ഉത്തര്‍പ്രദേശിലെ ദാദ്രിയില്‍ ബീഫ് കഴിച്ചുവെന്ന അഭ്യൂഹത്തെത്തുടര്‍ന്ന് വയോധികനെ കൊലപ്പെടുത്തിയതുപോലെയുള്ള സംഭവങ്ങള്‍ ബി.ജെ.പിക്കും എന്‍.ഡി.എയ്ക്കും ദോഷമുണ്ടാക്കുമെന്ന് കേന്ദ്ര പ്രതിരോധമന്ത്രി മനോഹര്‍ പരീക്കര്‍. ഞായറാഴ്ച രാത്രി നടന്ന പൊതുപരിപാടിയില്‍ സംസാരിക്കവെയാണ് അദ്ദേഹം ഇക്കാര്യം പറഞ്ഞത്. ചില സംഭവങ്ങള്‍ രാഷ്ട്രീയ താത്പര്യത്തിനുവേണ്ടി ഊതിപ്പെരുപ്പിക്കുന്നു.

ബി.ജെ.പിയുടെയും എന്‍.ഡി.എയുടെയും രാജ്യത്തിന്റെയും താത്പര്യങ്ങള്‍ക്ക് വിരുദ്ധമാണ് ഇത്തരം സംഭവങ്ങള്‍. പ്രധാനമന്ത്രിയുടെ പ്രതിച്ഛായയെയും ഇവ ബാധിക്കും. ദാദ്രി സംഭവത്തില്‍ പ്രധാനമന്ത്രി പ്രതികരിക്കാത്തതിനെക്കുറിച്ച് വിമര്‍ശം ഉയര്‍ന്ന പശ്ചാത്തലത്തിലാണ് പരീക്കറുടെ പരാമര്‍ശം. താന്‍ ആര്‍.എസ്.എസ്സുകാരനാണെന്നും സംഘടനയ്ക്ക് ഇത്തരം സംഭവങ്ങളുമായി യാതൊരു ബന്ധവുമില്ലെന്നും പരീക്കര്‍ പറഞ്ഞു.
പാക്ക് അധീന കശ്മീരില്‍ പാക്കിസ്ഥാന്‍ സൈന്യം നടത്തുന്ന ക്രൂരതകളെക്കുറിച്ച് കശ്മീരികളെ ബോധവല്‍ക്കരിക്കണമെന്ന് പരീക്കര്‍ പറഞ്ഞു. ഇന്ത്യയിലേക്കു ഭീകരരെ കടത്തുന്നത് പാക്കിസ്ഥാന്‍ തുടരുകയാണെന്നും ഭീകരതയെ പിന്തുണയ്ക്കുന്ന നടപടി രാജ്യാന്തര സമൂഹത്തിനു മുന്നില്‍ തുറന്നു കാട്ടണമെന്നും പരീക്കര്‍ പറഞ്ഞു. ഇന്നലെ വൈകുന്നേരം ഗോവയിലെ പനജിയില്‍ ഒരു പരിപാടിയില്‍ പങ്കെടുക്കവെയാണ് പരീക്കര്‍ ഈ പ്രസ്താവനകള്‍ നടത്തിയത്.

പാക്ക് അധീന കശ്മീരില്‍ ജനങ്ങളെ എത്ര ക്രൂരമായാണ് പാക്ക് സൈനികര്‍ പീഡിപ്പിക്കുന്നതെന്ന് കശ്മീരികളെ നമ്മള്‍ ബോധ്യപ്പെടുത്തണം. ഇന്ത്യയുടെ ഭാഗമായ അവരുടെ സഹോദരങ്ങളെ എത്ര മോശമായാണ് പരിഗണിക്കുന്നതെന്ന് വ്യക്തമാക്കിക്കൊടുക്കണം. അതിര്‍ത്തിയില്‍ വെടിയ്പ്പു നടത്തുന്നതിലൂടെ ഭീകരരെ ഇന്ത്യയിലേക്ക് അയയ്ക്കുകയാണ് പാക്ക് സൈന്യം ചെയ്യുന്നത്. വെടിനിര്‍ത്തല്‍ കരാര്‍ അവര്‍ ലംഘിക്കുന്നത് ഭീകരരെ ഇന്ത്യയിലേക്കു കടത്തുന്നതിനൊരു മറയായിട്ടാണ്.
പെഷാവറില്‍ കുട്ടികളെ കൊല്ലുകയും കശാപ്പു ചെയ്യുകയുമാണ് ചെയ്യുന്നത്. മോസ്‌കുകളില്‍ പ്രാര്‍ഥനയ്ക്കു പോകുന്നവര്‍ കൊല്ലപ്പെടുകയാണ്. പാക്കിസ്ഥാനില്‍ എല്ലായിടത്തും കൊലപാതകമാണ് നടക്കുന്നത്. ഇതു വിഷവിത്താണ്. അവര്‍ തന്നെ നട്ടതാണിത്. ഇന്ത്യയോടുള്ള വെറുപ്പ് ഉയര്‍ത്തുന്ന പ്രചാരണം കൊണ്ട് ഒരു പരിഹാരവും ഉണ്ടാകില്ലെന്നു അവര്‍ തിരിച്ചറിയണം, പരീക്കര്‍ കൂട്ടിച്ചേര്‍ത്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha