സംസ്ഥാനത്ത് ഈ മാസം അവസാന വാരത്തോടെ വേനൽ മഴ ശക്തമായേക്കുമെന്ന് കാലാവസ്ഥ നിരീക്ഷണ കേന്ദ്രം. തിങ്കളാഴ്ചയോടെ കേരളത്തിൽ ഇപ്പോഴുള്ള അതികഠിനമായ ചൂടിന് അൽപ്പം ശമനം ഉണ്ടായേക്കുമെന്നും കാലാവസ്ഥ വകുപ്പ് വിലയിരുത്തുകയും ചെയ്യുന്നു.

വടക്കൻ കർണാടകയ്ക്കും മഹാരാഷ്ട്രയ്ക്കും മുകളിലായി ഉണ്ടായിരുന്ന എതിർ ചക്രവാതമാണ് സംസ്ഥാനത്ത് കഴിഞ്ഞദിവസങ്ങളിലെല്ലാം താപനില വളരെ കഠിനമായി ഉയരാനായി കാരണമായത്. ഇതുമൂലം രാത്രി സമയത്തു പോലും അന്തരീക്ഷം തണുക്കാത്ത സ്ഥിതിയുണ്ടായി. ഇതോടെ രാത്രിയിലും കഠിനമായ ചൂടാണ് അനുഭവപ്പെട്ടിരുന്നത്.

ഇടി മഴമേഘങ്ങളെ തടഞ്ഞതും ഉയർന്ന താപനില തുടരാൻ കാരണമായി. ഇന്നത്തോടെ എതിർ ചക്രവാതം ദുർബലമായേക്കും. അതോടെ അന്തരീക്ഷം കൂടുതൽ തണുക്കാൻ ഇടയാക്കിയേക്കും.

കൂടുതൽ മഴമേഘങ്ങൾക്കും, ഉച്ചയ്ക്ക് ശേഷം മഴ ലഭിക്കാനും ഇടയാക്കിയേക്കുമെന്നാണ് കാലാവസ്ഥ വകുപ്പിന്റെ നിഗമനം. ഏപ്രിൽ അവസാന വാരത്തോടെ വേനൽമഴ സജീവമാകുമെന്നും കാലാവസ്ഥ വകുപ്പ് സൂചിപ്പിക്കുകയും ചെയ്യുന്നു.