ജാര്‍ഖണ്ഡില്‍ കോവിഡ് വ്യാപനം ശക്തമായി തുടരുന്നു. നിരവധി വി.ഐ.പികള്‍ക്കാണ് രോഗം സ്ഥിരീകരിക്കുന്നത്. ജാര്‍ഖണ്ഡിലെ കൃഷിവകുപ്പ് മന്ത്രി ബാദല്‍ പത്രലേഖിന് കോവിഡ് സ്ഥിരീകരിച്ചു. അദ്ദേഹം തന്നെയാണ് ഇക്കാര്യം ട്വിറ്ററിലൂടെ അറിയിച്ചത്. താനുമായി സമ്പര്‍ക്കത്തില്‍ വന്നവര്‍ കോവിഡ് പരിശോധന നടത്തണമെന്ന് മന്ത്രി ആവശ്യപ്പെട്ടു. ജാര്‍ഖണ്ഡ് മുന്‍ മുഖ്യമന്ത്രിയും ജെ.എം.എം. അധ്യക്ഷനുമായ ഷിബു സോറനും ഭാര്യ രൂപിക്കും വീട്ടിലെ ഏഴുപേര്‍ക്കും ശനിയാഴ്ച കോവിഡ് സ്ഥിരീകരിച്ചിരുന്നു. സോറന്റെ വീട്ടിലുള്ള 29 പേരില്‍ നടത്തിയ പരിശോധനയിലാണ് ഏഴുപേര്‍ക്ക് രോഗം സ്ഥിരീകരിച്ചത്.

രോഗബാധിതര്‍ വീട്ടില്‍ സമ്പര്‍ക്കവിലക്കിലാണ്. സോറന്റെ മകനും ജാര്‍ഖണ്ഡ് മുഖ്യമന്ത്രിയുമായ ഹേമന്ത് സോറന്റേയും ഭാര്യയുടെയും കോവിഡ് പരിശോധന തിങ്കളാഴ്ച നടക്കും.