അവകാശലംഘന നോട്ടീസ് കൊണ്ടുവന്നാലോ കേസ് എടുത്താലോ തനിക്ക് ഒന്നും സംഭവിക്കില്ല; ബിജെപിയുടെ അയോഗ്യതാ നീക്കത്തെ വെല്ലുവിളിച്ച് രാഹുല് ഗാന്ധി
അയോഗ്യനാക്കാനുള്ള ബി ജെ പി നീക്കത്തെ വെല്ലുവിളിച്ച് പ്രതിപക്ഷ നേതാവ് രാഹുല് ഗാന്ധി. അവകാശലംഘന നോട്ടീസ് കൊണ്ടുവന്നാലോ കേസ് എടുത്താലോ തനിക്ക് ഒന്നും സംഭവിക്കില്ലെന്ന് രാഹുല് ഗാന്ധി പറഞ്ഞു. രാജ്യത്തെ കാര്ഷിക മേഖല മോദി വിറ്റെന്നും സത്യം പറഞ്ഞതിനാണ് തനിക്ക് എതിരായ നീക്കം എന്നും വീഡിയോ സന്ദേശത്തില് അദ്ദേഹം വ്യക്തമാക്കി. ജനറല് എം എം നരവനെയുടെ പ്രസിദ്ധീകരിക്കാത്ത പുസ്തകത്തിന്റെ ഭാഗങ്ങള് പാര്ലമെന്റില് വായിച്ചതും ബജറ്റിനെതിരെ നടത്തിയ വിമര്ശനങ്ങളുടെയും പശ്ചാത്തലത്തില് ബി ജെ പി എം പി നിഷികാന്ത് ദുബെ ആണ് രാഹുലിനെതിരെ അവകാശലംഘന നോട്ടിസ് നല്കിയത്. രാഹുലിനെ അയോഗ്യനാക്കണമെന്നും തിരഞ്ഞെടുപ്പില് മല്സരിക്കുന്നതില് നിന്ന് അജീവനാന്തം വിലക്കണമെന്നുമടക്കമുള്ള ആവശ്യങ്ങളാണ് ദുബൈ മുന്നോട്ട് വച്ചിരിക്കുന്നത്.
നേരത്തെ ദേശീയ പണിമുടക്കിന് ഐക്യദാര്ഡ്യം അറിയിച്ചും രാഹുല് ഗാന്ധി രംഗത്തെത്തിയിരുന്നു. ഭാവിക്കായുള്ള തീരുമാനം എടുക്കുമ്പോള് തൊഴിലാളികളെ പൂര്ണമായും അവഗണിച്ചെന്നും മോദി ഇനിയെങ്കിലും അവരെ കേള്ക്കുമോ, അതോ മോദിക്ക് മേലുള്ള പിടുത്തം അത്രയ്ക്ക് കടുത്തതാണോ എന്നാണ് രാഹുല് എക്സിലൂടെ ചോദിച്ചത്. ഇന്ന് രാജ്യത്തുടനീളം ലക്ഷക്കണക്കിന് തൊഴിലാളികളും കര്ഷകരും അവരുടെ അവകാശങ്ങള്ക്കായി ശബ്ദമുയര്ത്തി തെരുവിലിറങ്ങിയിരിക്കുകയാണ്. നാല് തൊഴില് നിയമസംഹിതകള് (ലേബര് കോഡുകള്) അവരുടെ അവകാശങ്ങളെ ദുര്ബലപ്പെടുത്തുമെന്ന് തൊഴിലാളികള് ഭയപ്പെടുന്നുവെന്നും രാഹുല് അഭിപ്രായപ്പെട്ടു. വ്യാപാര കരാര് അവരുടെ ജീവിതോപാധിയെ ബാധിക്കുമെന്ന് കര്ഷകര് ആശങ്കപ്പെടുന്നു. തൊഴിലുറപ്പ് പദ്ധതിയെ ദുര്ബലപ്പെടുത്തുകയോ ഇല്ലാതാക്കുകയോ ചെയ്താല് ഗ്രാമങ്ങളുടെ അവസാന ആശ്രയവും നഷ്ടപ്പെടുമെന്ന ഭയവും നിലനില്ക്കുന്നു. അവരുടെ ഭാവിയെക്കുറിച്ച് തീരുമാനങ്ങള് എടുത്തപ്പോള് അവരുടെ ശബ്ദം അവഗണിക്കപ്പെട്ടു. തൊഴിലാളികളുടെയും കര്ഷകരുടെയും പ്രശ്നങ്ങളോടും പോരാട്ടങ്ങളോടും ഞാന് ഉറച്ചുനില്ക്കുന്നുവെന്നും രാഹുല് എക്സില് കുറിച്ചു.
കേന്ദ്ര സര്ക്കാര് നയങ്ങളില് പ്രതിഷേധിച്ച് തൊഴിലാളി സംഘടനകള് രാജ്യവ്യാപകമായി പ്രഖ്യാപിച്ച പൊതുപണിമുടക്കില് ബാധിക്കപ്പെടാതെ മഹാനഗരങ്ങള്. ദില്ലിയിലും മുംബൈയിലും ബെംഗളൂരുവിലും ചെന്നൈയിലും ജനജീവിതം സാധാരണ പോലെയായിരുന്നു. വാഹനഗതാഗതം തടസപ്പെടുകയോ കടകമ്പോളങ്ങള് അടഞ്ഞുകിടക്കുകയോ ചെയ്തില്ല. ഓഫീസുകളും സാധാരണ രീതിയില് തന്നെ പ്രവര്ത്തിച്ചു. ദേശീയ പണിമുടക്കുകളോടും ഹര്ത്താലുകളോടും മുഖം തിരിക്കുന്ന പതിവിന് ഇക്കുറിയും ബെംഗളൂരുവിലും ഇതര ജില്ലകളിലും മാറ്റമുണ്ടായില്ല. കടകമ്പോളങ്ങളെല്ലാം തുറന്നു പ്രവര്ത്തിച്ചു. മാര്ക്കറ്റുകളിലും ജനത്തിരക്ക് അനുഭവപ്പെട്ടു.
സര്ക്കാര് ഉദ്യോഗസ്ഥരുടെ സംഘടനകളും സമരത്തിന് ആഹ്വാനം ചെയ്തവരുടെ കൂട്ടത്തിലുണ്ടായിരുന്നുവെങ്കിലും ഓഫീസുകളുടെ പ്രവര്ത്തനത്തെ ബാധിച്ചില്ല. ബാങ്കിംഗ് ഇന്ഷുറന്സ് മേഖലകളും സാധാരണ പോലെ പ്രവര്ത്തിച്ചു. കര്ണാടക ട്രാന്സ്പോര്ട്ട് കോര്പ്പറേഷന് ബസുകളും സാധാരണ പോലെ സര്വീസ് നടത്തി. കേരളത്തിലേക്കുള്ള ട്രാന്സ്പോര്ട്ട് ബസുകള് കെഎസ്ആര്ടിസിയും പതിവുപോലെ ഓടിച്ചു. വിവിധ സംഘടനകള് ഫ്രീഡം പാര്ക്കിലും ടൗണ്ഹാളിന് മുന്നിലും പ്രകടനം നടത്തി എന്നതൊഴിച്ചാല് സാധാരണ ദിവസം തന്നെയായിരുന്നു ബെംഗളൂരുവിന് ഇന്നും. തമിഴ്നാട്ടിനെയും ദേശീയ പണിമുടക്ക് ബാധിച്ചില്ല.
https://www.facebook.com/Malayalivartha
