വെര്‍ട്ടിക്കല്‍ ട്രാന്‍സ്മിഷനിലൂടെയാണ് കുഞ്ഞിന് കൊവിഡ് ബാധിച്ചത്. അമ്മയില്‍നിന്ന് കുഞ്ഞിലേക്കുള്ള രോഗപകര്‍ച്ച വെര്‍ട്ടിക്കല്‍ ട്രാന്‍സ്മിഷന്‍ എന്നാണ് അറിയപ്പെടുന്നത്. കുഞ്ഞിന്റെ ജനനത്തിന് തൊട്ടു മുമ്ബോ പിമ്ബോ അമ്മയില്‍നിന്ന് രോഗ കാരണമായ അണുക്കള്‍ കുഞ്ഞിലേക്ക് വ്യാപിക്കുന്നതിനെയാണ് വെര്‍ട്ടിക്കല്‍ ട്രാന്‍സ്മിഷന്‍ എന്നു പറയുന്നത്. ഇത് ഗര്‍ഭാവസ്ഥയില്‍ മറുപിള്ളയിലൂടെയോ ജനനശേഷം മുലപ്പാലിലൂടെയോ സംഭവിക്കാം.പൂനെയിലെ സസൂന്‍ ജനറല്‍ ആശുപത്രിയിലാണ് മറുപിള്ളയിലൂടെ അമ്മയില്‍നിന്ന് കുഞ്ഞിലേക്ക് വൈറസ് പകര്‍ന്നതായി റിപ്പോര്‍ട്ട് ചെയ്യപ്പെട്ടിട്ടുള്ളത്.

രാജ്യത്ത് ഇത്തരത്തിലെ ആദ്യത്തെ സംഭവമാണിതെന്ന് ആശുപത്രി അധികൃതര്‍ പറയുന്നു. ജനനത്തിന് ശേഷം അമ്മയില്‍നിന്ന് കുഞ്ഞിലേക്ക് രോഗം പകരുന്നത് സാധാരണ കണ്ടുവരാറുണ്ട്. എന്നാല്‍ അതില്‍നിന്ന് വ്യത്യസ്തമായി ഗര്‍ഭാവസ്ഥയില്‍ തന്നെ കുഞ്ഞിന് വൈറസ് പകര്‍ന്നതായാണ് ഇവിടെ സംഭവിച്ചിരിക്കുന്നതെന്ന് സസൂന്‍ ജനറല്‍ ആശുപത്രിയിലെ ശിശുരോഗവിഭാഗം മേധാവി ഡോ. ആര്‍തി കിനികര്‍ വ്യക്തമാക്കി.

കുട്ടിയെ മറ്റൊരു വാര്‍ഡിലാണ് കിടത്തിയിരുന്നത്. സ്രവപരിശോധനാഫലം പോസിറ്റീവ് ആവുകയും ജനിച്ച്‌ രണ്ടുമൂന്ന് ദിവസത്തിനുള്ളില്‍ കുഞ്ഞിന് കൊവിഡ് ലക്ഷണങ്ങളായ കടുത്ത പനി, സൈറ്റോക്കിന്‍ സ്റ്റോം തുടങ്ങിയ ലക്ഷണങ്ങള്‍ ഉണ്ടാകുകയും ചെയ്തു. രണ്ടാഴ്ച തീവ്രപരിചരണ വിഭാഗത്തിലാക്കിയ കുഞ്ഞ് പിന്നീട് സുഖം പ്രാപിക്കുകയും അമ്മയോടൊപ്പം ആശുപത്രി വിടുകയും ചെയ്തതായി ഡോ. ആര്‍തി കൂട്ടിച്ചേര്‍ത്തു.

ഇന്ത്യയില്‍ വെര്‍ട്ടിക്കല്‍ ട്രാന്‍സ്മിഷനിലൂടെ കൊവിഡ് പകരുന്ന ആദ്യത്തെ കേസാണിതെന്ന് സസൂന്‍ ജനറല്‍ ആശുപത്രി ഡീനായ ഡോ മുരളീധര്‍ താമ്ബെ മാധ്യമങ്ങളോട് പറഞ്ഞു. വൈറസ് ബാധ കാരണം ഗുരുതരാവസ്ഥയിലായ കുഞ്ഞിനും അമ്മയ്ക്കും മികച്ച ചികിത്സയും പരിചരണം നല്‍കിയ ആശുപത്രിയിലെ മെഡിക്കല്‍ സംഘത്തെ അദ്ദേഹം അഭിനന്ദിക്കുകയും ചെയ്തു.

എല്ലാ ഗര്‍ഭിണികള്‍ക്കും കോവിഡ് പരിശോധന നിഷ്കര്‍ഷിച്ചിരിക്കുന്നതിനാല്‍ വൈറസ് ബാധ സ്ഥിരീകരിച്ച കുഞ്ഞിന്റെ അമ്മയ്ക്കും നേരത്തെ പരിശോധന നടത്തിയിരുന്നെങ്കിലും ഫലം നെഗറ്റീവായിരുന്നുവെന്നും ഡോ. ആര്‍തി അറിയിച്ചു. പ്രസവത്തിന് ഒരാഴ്ച മുമ്ബാണ് അമ്മയ്ക്ക് കോവിഡ് ലക്ഷണങ്ങള്‍ പ്രകടമായത്. തുടര്‍ന്ന് പ്രസവിച്ചയുടനെ കുഞ്ഞിന്റെ സ്രവം ശേഖരിച്ച്‌ പരിശോധനയ്ക്കയച്ചിരുന്നു.