രാജസ്ഥാനില്‍ നിയമസഭ ചേരണമെന്ന് ആവശ്യപ്പെട്ടു അശോക് ഗെലോട്ട് സര്‍ക്കാര്‍ നല്‍കിയ ശുപാര്‍ശ രണ്ടാം തവണയും ഗവര്‍ണര്‍ കല്‍രാജ് മിശ്ര മടക്കിയതിനെ തുടര്‍ന്ന് രാജസ്ഥാനിലെ രാഷ്ട്രീയ പ്രതിസന്ധിയില്‍ അനിശ്ചിതത്വം തുടരുന്നു. സഭ വിളിച്ചു ചേര്‍ക്കാന്‍ 21 ദിവസത്തെ മുന്‍കൂര്‍ നോട്ടിസ് നല്‍കണമെന്ന ഗവര്‍ണറുടെ നിര്‍ദേശത്തിന് സര്‍ക്കാര്‍ ഇന്ന് മറുപടി നല്‍കിയേക്കും.

നിയമസഭ സമ്മേളനം ഗവര്‍ണര്‍ കല്‍രാജ് മിശ്ര വൈകിപ്പിക്കുന്നുവെന്നാണ് കോണ്‍ഗ്രസ് ആരോപണം. സംസ്ഥാനത്തെ രാഷ്ട്രീയ പ്രതിസന്ധിയില്‍ ഗവര്‍ണറുടെ പങ്കിനെക്കുറിച്ച് പ്രധാനമന്ത്രിയോട് സംസാരിച്ചതായി ഇന്നലെ മുഖ്യമന്ത്രി അശോക് ഗെലോട്ട് വ്യക്തമാക്കിയിരുന്നു. അതേസമയം പൈലറ്റ് ക്യാംപിലെ 3 എംഎല്‍എ മാര്‍ തങ്ങള്‍ക്കൊപ്പം വരാന്‍ ഒരുക്കമാണെന്ന് അശോക് ഗെലോട്ട് പക്ഷവും മറുപക്ഷത്തു നിന്ന് 15 എംഎല്‍എ മാര്‍ ബന്ധപ്പെട്ടുവെന്നു പൈലറ്റ് ക്യാംപും അവകാശപ്പെട്ടു.
സഭ വിളിച്ചു ചേര്‍ക്കാന്‍ 21 ദിവസത്തെ മുന്‍കൂര്‍ നോട്ടിസ് നല്‍കണം, വിശ്വാസ പ്രമേയം അവതരിപ്പിച്ചാല്‍ ലൈവ് സംപ്രേഷണം ചെയ്യണം, 200 എംഎല്‍എമാരും 1000 ജീവനക്കാരും ചേരുന്നിടത്തു കോവിഡ് 19 പകരാതിരിക്കാനുള്ള സംവിധാനങ്ങളില്ല എന്നീ പരാമര്‍ശങ്ങളോടെയാണ് ഇത്തവണ ശുപാര്‍ശ മടക്കിയത്. ഗവര്‍ണറുടെ 6 പേജ് പ്രേമലേഖനം കിട്ടിയിട്ടുണ്ടെന്നു പ്രതികരിച്ച മുഖ്യമന്ത്രി ഗെലോട്ട് ഉടന്‍ അതിനു മറുപടി നല്‍കുമെന്നും അറിയിച്ചു.
അതേസമയം രാജസ്ഥാനില്‍ നിയമസഭ വിളിച്ചുചേര്‍ക്കണമെന്ന മുഖ്യമന്ത്രി അശോക് ഗെലോട്ടിന്റെ ആവശ്യം അംഗീകരിക്കാത്ത ഗവര്‍ണറെ ചട്ടം ഓര്‍മ്മിപ്പിച്ച് കോണ്‍ഗ്രസിന്റെ മുന്‍ നിയമമന്ത്രിമാര്‍. കപില്‍ സിബല്‍, സല്‍മാന്‍ ഖുര്‍ഷിദ്, അശ്വനി കുമാര്‍ എന്നിവരാണ് ഗവര്‍ണര്‍ക്ക് ചട്ടം പറഞ്ഞുകൊടുത്ത് കത്തയച്ചത്.

'നിയമസഭ വിളിക്കുന്നതിന് ഗവര്‍ണര്‍ മന്ത്രിസഭയുടെ ഉപദേശത്തിന് അനുസൃതമായി പ്രവര്‍ത്തിക്കാന്‍ ബാധ്യസ്ഥനാണ്. സ്ഥാപിതമായ ഭരണഘടനാ നിലപാടില്‍ നിന്ന് വ്യതിചലിക്കുന്നത് സത്യപ്രതിജ്ഞാ ലംഘനവും ഭരണഘടനാ പ്രതിസന്ധി സൃഷ്ടിക്കുന്നതും ആയിരിക്കും', കത്തില്‍ മുന്‍ മന്ത്രിമാര്‍ ചൂണ്ടിക്കാട്ടി.