ഉത്തര്പ്രദേശ് മന്ത്രി ചേതന് ചൗഹാന്റെ മരണം കോവിഡ് ബാധിച്ചല്ല; ചികിത്സ പിഴവുകൊണ്ടെന്ന് വെളിപ്പെടുത്തല്; വെളിപ്പെടുത്തല് സമാജ്വാദി പാര്ട്ടി നേതാവ് സുനില് സിങ് സജന്റെ; ഉത്തര് പ്രദേശില് രാഷ്ട്രീയ വിവാദം കൊഴുക്കുന്നു
ഉത്തര്പ്രദേശ് മന്ത്രിയും മുന് ഇന്ത്യന് ക്രിക്കറ്റ് താരവുമായിരുന്ന ചേതന് ചൗഹാന്റെ മരണം കോവിഡ് ബാധിച്ചല്ല, ചികില്സ പിഴവുകൊണ്ടെന്ന് വെളിപ്പെടുത്തല്. സമാജ്വാദി പാര്ട്ടി നേതാവ് സുനില് സിങ് സജനാണ് വെളിപ്പെടുത്തല് നടത്തിയത്. ഉത്തര്പ്രദേശ് മന്ത്രിസഭയില് സൈനിക ക്ഷേമം, ഹോം ഗാര്ഡ്സ്, പിആര്ഡി, സിവില് സെക്യൂരിറ്റി എന്നീ വകുപ്പുകളുടെ ചുമതലയുള്ള മന്ത്രിയായിരുന്ന ചൗഹാന്, ഇക്കഴിഞ്ഞ 16-ാം തീയതിയാണ് ഗുരുഗ്രാമിലെ ആശുപത്രിയില്വച്ച് മരിച്ചത്. കോവിഡ് സ്ഥിരീകരിച്ചതിനെ തുടര്ന്നാണ് അദ്ദേഹത്തെ ആശുപത്രിയില് പ്രവേശിപ്പിച്ചത്. അവിടെവച്ച് ആരോഗ്യനില വഷളായതിനെ തുടര്ന്ന് ഐസിയുവിലേക്ക് മാറ്റി. ചികിത്സയിലിരിക്കെ ഹൃദയസ്തംഭനമുണ്ടായതാണ് മരണ കാരണമായത്.എന്നാല്, കോവിഡ് ബാധിച്ചതല്ല എഴുപത്തിമൂന്നുകാരനായ ചൗഹാന്റെ മരണമെന്നാണ് സമാജ്വാദി പാര്ട്ടി നേതാവും എംഎല്സിയുമായ സുനില് സിങ് സജന്റെ വാദം. അദ്ദേഹത്തെ ആദ്യം പ്രവേശിപ്പിച്ചിരുന്ന സഞ്ജയ് ഗാന്ധി പോസ്റ്റ് ഗ്രാജ്വേറ്റ് ഇന്സ്റ്റിറ്റിയൂട്ട് ഓഫ് മെഡിക്കല് സയന്സസില് (എജിപിജിഐ) മോശം ചികിത്സയാണ് ലഭിച്ചതെന്ന് സുനില് ആരോപിച്ചു. സംസ്ഥാന സര്ക്കാരിന്റെ നിയന്ത്രണത്തിലുള്ള ആശുപത്രിയാണിത്. ചൗഹാന് ഈ ആശുപത്രിയില് ചികിത്സയില് കഴിയുമ്പോള് അതേ വാര്ഡില് ചികിത്സയിലുണ്ടായിരുന്ന വ്യക്തിയാണ് സുനില് സിങ്.
ഉത്തര്പ്രദേശിലെ ലെജിസ്ലേറ്റീവ് കൗണ്സില് അംഗമായ സുനില് സിങ് സജന്, ആശുപത്രിയില്വച്ച് താന് നേരിട്ട് കണ്ട കാര്യങ്ങള് കൗണ്സിലിലാണ് വിവരിച്ചത്. ഇതിന്റെ വിഡിയോ സമൂഹമാധ്യമങ്ങളില് വൈറലായി. ചേതന് ചൗഹാന് ഇന്ത്യയുടെ മുന് താരമാണെന്നോ സംസ്ഥാന മന്ത്രിയാണെന്നോ തിരിച്ചറിയാന് പോലും കഴിവില്ലാത്തവരായിരുന്നു ആശുപത്രി അധികൃതരെന്ന് കൗണ്സിലിലെ പ്രസംഗത്തില് സുനില് സിങ് ആരോപിച്ചു. 'ഒരു ദിവസം റൗണ്ട്സിനിടെ ഞങ്ങള് കിടക്കുന്ന വാര്ഡിലെത്തിയപ്പോള് ഡോക്ടറും നഴ്സും ആരാണ് ചേതന് എന്ന് ഉച്ചത്തില് വിളിച്ചുചോദിച്ചു. അദ്ദേഹം വളരെ ലാളിത്യമുള്ള വ്യക്തിയായതിനാല് കിടന്നകിടപ്പില്ത്തന്നെ കയ്യുയര്ത്തി. എപ്പോഴാണ് വൈറസ് ബാധിച്ചതെന്ന് അവര് അദ്ദേഹത്തോടു ചോദിച്ചു. ഉത്തരമായി എല്ലാ കാര്യങ്ങളും വിശദമായിത്തന്നെ അദ്ദേഹം ഡോക്ടറിനോടും നഴ്സിനോടും ഉള്പ്പെടെ വിശദീകരിച്ചു. ഇതിനിടെ ഒപ്പമുണ്ടായിരുന്ന മറ്റൊരാള്, 'എന്താണ് താങ്കളുടെ ജോലി' എന്ന് ചോദിച്ചു. യോഗി ആദിത്യനാഥ് സര്ക്കാരില് ഒരു മന്ത്രിയാണ് എന്നായിരുന്നു ചൗഹാന്റെ മറുപടി' സുനില് സിങ് വിശദീകരിച്ചു.
ചൗഹാനോടുള്ള ആശുപത്രി അധികൃതരുടെ പെരുമാറ്റം കണ്ടപ്പോള് കടുത്ത ദേഷ്യമാണ് തോന്നിയതെന്നും സുനില് സിങ് വ്യക്തമാക്കി. 'ഡോക്ടറുടെ വിഡ്ഢിച്ചോദ്യം കേട്ടപ്പോള് എനിക്ക് നിയന്ത്രണം നഷ്ടമായി. ഇന്ത്യയ്ക്കു വേണ്ടി ക്രിക്കറ്റ് കളിച്ചിട്ടുള്ളയാളാണ് ആ കിടക്കുന്നതെന്ന് ഞാന് ശബ്ദമുയര്ത്തി പറഞ്ഞു. 'ഓ, ഇതാണോ ആ ചേതന്' എന്നായിരുന്നു ഡോക്ടറുടെ പ്രതികരണം. ഇതിനു ശേഷം ഡോക്ടരും സംഘവും അവിടെനിന്നു പോയി' സുനില് സിങ് പറഞ്ഞു. സുനില് സിങ്ങിന്റെ വെളിപ്പെടുത്തലിനു പിന്നാലെ യോഗി ആദിത്യനാഥ് സര്ക്കാരിനെ വിമര്ശിച്ച് സമാജ്വാദി പാര്ട്ടി നേതാവ് അഖിലേഷ് യാദവ് രംഗത്തെത്തി.
'കോവിഡ് 19നെതിരായ നമ്മുടെ പോരാട്ടത്തെ അമേരിക്കയുമായി താരതമ്യം ചെയ്യുന്ന തിരക്കില്, തന്റെ സഹപ്രവര്ത്തകന് സര്ക്കാര് ആശുപത്രിയിലുണ്ടായ ദുരനുഭവം ഉത്തര്പ്രദേശ് മുഖ്യമന്ത്രി മറന്നുപോയി' അഖിലേഷ് യാദവ് ട്വിറ്ററില് കുറിച്ചു. അതേസമയം, ചികിത്സയ്ക്കിടെ ചൗഹാനുമായി പലതവണ നേരിട്ട് സംസാരിച്ചിരുന്നെങ്കിലും ഇങ്ങനെയൊരു സംഭവത്തെക്കുറിച്ച് അദ്ദേഹം പറഞ്ഞിട്ടില്ലെന്ന് എസ്ജിപിജിഐ ഡയറക്ടര് ഡോ. ആര്.കെ. ധിമന് വ്യക്തമാക്കി. ചികിത്സയില് കഴിയുമ്പോള് കുടുംബപരമായ കാരണങ്ങള് പറഞ്ഞാണ് അദ്ദേഹം ആശുപത്രി മാറിയതെന്നും ധിമന് അറിയിച്ചു. എന്തായാലും സംഭവത്തെക്കുറിച്ച് അന്വേഷിക്കുമെന്നും അദ്ദേഹം വ്യക്തമാക്കി.
https://www.facebook.com/Malayalivartha
