ആന്റിജന്‍ പരിശോധനാഫലം സമ്പൂര്‍ണ്ണമല്ലെന്നതിന് തെളിവായി. ആന്റിജന്‍ പരിശോധനാഫലം നെഗറ്റീവായെന്നു കരുതി കോവിഡ് ഇല്ലെന്നു പൂര്‍ണമായി ഉറപ്പിക്കാന്‍ കഴിയില്ലെന്നത് ഉറപ്പായി. ഡല്‍ഹി സര്‍ക്കാര്‍ ഹൈക്കോടതിയില്‍ സമര്‍പ്പിച്ച സത്യവാങ്മൂലത്തിലാണ് ഇതുസംബന്ധിച്ച സൂചന. ആന്റിജന്‍ ടെസ്റ്റ് നെഗറ്റീവായവരില്‍, രോഗമില്ലെന്ന് ഒന്നുകൂടി ഉറപ്പിക്കാന്‍ നടത്തിയ പരിശോധനയില്‍ നാനൂറോളം പേരില്‍ കോവിഡ് കണ്ടെത്തി.

നിലവില്‍ ആന്റിജന്‍ പരിശോധന ഫലം പോസിറ്റീവ് ആകുന്നവരുടെ കാര്യത്തില്‍ സംശയം വേണ്ട, അവര്‍ക്ക് വൈറസ് ബാധ ഉറപ്പിക്കാം.  എന്നാല്‍ ആന്റിജന്‍ പരിശോധനയില്‍ നെഗറ്റീവ് ഫലം ലഭിക്കുന്നവര്‍, രോഗലക്ഷണമുണ്ടെങ്കില്‍ മാത്രം ആര്‍ടിപിസിആര്‍ ടെസ്റ്റിനു വിധേയരായാല്‍ മതി. പനി, ചുമ, തൊണ്ടവേദന ഇവയിലേതെങ്കിലുമൊരു ലക്ഷണമുള്ളവരാണ് ആര്‍ടിപിസിആര്‍ കൂടി നടത്തേണ്ടത്.

അരമണിക്കൂറിനുള്ളില്‍ ഫലം അറിയാമെന്നതും ചെലവു കുറവാണെന്നതുമാണ് ആന്റിജന്‍ പരിശോധനയുടെ നേട്ടം. ഡല്‍ഹിയില്‍ 24 വരെ 4.04 ലക്ഷം പേര്‍ക്ക് ആന്റിജന്‍ പരിശോധന നടത്തിയിരുന്നു. ഇതില്‍ 3.79 ലക്ഷം പേര്‍ക്കാണ് ഫലം നെഗറ്റീവായത്. ഇതില്‍ രോഗലക്ഷണമുള്ള 2828 പേരെ ആര്‍ടിപിസിആര്‍ നടത്തിയതില്‍ 404 പേര്‍ക്കാണ് വൈറസ് ബാധ സ്ഥിരീകരിച്ചത്.