പണവും അതിനേക്കാള്‍ വിലയുള്ള കാര്‍ഡുകളും അടങ്ങിയ തന്റെ പഴ്‌സ് കഴിഞ്ഞ ദിവസം നഷ്ടപ്പെട്ടതായും അത് ഒരു ഓട്ടോക്കാരന് ലഭിച്ചുവെന്നും അദ്ദേഹം അത് കൊണ്ടുവന്ന് തന്നെന്നും നടന്‍ മണിയന്‍പിള്ള രാജു സോഷ്യല്‍ മീഡിയയിലൂടെ അറിയിച്ചിരുന്നു. പഴ്‌സ് തിരികെയെത്തിച്ച ആളിനൊപ്പമുള്ള ചിത്രം പങ്കുവച്ചുകൊണ്ടായിരുന്നു പോസ്റ്റ്. അയാള്‍ക്ക് നന്ദി അറിയിച്ചുകൊണ്ടുള്ള പോസ്റ്റിന് താഴെ വന്ന ഒരു കമന്റിനും നടന്‍ മറുപടി നല്‍കിയിരിക്കുകയാണ്. നന്ദി മാത്രമേ ഉള്ളോ എന്നായിരുന്നു പോസ്റ്റിന് താഴെ ഒരാളുടെ ചോദ്യം. ബാക്കി എന്ത് ചെയ്തു എന്നത് പോസ്റ്റില്‍ ഇടേണ്ട കാര്യമുണ്ടോ എന്നായിരുന്നു ഇതിന് മണിയന്‍പിള്ള രാജുവിന്റെ മറുപടി.

മണിയന്‍പിള്ള രാജുവിന്റെ പോസ്റ്റിന്റെ പൂര്‍ണ്ണരൂപം:

നമസ്‌കാരം. ഒരു സന്തോഷം നിങ്ങളോട് പങ്കുവയ്ക്കുവാന്‍ തോന്നി...

കഴിഞ്ഞ ദിവസം എന്റെ പേഴ്‌സ് കളഞ്ഞു പോയി... അതില്‍ കുറച്ച് പൈസയും പൈസയ്ക്കാള്‍ വിലയുള്ള കാര്‍ഡുകളും ഉണ്ടായിരുന്നു.

എല്ലാം നഷ്ടപ്പെട്ടെന്ന് വിചാരിച്ചിരുന്നപ്പോഴാണ് ദൈവം മണികണ്ഠ സയൂജ് (സാബു) എന്ന ഒരു ഓട്ടോകാരന്റെ രൂപത്തില്‍ വന്നത്...

എന്റെ പേഴ്‌സ് കളഞ്ഞു കിട്ടിയത് അവര്‍ക്കാണ്.. എന്റെ വീട് അന്വേഷിച്ചു കണ്ടെത്തി സാബുവും ഭാര്യ ഉഷയും ചേര്‍ന്ന് എന്റെ വീട്ടില്‍ കൊണ്ട് വന്ന് തരുകയായിരുന്നു.

വളരെയധികം സന്തോഷം നല്‍കിയ സമയം ആയിരുന്നു അത്..

അവരുടെ ഈ നന്മക്ക് എല്ലാവിധ നന്ദിയും കടപ്പാടും അറിയിക്കുന്നു... അവരെയും കുടുംബത്തെയും ദൈവം അനുഗ്രഹിക്കട്ടെ...