ജീവിതത്തില് എല്ലാം നഷ്ടപ്പെട്ടപ്പോള് രക്ഷയായത് ബേസില് ആണെന്ന് കുടശ്ശനാട് കനകം
'ജയ ജയ ജയ ജയ ഹേ' എന്ന ചിത്രത്തിലെ അമ്മമകന് കോംബോ ഏറെ ശ്രദ്ധ നേടിയിരുന്നു. ചിത്രത്തില് അമ്മയായി കുടശ്ശനാട് കനകവും മകനായി ബേസിലുമായിരുന്നു വേഷമിട്ടത്. തുടര്ന്ന് 'ഗുരുവായൂര് അമ്പലനടയില്' എന്ന ചിത്രത്തിലും കനകം അഭിനയിച്ചിട്ടുണ്ട്. ഇപ്പോഴിതാ തന്റെ മകന് മരിച്ച് ജീവിതത്തില് ഒറ്റപ്പെട്ടുപോയ നിമിഷം താങ്ങായി നിന്നത് ബേസിലാണെന്നു പറയുകയാണ് നടി. ഒരു മീഡിയയ്ക്ക് നല്കിയ അഭിമുഖത്തില് ആണ് കുടശ്ശനാട് കനകം മനസുതുറന്നത്.
'എന്റെ മകന് മരിച്ചപ്പോള് ബേസില് എനിക്ക് പണം തന്നു സഹായിച്ചിരുന്നു. ബേസില് ജോസഫ് എനിക്ക് മകനെപ്പോലെയാണ്. ഞാന് തനിച്ചാണ് ജീവിക്കുന്നത്. നാടകത്തില് വര്ക്ക് ചെയ്തതിന്റെ പെന്ഷന് കിട്ടുന്നുണ്ട്. കയ്യില് ഉള്ളതെല്ലാം നുള്ളിപ്പെറുക്കി ആണ് മകന് മരിച്ചപ്പോള് ഉള്ള കാര്യങ്ങള് എല്ലാം നടത്തിയത്. കയ്യില് ഉള്ളതെല്ലാം തീര്ന്നപ്പോള് ഇനി ഞാന് എങ്ങനെ മുന്നോട്ട് പോകും എന്ന് അന്തം വിട്ടു നിന്നു. ഉടനെ ഞാന് ബേസിലിനെ വിളിച്ചു.ഗ ഒറ്റ വിളിക്ക് എടുത്തു. 'മോനേ എനിക്ക് ഫെബ്രുവരിയില് ഒരു നാലഞ്ച് ദിവസത്തെ വര്ക്ക് തരണം. മോന്റെ സിനിമയില് ഇല്ലെങ്കില് പരിചയമുള്ള സംവിധായകരോട് പറഞ്ഞ് എനിക്ക് വര്ക്ക് വാങ്ങി തരണം' എന്ന് പറഞ്ഞു. 'അതിനെന്താ അമ്മേ… നമുക്ക് ചെയ്യാമല്ലോ. ഞാന് തീര്ച്ചയായും ശ്രമിക്കാം' എന്ന് പറഞ്ഞു.
കുറച്ചു കഴിഞ്ഞപ്പോള് ബേസിലിന്റെ മാനേജര് വിളിച്ചിട്ട് പറഞ്ഞു, അമ്മയെ ബേസിലിനു ഒരുപാട് ഇഷ്ടമാണ്, അമ്മയുടെ ഗൂഗിള് പേ നമ്പര് ഇതാണോ' എന്ന് ചോദിച്ചു. ഞാന് പറഞ്ഞു, 'അയ്യോ ഞാന് പൈസയ്ക്ക് അല്ല വിളിച്ചത്, വര്ക്ക് കിട്ടാന് ആണ്, എനിക്ക് പൈസ ഇട്ടു തരല്ലേ' എന്ന് പറഞ്ഞു. പക്ഷേ, അവന് 30,000 രൂപ ഇട്ടു തന്നു. ഇതൊക്കെ മീഡിയയുടെ മുന്നില് പറഞ്ഞാല് ബേസില് എന്നെ വഴക്കു പറയും. എന്റെ മകന് മരിച്ചു. ഇനി എനിക്ക് ഇവരൊക്കെ തന്നെയാണ് മക്കള്', നടിയുടെ വാക്കുകള്.
മലയാള നാടകസിനിമ രംഗത്തെ കരുത്തുറ്റ ഒരു അഭിനേത്രിയാണ് കുടശ്ശനാട് കനകം. പതിറ്റാണ്ടുകളോളം പ്രഫഷണല് നാടകവേദികളില് സജീവമായിരുന്ന അവര്, നാടകത്തിലെ മികച്ച പ്രകടനത്തിന് സംസ്ഥാന സര്ക്കാരിന്റെ പുരസ്കാരം വരെ സ്വന്തമാക്കിയിട്ടുണ്ട്. 'മിസ്റ്റര് ആന്ഡ് മിസിസ് ബാച്ചിലര്', 'മരണമാസ്' തുടങ്ങിയ ചിത്രങ്ങളിലും ശ്രദ്ധേയമായ വേഷങ്ങള് കൈകാര്യം ചെയ്തിട്ടുണ്ട്. ഇന്ദ്രന്സിനെ നായകനാക്കി ജോണ് പോള് ജോര്ജ് സംവിധാനം ചെയ്ത 'ആശാന്' ആണ് കനകത്തിന്റെ ഏറ്റവും പുതിയ ചിത്രം. സിനിമയില് വയലറ്റ് എന്ന വേറിട്ട കഥാപാത്രത്തെണ് താരം അവതരിപ്പിച്ചത്.
https://www.facebook.com/Malayalivartha
