ഗൃഹപ്രവേശന ചടങ്ങില് അതിഥികളെ സ്വീകരിക്കാന് ഇരുന്ന ഗൃഹനാഥയെ കണ്ട് ഞെട്ടി അതിഥികള്
തന്റെ പുതിയ വീടിന്റെ ഗൃഹപ്രവേശന ചടങ്ങിനെത്തുന്ന അതിഥികളെ സ്വീകരിക്കാന് കാത്തിരുന്ന ഗൃഹനാഥയെ കണ്ട് ഞെട്ടിയിരിക്കുകയാണ് അതിഥികള്. ചെറുപുഞ്ചിരിയോടെ ഇരിക്കുന്ന ആ ഗൃഹനാഥയെ കണ്ട് ഞെട്ടേണ്ട ആവശ്യമെന്തായിരുന്നു എന്നല്ലേ? അവരെ കണ്ട് സന്തോഷിക്കുകയല്ലേ വേണ്ടത്. എന്നാല് മധ്യവയസ്കയെ ഒന്ന് സൂക്ഷിച്ച് നോക്കിയാല് മനസ്സിലാകും അവര്ക്ക് ചലനമില്ലെന്ന്. കാരണം അതൊരു സിലിക്കോണ് പ്രതിമയാണ്. മൂന്നു വര്ഷം മുമ്ബ് ഒരു വാഹനാപകടത്തില് നഷ്ടമായ ഭാര്യയെ അവര് ഏറെ മോഹിച്ച ഗൃഹപ്രവേശന ചടങ്ങില് ഇരുത്താന് ഭര്ത്താവ് കണ്ടെത്തിയ വഴിയായിരുന്ന ഭാര്യയുടെ രൂപത്തിലുള്ള ആ പ്രതിമ.
കര്ണാടക കൊപ്പല് സ്വദേശിയായ വ്യവസായി ശ്രീനിവാസ മൂര്ത്തി എന്നയാളാണ് ജീവിതത്തിലെ ഒരു പ്രധാന നിമിഷത്തില് ഒപ്പമില്ലാത്ത ഭാര്യയുടെ വിയോഗം മറികടക്കാന് ഈ വഴി തെരഞ്ഞെടുത്തത്. 2017 ല് ഒരു വാഹനാപകടത്തിലാണ് മൂര്ത്തിക്ക് ഭാര്യയായ മാധവിയെ നഷ്ടമായത്. തിരുപ്പതിയിലേക്കുള്ള യാത്രയ്ക്കിടെ ഉണ്ടായ അപകടത്തില് ഇയാളുടെ രണ്ട് മക്കള്ക്കും പരിക്കേറ്റിരുന്നു. എന്നാല് മാധവിയുടെ മരണം കുടുംബത്തെ ആകെ തകര്ത്തു കളഞ്ഞു. തുടര്ന്നാണ് ഭാര്യയുടെ ഏറ്റവും വലിയ ആഗ്രഹമായ പുതിയ വീട് എന്ന സ്വപ്നം സാക്ഷാത്കരിക്കാന് ശ്രീനിവാസ മൂര്ത്തി ഇറങ്ങിത്തിരിച്ചത്.
കഴിഞ്ഞ രണ്ട് വര്ഷത്തിനിടെ ഇരുപത്തിയഞ്ചോളം ആര്ക്കിടെക്ടുമാരെ കണ്ടു.. ഭാര്യയുടെ ഓര്മ്മയ്ക്കായി നിര്മ്മിക്കുന്ന ഈ ബംഗ്ലാവില് അവര്ക്കായി എന്തെങ്കിലും പ്രത്യേകമായി ചെയ്യണമെന്ന ഇയാളുടെ ആഗ്രഹത്തിനൊത്തുയരാന് ഇവര്ക്ക് ആര്ക്കും കഴിഞ്ഞില്ല.. ഒടുവില് ഒരു സുഹൃത്തിന്റെ നിര്ദേശപ്രകാരം മഹേഷ് രങ്കണ്ണദവരു എന്ന ആര്ക്കിടെക്റ്റിന്റെ അരികിലെത്തി. മാധവിയുടെ അതേ രൂപത്തിലും വലിപ്പത്തിലും ഉള്ള പ്രതിമ വീട്ടില് സ്ഥാപിക്കാമെന്ന നിര്ദേശം ഇയാളാണ് മുന്നോട്ട് വച്ചത്.
മഹേഷ് തന്നെയാണ് ബംഗളൂരുവിലെ ഏറ്റവും മികച്ച പാവ നിര്മ്മാതാക്കളായ ഗോംബെ മനെയുടെ സേവനം ഏര്പ്പാടാക്കി തന്നതും.. നിരാശനാകേണ്ടി വരില്ലായെന്ന് ഉറപ്പു ലഭിച്ചതോടെ ഒരു വര്ഷം മുമ്പോണ് ഭാര്യയുടെ രൂപത്തിലെ പാവ നിര്മ്മിക്കാന് അവരെ ഏല്പ്പിച്ചത്. മാധവിയുടെ നിരവധി ചിത്രങ്ങളും അയച്ചു കൊടുത്തിരുന്നുവെന്നും ശ്രീനിവാസ് പറയുന്നു.
https://www.facebook.com/Malayalivartha