍ രാഷ്ട്രീയ പ്രതിസന്ധി വന്‍തോതില്‍ മൂര്‍ച്ഛിക്കുകയാണ്. 102 എം.എല്‍.എമാര്‍ ഒപ്പമുണ്ടെന്നാണ് കോണ്‍ഗ്രസിന്റെ ഏറ്റവും ഒടുവിലത്തെ അവകാശവാദം. ആറ് ബി.എസ്.പി. എം.എല്‍.എമാര്‍ ഉള്‍പ്പെടെയാണിത്. എന്നാല്‍ ഈ ആറുപേര്‍ വിപ്പ് ലംഘിക്കുകയും അയോഗ്യരാക്കപ്പെടുകയും ചെയ്താല്‍ രാജസ്ഥാനിലെ രാഷ്ട്രീയ പ്രതിസന്ധി വീണ്ടും വഷളാകും. ബി.എസ്.പിയുടെ ചിഹ്നത്തില്‍ മത്സരിച്ച് വിജയിച്ചവരാണ് ഈ ആറ് എം.എല്‍.എമാരും. എന്നാല്‍ ഇവര്‍ പിന്നീട് കോണ്‍ഗ്രസില്‍ ലയിച്ചുവെന്ന തരത്തില്‍ സ്പീക്കര്‍ ഒരു പ്രഖ്യാപനം നടത്തിയതാണ് കോണ്‍ഗ്രസിന് വന്‍ വിനയായത് . എന്നാല്‍ ഇത് നിയമവിരുദ്ധമാണെന്നാണ് ബി.എസ്.പി. നിലപാട് സ്വീകരിച്ചിരിക്കുന്നത്.