രാമക്ഷേത്ര നിര്‍മാണത്തിന് മുന്നോടിയായി നടത്തുന്ന തറക്കല്ലിടല്‍ ചടങ്ങില്‍ പ്രധാനമന്ത്രി നരേന്ദ്ര മോദി പങ്കെടുക്കാന്‍ പാടില്ലെന്ന് എ.ഐ.എം.ഐ.എം തലവന്‍ അസദുദീന്‍ ഒവൈസി. അങ്ങനെ ചെയ്യുന്നത് ഭരണഘടന അടിസ്ഥാനമാക്കി അദ്ദേഹം ചെയ്ത സത്യപ്രതിജ്ഞയുടെ ലംഘനമാണെന്നും ഒവൈസി പറഞ്ഞു.. ചടങ്ങില്‍ പങ്കെടുക്കുന്നത്, പ്രധാനമന്ത്രിയായി അധികാരത്തിലേറുന്നതിന് മുന്‍പ് അദ്ദേഹം ചെയ്ത സത്യപ്രതിജ്ഞ ലംഘിക്കുന്നതിനു തുല്യമാണെന്നാണ് ഒവൈസി അഭിപ്രായപ്പെടുന്നത്.

ആഗസ്റ്റ് അഞ്ചിന് നടക്കുന്ന ക്ഷേത്രത്തിന്റെ തറക്കല്ലിടല്‍ ചടങ്ങില്‍ പങ്കെടുക്കുന്നതിനായി പ്രധാനമന്ത്രി മോദിയെ റാം മന്ദിര്‍ ട്രസ്റ്റ് ക്ഷണിച്ചിട്ടുണ്ടെങ്കിലും ഇക്കാര്യത്തില്‍ പ്രധാമന്ത്രിയുടെ ഓഫീസ് അന്തിമ തീരുമാനം അറിയിച്ചിട്ടില്ലെന്നാണ് പുറത്തുവരുന്ന വിവരം. ക്ഷേത്രത്തിന്റെ ഭൂമീ പൂജാ കര്‍മ്മം തത്സമയം ചാനലില്‍ കാണിക്കുന്നതിനെതിരെ സി.പി.ഐയും രംഗത്ത് വന്നിരുന്നു. ഇക്കാര്യം ചൂണ്ടിക്കാണിച്ച്‌ പാര്‍ട്ടി കേന്ദ്ര സര്‍ക്കാരിന് കത്തും അയച്ചിരുന്നു.

ഭൂമീ പൂജാ കര്‍മ്മം കേന്ദ്രത്തിന് കീഴിലുള്ള ദൂരദര്‍ശന്‍ ചാനലിലൂടെ തത്സമയം സംപ്രേക്ഷണം ചെയ്യുന്നത് രാജ്യത്തിന്റെ ഐക്യം കാത്തുസൂക്ഷിക്കുന്ന മാനദണ്ഡങ്ങള്‍ക്ക് എതിരാണെന്ന് സി.പി.എം ആരോപിച്ചു. തിങ്കളാഴ്ചയാണ് ഇക്കാര്യം സംബന്ധിച്ച്‌ പാര്‍ട്ടി കേന്ദ്രത്തിന് കത്തയച്ചത്. അയോദ്ധ്യ വിഷയം രാജ്യത്ത് സംഘര്‍ഷങ്ങള്‍ക്കും സ്വരച്ചേര്‍ച്ചയില്ലായ്മയ്ക്കും കാരണമായിട്ടുള്ള സാഹചര്യത്തില്‍ സംപ്രേക്ഷണം ഒഴിവാക്കേണ്ടതാണെന്നും പാര്‍ട്ടി ചൂണ്ടികാണിക്കുന്നു.