പുതുയുഗ യാത്രയുടെ വേദിയിൽ നേതാക്കൾ തമ്മിൽ ഉന്തും തള്ളും ഉണ്ടായെന്ന പ്രചാരണത്തിൽ പ്രതികരിച്ച് ഡിസിസി പ്രസിഡന്റ് അഡ്വ. കെ പ്രവീൺ കുമാർ. പ്രചാരണം വാസ്തവ വിരുദ്ധമെന്ന് അദ്ദേഹം പറഞ്ഞു . വേദിയിൽ വടകര എംപി ഷാഫി പറമ്പിൽ പ്രസംഗിക്കണമെന്ന് പ്രവർത്തകർ ആവശ്യപ്പെട്ടു. അപ്പോഴുണ്ടായ സ്‌നേഹതള്ളൽ മാത്രമാണ് അത്. അതിനെ ഉന്തും തള്ളുമായി വ്യാഖ്യാനിക്കരുത്.

ജാഥ വൈകിയതിനാൽ പാറക്കൽ അബ്ദുള്ളയും എം കെ രാഘവനും സംസാരിക്കട്ടെയെന്ന് ഷാഫി പറമ്പിൽ പറഞ്ഞു. ഷാഫിക്ക് നീരസം ഉണ്ടായിട്ടില്ല. ഷാഫി സംസാരിക്കണമെന്ന് വീണ്ടും പ്രവർത്തകർ ആവശ്യപ്പെട്ടപ്പോൾ തന്നെ വിളിക്കരുതെന്ന് പറഞ്ഞ് സ്‌നേഹതള്ളൽ നടത്തിയതാണ്. സ്‌നേഹത്തള്ളിനെ ഉന്തും തള്ളലുമാക്കരുതെന്നും ഡിസിസി പ്രസിഡന്റ് വ്യക്തമാക്കി.

'സോഷ്യൽമീഡിയയിലെ സൈബർ ആക്രമണം ഉൾകൊള്ളാം. മാധ്യമങ്ങൾ വാസ്തവ വിരുദ്ധമായ വാർത്ത കൊടുക്കരുത്. വാസ്തവ വിരുദ്ധമായ വാർത്തകളാണ് ഇന്നലെ വന്നത്. ദയവായി അതിന്റെ പിന്നാലെ പോകരുതെന്നും ജാഥയ്ക്ക് ജനങ്ങൾക്കിടയിൽ നിന്നുണ്ടായ പ്രതികരണം, ജനപങ്കാളിത്തം അതൊക്കെയല്ലേ ചർച്ചയാക്കേണ്ടതെന്നും പ്രവീൺകുമാർ കൂട്ടിച്ചേർത്തു.