'ഞാന്‍ ദുഃഖിതയാണ്, 2 മണിക്കൂറിനുള്ളില്‍ ആരെങ്കിലും എന്നെ സഹായിച്ചില്ലെങ്കില്‍ ഞാന്‍ ആത്മഹത്യ ചെയ്യും' എന്നു പറഞ്ഞുകൊണ്ടുള്ള ഒരുഇ-മെയില്‍ ഇന്ത്യയുടെ തലസ്ഥാനത്തു നിന്ന് അര്‍ധരാത്രിയിലാണ് ബ്രിട്ടിഷ് പ്രധാനമന്ത്രിയുടെ വിലാസത്തില്‍ ലഭിച്ചത്. അപൂര്‍ണമായ ഡല്‍ഹി വിലാസവും ഫോണ്‍ നമ്പറുമായിരുന്നു ആ ഇമെയിലില്‍ പറഞ്ഞിരുന്നത്.

ഇമെയില്‍ അയയ്ക്കുമ്പോള്‍, ഇരുരാജ്യങ്ങളുടെയും തന്ത്രപ്രധാന ഓഫിസുകള്‍ ഇടപെടുമെന്നോ തലസ്ഥാനത്തെ പൊലീസ് തന്റെ ജീവന്‍ കാക്കാന്‍ ഉറക്കമൊഴിക്കുമെന്നോ ആ 43-വയസ്സുകാരി കരുതിയിട്ടുണ്ടാകില്ല.

ബ്രിട്ടിഷ് പ്രധാനമന്ത്രിയുടെ വിലാസത്തില്‍ ലഭിച്ച ആ മെയില്‍ ഇന്ത്യന്‍ എംബസിയിലേക്കും അവിടെ നിന്ന് ആഭ്യന്തരമന്ത്രാലയത്തിലേക്കും ഫോര്‍വേഡ് ചെയ്യപ്പെട്ടു. മന്ത്രാലയത്തിലെ ഉദ്യോഗസ്ഥര്‍ ഡല്‍ഹി പൊലീസ് കണ്‍ട്രോള്‍ റൂമില്‍ അറിയിച്ചു. ഡല്‍ഹിയിലെ രോഹിണി അമന്‍ വിഹാര്‍ പൊലീസ് സ്റ്റേഷന്‍ പരിധിയിലാണ് സ്ഥലം. ഫോണ്‍ വിളിച്ചിട്ട് എടുക്കുന്നില്ല. രാത്രി ഒരു മണിയോടെ പൊലീസ് പ്രദേശത്തെ ഓരോ വീടും കയറിയിറങ്ങി പരിശോധന ആരംഭിച്ചു.

പോലീസ് സംഘം 3 മണിയോടെ വീട് കണ്ടെത്തിയെങ്കിലും വാതില്‍ തുറന്നില്ല. തുടര്‍ന്നു വാതില്‍ പൊളിച്ച് കയറുമ്പോള്‍ 16 പൂച്ചകള്‍ക്കൊപ്പം ദുര്‍ഗന്ധം വമിക്കുന്ന വീട്ടിനുള്ളില്‍ ഒരു സ്ത്രീയെ അവര്‍ കണ്ടെത്തി. ഡല്‍ഹി മുനിസിപ്പല്‍ കോര്‍പറേഷനില്‍ അധ്യാപികയായിരുന്ന അവര്‍ വിവാഹമോചനവും കടക്കെണിയും മൂലം മാനസികമായി തകര്‍ന്ന നിലയിലായിരുന്നു. പുലര്‍ച്ചെ 3 മണിക്ക് പൊലീസ് സംഘം വാതില്‍ പൊളിച്ച് അകത്തുകയറുമ്പോള്‍ ആ സ്ത്രീ പൊട്ടിക്കരഞ്ഞു.

ലോണുകളും വീട്ടുബില്ലുകളും വാടകയും അടയ്ക്കാന്‍ സഹായം തേടിയാണു ബ്രിട്ടിഷ് പ്രധാനമന്ത്രിക്ക് മെയില്‍ അയച്ചതെന്നും കൗണ്‍സലിങ്ങും പരിചരണവും മൂലം അവരുടെ സ്ഥിതി മെച്ചപ്പെട്ടതായും ഡല്‍ഹി പൊലീസ് അറിയിച്ചു.