യോഗി ആദിത്യനാഥിന്റെ നാട്ടില്‍ നിന്നൊരു നല്ലൊരു വാര്‍ത്ത. കോവിഡ് വ്യാപനം രൂക്ഷമായ ഉത്തര്‍പ്രദേശ് കോവിഡ് പരിശോധനയുടെ കാര്യത്തിലാണ് റെക്കോര്‍ഡിട്ടു. 24 മണിക്കൂറിനിടെ ഒരു ലക്ഷം പരിശോധനയാണ് നടത്തിയത്. ഒരു മണിക്കൂറിനുളളില്‍ വൈറസ് ബാധ കണ്ടെത്താന്‍ സഹായിക്കുന്ന റാപ്പിഡ് ആന്റിജന്‍ ടെസ്റ്റാണ് ജനങ്ങളില്‍ നടത്തിയത്. ജൂലൈ 27 വരെയുളള കണക്ക് അനുസരിച്ച് 19 ലക്ഷം പരിശോധനകളാണ് ഉത്തര്‍പ്രദേശില്‍ നടന്നത്. ജൂലൈ 18 വരെ 15 ലക്ഷം ആളുകളെയാണ് പരിശോധനയ്ക്ക് വിധേയമാക്കിയത്. ചുരുങ്ങിയ ദിവസം കൊണ്ട് നാലു ലക്ഷം പരിശോധനകളാണ് നടത്തിയതെന്ന് സര്‍ക്കാര്‍ കണക്കുകള്‍ വ്യക്തമാക്കുന്നു.

രോഗവ്യാപനം ശക്തമാകുകയും രാജ്യത്ത് ആദ്യമായി സമൂഹവ്യാപനം സമ്മതിക്കുകയും ചെയ്ത ശേഷവും കേരളത്തിലെ ഏറ്റവും ഉയര്‍ന്ന പരിശോധന നിരക്ക് 25000 ത്തിന് അകത്തായിരുന്നു. ഈ സ്ഥാനത്താണ് കേരളത്തിന്റെ അത്ര ആരോഗ്യമേഖലയില്‍ നേട്ടം കൈവരിക്കാത്ത ഉത്തര്‍പ്രദേശില്‍ ഒരു ലക്ഷമെന്ന മാജിക്ക് നമ്പറില്‍ ഒരു ദിവസത്തെ ടെസ്റ്റില്‍ നിരക്ക് എത്തി നില്‍ക്കുന്നത്. കേസുകളുടെ എണ്ണം വര്‍ധിപ്പിച്ചത് വഴി കോവിഡ് പോസിറ്റീവിറ്റി നിരക്ക് കുറയ്ക്കാന്‍ സാധിച്ചതായി ഉത്തര്‍പ്രദേശ് ആരോഗ്യ വകുപ്പ് പറയുന്നു. നിലവില്‍ 3 മുതല്‍ നാലുശതമാനം വരെയാണ് കോവിഡ് പോസിറ്റീവിറ്റി നിരക്ക്. കൂടുതല്‍ പരിശോധനകള്‍ നടത്തി കോവിഡ് വ്യാപനം തടയാനാണ് ഉത്തര്‍പ്രദേശ് സര്‍ക്കാര്‍ തീരുമാനിച്ചിരിക്കുന്നത്. നിലവില്‍ 26,204 പേരാണ് സംസ്ഥാനത്ത് ചികിത്സയില്‍ കഴിയുന്നത്. 70000ലധികം ആളുകള്‍ക്കാണ് ഇതുവരെ കോവിഡ് ബാധിച്ചത്. 42,833 പേര്‍ രോഗമുക്തി നേടിയതായി സര്‍ക്കാര്‍ കണക്കുകള്‍ വ്യക്തമാക്കുന്നു.

കൊറോണ വൈറസ് വ്യാപനം ലോകത്ത് ഇപ്പോള്‍ ഏറ്റവും വേഗത്തില്‍ നടക്കുന്നത് ഇന്ത്യയിലെന്നാണ് റിപ്പോര്‍ട്ട്. ബ്ലൂംബെര്‍ഗിന്റെ കൊറോണ വൈറസ് ട്രാക്കര്‍ പങ്കുവയ്ക്കുന്ന വിവരമനുസരിച്ച്, കഴിഞ്ഞ ഒരാഴ്ചയ്ക്കുള്ളില്‍ 20 ശതമാനത്തിലേറെ രോഗികളാണ് രാജ്യത്ത് വര്‍ധിച്ചത്. ഇന്ത്യയില്‍ ഇതുവരെ 14,83,157 പേര്‍ക്കാണ് കോവിഡ് സ്ഥിരീകരിച്ചത്. രോഗികളുടെ എണ്ണത്തില്‍ ഇന്ത്യ, യുഎസിനും ബ്രസീലിനും പിന്നില്‍ മൂന്നാമതാണ്. എങ്കിലും രോഗവ്യാപനത്തിന്റെ തോത് ഇന്ത്യയില്‍ കൂടുതലാണെന്ന് റിപ്പോര്‍ട്ട് പറയുന്നു. ഒറ്റ ദിവസം അര ലക്ഷത്തിനടുത്ത് പോസിറ്റീവ് കേസുകളാണ് രാജ്യത്ത് സ്ഥിരീകരിക്കുന്നത്.

മഹാരാഷ്ട്ര, തമിഴ്‌നാട്, ആന്ധ്രാപ്രദേശ്, കര്‍ണാടക എന്നീ സംസ്ഥാനങ്ങളിലാണ് പ്രതിദിനം ഏറ്റവുമധികം കോവിഡ് കേസുകള്‍ റിപ്പോര്‍ട്ട് ചെയ്യുന്നത്. രാജ്യത്തെ പരിശോധനകളുടെ എണ്ണവും വര്‍ധിപ്പിച്ചിട്ടുണ്ട്. കഴിഞ്ഞ ഞായറാഴ്ച മാത്രം 515,472 സാംപിളുകള്‍ പരിശോധിച്ചതായി ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച് അറിയിച്ചു. എന്നിട്ടും ലോകത്ത് പരിശോധന നിരക്ക് കുറവുള്ള രാജ്യങ്ങളിലൊന്നാണ് ഇന്ത്യ. പ്രതിദിനം, 1000 പേരില്‍ 11.8 പേര്‍ക്ക് മാത്രമാണ് ഇന്ത്യയില്‍ കോവിഡ് പരിശോധന നടത്തുന്നത്. അതെസമയം രാജ്യത്ത് പരിശോധനകള്‍ കൂടുമ്പോള്‍ കേസുകള്‍ കൂടുമെന്നും എന്നാല്‍ ക്രമേണ പോസിറ്റിവ് കേസുകള്‍ കുറഞ്ഞുവരുമെന്ന് ആരോഗ്യ മന്ത്രാലയം പറഞ്ഞു. ഡല്‍ഹി ഇതിന് ഉദാഹരണമാണെന്ന് മന്ത്രാലയം അഭിപ്രായപ്പെട്ടു. രാജ്യത്ത് ഇപ്പോള്‍ കോവിഡ് മരണ നിരക്ക് 2.35 ശതമാനം മാത്രമാണ്. ലോകത്തെ ഏറ്റവും കുറഞ്ഞ മരണ നിരക്കാണിത്. രോഗം ബാധിക്കുന്ന 63.54 പേരും വൈറസ് മുക്തി നേടുന്നുണ്ടെന്ന് ആരോഗ്യമന്ത്രാലയം വ്യക്തമാക്കി.