രാഹുല്‍ ഗാന്ധിയുടെ പ്രസ്താവനകള്‍ കാര്യങ്ങള്‍ മനസിലാക്കാതെയുള്ളതാണെന്ന് ബി.ജെ.പിയുടെ വിമര്‍ശനങ്ങള്‍ക്കിടയിലും സര്‍ക്കാരിനെതിരായ ആരോപണങ്ങള്‍ ശക്തമാക്കുകയാണ് മുന്‍ കോണ്‍ഗ്രസ് അധ്യക്ഷന്‍. ചൈന ഇന്ത്യന്‍ ഭൂപ്രദേശം കൈവശപ്പെടുത്തിയിട്ടുണ്ടെന്ന ഗുരുതര ആരോപണമാണ് ഇപ്പോള്‍ രാഹുല്‍ ഗാന്ധി ഇപ്പോള്‍ ഉന്നയിച്ചിരിക്കുന്നത്. സത്യം മറച്ചുവയ്ക്കുന്നതും ഭൂമി സ്വന്തമാക്കാന്‍ അവരെ അനുവദിക്കുന്നതും ദേശവിരുദ്ധമാണെന്നും രാഹുല്‍ പറഞ്ഞു. ട്വിറ്ററില്‍ പോസ്റ്റ് ചെയ്ത വീഡിയോയിലൂടെയാണ് അദ്ദേഹത്തിന്റെ വിമര്‍ശനം.

കേന്ദ്ര സര്‍ക്കാരിനെതിരെ ആരോപണമുന്നയിച്ച രാഹുല്‍ ഗാന്ധി തങ്ങളുടെ സ്ഥലം അയല്‍ക്കാര്‍ കൈയ്യേറിയ വിവരം ജനങ്ങളുടെ ശ്രദ്ധയിലേക്കെത്തിക്കുന്നത് ദേശസ്‌നേഹമാണെന്നും പറയുന്നു. ഇക്കാര്യം പറയുന്നതിലൂടെ തന്റെ രാഷ്ട്രീയ ജീവിതത്തിന് വില നല്‍കേണ്ടിവരുമോയെന്നത് പ്രശ്‌നമല്ലെന്നും ഇന്ത്യന്‍ ഭൂപ്രദേശത്തെ സംബന്ധിച്ചിടത്തോളം താന്‍ സത്യം പറയുക തന്നെ ചെയ്യുമെന്നും രാഹുല്‍ ഗാന്ധി പറയുന്നു. 1.3 മിനിറ്റ് ദൈര്‍ഘ്യമുള്ള വീഡിയോയാണ് രാഹുല്‍ ഗാന്ധി പങ്കുവെച്ചിരിക്കുന്നത്. ഒരു ഇന്ത്യക്കാരനെന്ന നിലയില്‍ താന്‍ ആദ്യ മുന്‍ഗണന നല്‍കുന്നത് രാജ്യത്തിനാണെന്നും ചൈനക്കാര്‍ ഇന്ത്യന്‍ ഭൂമി കൈവശപ്പെടുത്തിയെന്നും അദ്ദേഹം ചൂണ്ടിക്കാണിക്കുന്നു. ചൈന ഇന്ത്യന്‍ മണ്ണിലേക്ക് കടന്നുകയറിയിട്ടില്ലെന്ന് നുണപറയണമെന്നാണോ നിങ്ങള്‍ ആഗ്രഹിക്കുന്നത് എന്റെ കരിയര്‍ തകരുമെങ്കില്‍ പോലും ഞാന്‍ നുണ പറയാനില്ല. സത്യം പറയാന്‍ തീരുമാനിച്ചു അദ്ദേഹം പറഞ്ഞു.

തന്റെ രാഷ്ട്രീയ ഭാവിയെ പ്രതികൂലമായി ബാധിച്ചാലും സത്യം പറയുമെന്നാണ് രാഹുല്‍ വീഡിയോയിലൂടെ പറയുന്നത്. 'ഞാന്‍ സാറ്റലൈറ്റ് ചിത്രങ്ങള്‍ കണ്ടു, മുന്‍ സൈനിക ഉദ്യോഗസ്ഥരുമായി സംസാരിക്കുകയും ചെയ്തു. ചൈന ഇന്ത്യന്‍ മണ്ണിലേക്ക് കടന്നുകയറിയിട്ടില്ല എന്ന് ഞാന്‍ നുണപറയണമെന്നാണോ നിങ്ങള്‍ ആഗ്രഹിക്കുന്നത്. എന്റെ കരിയര്‍ നശിക്കുമെങ്കില്‍ പോലും ഞാന്‍ നുണ പറയാനില്ല'. ചൈനക്കാര്‍ ഇന്ത്യന്‍ ഭൂമി കൈവശപ്പെടുത്തിയിട്ടില്ലെന്ന് നുണ പറഞ്ഞവരാണ് യഥാര്‍ത്ഥത്തില്‍ രാജ്യവിരുദ്ധര്‍ എന്നും രാഹുല്‍ ഗാന്ധി വിമര്‍ശിക്കുന്നു. ഇന്ത്യന്‍ മണ്ണില്‍ ചൈന പ്രവേശിച്ചിട്ടില്ലെന്നും ചൈനീസ് സേന മടങ്ങിയെന്നും കേന്ദ്ര സര്‍ക്കാര്‍ പറയുമ്പോള്‍ ഈ വാദങ്ങള്‍ തള്ളുകയാണ് കോണ്‍ഗ്രസ്. നേരത്തെ അഞ്ച് വാദങ്ങള്‍ ഉയര്‍ത്തി ചൈനീസ് സേന ഇന്ത്യന്‍ മണ്ണില്‍ നിന്ന് മടങ്ങിയിട്ടില്ലെന്നും കോണ്‍ഗ്രസ് ആരോപിച്ചിരുന്നു.