എലിശല്യത്തെ തുടര്‍ന്ന് എയര്‍ ഇന്ത്യ വിമാനം അടിയന്തരമായി നിലത്തിറക്കി. ജമ്മു കശ്മീരിലെ ലേ വിമാനത്താവളത്തില്‍ കഴിഞ്ഞ ദിവസമാണ് സംഭവം. എയര്‍ബസ് എ320 യാണ് അടിയന്തരമായി നിലത്തിറക്കിയത്. വിമാനം പറന്നുയര്‍ന്ന ശേഷമാണ് ഏതാനും എലികള്‍ ഉള്ളിലുണ്ടെന്ന കാര്യം അധികൃതര്‍ അറിഞ്ഞത്. ഡല്‍ഹിയില്‍ നിന്നെത്തിയ ഉപകരണം ഉപയോഗിച്ച് വിമാനത്തില്‍ ഫോഗിങ് നടത്തി എലികളെ പുറത്ത് ചാടിച്ചു. സംഭവം വലിയ സുരക്ഷാ വീഴ്ചയായാണ് അധികൃതര്‍ വിലയിരുത്തുന്നത്.
എലികള്‍ വിമാനത്തിനുള്ളിലെ കേബിളുകള്‍ നശിപ്പിച്ചാല്‍ വന്‍ ദുരന്തത്തിന് കാരണമാകുമായിരുന്നു. ഈ സാഹചര്യത്തിലാണ് എളികളെ കണ്ടെയുടന്‍ വിമാനം നിലത്തിറക്കാന്‍ പൈലറ്റ് തീരുമാനിച്ചത്. വിമാനത്തിലെ വൃത്തി ഹീനമായ അന്തരീക്ഷമല്ല എലികളെ എത്തിച്ചതെന്നാണ് എയര്‍ ഇന്ത്യയുടെ വിശദീകരണം. എന്നാല്‍ വിമാനത്തില്‍ വിളമ്പുന്ന ഭക്ഷണത്തിന്റെ ഗുണ നിലവാരമാണ് എലിയെത്തല്‍ ഉയര്‍ത്തുന്നതെന്ന വാദവും സജീവമാണ്.
വിമാനത്തിന്റെ ഇലക്ട്രിക് വയറുകളൊന്നും എലികള്‍ കരണ്ടു നശിപ്പിച്ചിട്ടില്ലെന്നും അതിനാല്‍ സുരക്ഷാ പ്രശ്‌നമില്ലെന്നും എയര്‍ ഇന്ത്യ അറിയിച്ചു. വിമാനത്തിലേക്ക് ഭക്ഷണം കൊണ്ടുവന്ന വസ്തുക്കളിലൂടെയാകാം എലികള്‍ എത്തിയതെന്നാണ് പ്രാഥമിക നിഗമനം.
മുമ്പും എലിയുടെ സാന്നിധ്യത്തിലൂടെ എയര്‍ ഇന്ത്യാ വിമാനങ്ങള്‍ വാര്‍ത്തകളില്‍ എത്തിയിട്ടുണ്ട്. കോക്പിറ്റില്‍ നിന്നു പോലും പൈലറ്റുമാര്‍ എലിയെ പിടിച്ച സംഭവങ്ങള്‍ എയര്‍ ഇന്ത്യയുടെ ചരിത്രത്തിന്റെ ഭാഗമാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha