ബീഹാറില് നാളെ ഭാരതയുദ്ധം, ഒന്നാംഘട്ട പ്രചാരണം അവസാനിച്ചു, ആദ്യഘട്ടത്തിന് തിങ്കളാഴ്ച തുടക്കമാകും
ഇന്ത്യന്രാഷ്ട്രീയം ഉറ്റുനോക്കുന്ന ബിഹാര് നിയമസഭാ തെരഞ്ഞെടുപ്പിന്റെ ആദ്യഘട്ടത്തിന് തിങ്കളാഴ്ച തുടക്കമാകും. സംസ്ഥാനത്തെ 243 സീറ്റുകളില് 49 എണ്ണത്തിലാണ് തെരഞ്ഞെടുപ്പ് നടക്കുക. നവംബര് അഞ്ചുവരെ അഞ്ചുഘട്ടങ്ങളായാണ് വോട്ടെടുപ്പ്. ആദ്യഘട്ട തെരഞ്ഞെടുപ്പുപ്രചാരണം ശനിയാഴ്ച വൈകീട്ട് അവസാനിച്ചു.
മുഖ്യമന്ത്രി നിതീഷ് കുമാറിന്റെ ജനതാദള് (യുനൈറ്റഡ്), മുന് മുഖ്യമന്ത്രി ലാലുപ്രസാദ് യാദവിന്റെ രാഷ്ട്രീയ ജനതാദള്, കോണ്ഗ്രസ് എന്നിവര് ചേര്ന്ന വിശാല ഐക്യസഖ്യവും ബി.ജെ.പി, മുന് മുഖ്യമന്ത്രി
ജിതന്റാം മാഞ്ചിയുടെ ഹിന്ദുസ്ഥാന് അവാം മോര്ച്ച, കേന്ദ്രമന്ത്രി രാംവിലാസ് പസ്വാന്റെ എല്.ജെ.പി, ഉപേന്ദ്ര കുഷ്വാഹയുടെ ആര്.എല്.എസ്.പി എന്നിവ അടങ്ങിയ ദേശീയ വികസനസഖ്യവും തമ്മിലാണ് മുഖ്യ പോരാട്ടം. സി.പി.എം, സി.പി.ഐ, സി.പി.ഐഎം.എല് (ലിബറേഷന്), ആര്.എസ്.പി, എസ്.യു.സി.ഐ, ഫോര്വേഡ് ബ്ളോക് എന്നിവരടങ്ങിയ ഇടത് ബ്ളോക്കും ഏതാണ്ടെല്ലാ സീറ്റിലും മത്സരിക്കുന്നുണ്ട്. സമാജ്വാദി പാര്ട്ടി, എന്.സി.പി, പപ്പുയാദവിന്റെ ജനാധികാര് പാര്ട്ടി, മുന് കേന്ദ്രമന്ത്രി നഗ്മണിയുടെ സംരസ് സമാജ് പാര്ട്ടി, മുന് ലോക്സഭാ സ്പീക്കര് പി.എ. സങ്മയുടെ നാഷനലിസ്റ്റ് പീപ്ള്സ് പാര്ട്ടി, മുന് കേന്ദ്രമന്ത്രി ദേവേന്ദ്ര പ്രസാദിന്റെ സമാജ്വാദി ജനതാപാര്ട്ടി എന്നിവ ചേര്ത്ത് തട്ടിക്കൂട്ടിയ മൂന്നാംമുന്നണി, ബി.എസ്.പി, മജ്ലിസെ ഇത്തിഹാദുല് മുസ്ലിമീന്, ഝാര്ഖണ്ഡ് മുക്തിമോര്ച്ച തുടങ്ങിയ കക്ഷികളും രംഗത്തുണ്ട്.
ബിഹാറിന്റെ പിന്നാക്കാവസ്ഥക്ക് പരിഹാരം ഉറപ്പാക്കുമെന്ന പ്രഖ്യാപനവുമായി പ്രധാനമന്ത്രി നരേന്ദ്ര മോദിയും ബി.ജെ.പി അധ്യക്ഷന് അമിത് ഷായും നേരിട്ടിറങ്ങിയാണ് എന്.ഡി.എയുടെ പ്രചാരണത്തിന് ചുക്കാന് പിടിക്കുന്നത്. റാലികളിലെല്ലാം വന് പങ്കാളിത്തമുണ്ട്. ലോക്സഭാ തെരഞ്ഞെടുപ്പിന് തുല്യമായ മോദിതരംഗം സംസ്ഥാനത്ത് ഇപ്പോഴും നിലനില്ക്കുന്നുവെന്നാണ് പാര്ട്ടിയുടെ കണക്കുകൂട്ടല്. സംസ്ഥാനത്ത് 40ലേറെ റാലികളില് മോദി പ്രസംഗിക്കും. മുഖ്യമന്ത്രി നിതീഷ്കുമാറിന്റെ നേട്ടങ്ങളും പിന്നാക്ക മുസ്ലിം രക്ഷകനെന്ന ലാലുവിന്റെ ഇമേജുമാണ് മഹാസഖ്യം വോട്ടാക്കി മാറ്റാന് ശ്രമിക്കുന്നത്.
കോണ്ഗ്രസ് അധ്യക്ഷ സോണിയ ഗാന്ധിയുടെയും ഉപാധ്യക്ഷന് രാഹുല് ഗാന്ധിയുടെയും യോഗങ്ങളില് മികച്ച പങ്കാളിത്തമുണ്ടായത് സംസ്ഥാനത്ത് മരണശയ്യയിലായ കോണ്ഗ്രസിന് തെല്ലുജീവന് പകര്ന്നിട്ടുണ്ട്. അഭിപ്രായവോട്ടെടുപ്പുകളുടെ ഫലം പലവിധമെങ്കിലും എന്.ഡി.എ സഖ്യം അധികാരം നേടുമെന്നാണ് കൂടുതല് സര്വേകള് സൂചിപ്പിച്ചത്. എന്നാല്, മുഖ്യമന്ത്രിസ്ഥാനത്തേക്ക് കൂടുതല്പേരും ആഗ്രഹിക്കുന്നത് നിതീഷികുമാറിനെയാണ്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
