കേന്ദ്രസര്ക്കാര് ജീവനക്കാരുടെ സ്വത്തുസമ്പാദ്യ വിവരങ്ങള് സമര്പ്പിക്കാനുള്ള സമയപരിധി ആറുമാസത്തേക്ക് നീട്ടി
കേന്ദ്രസര്ക്കാര് ജീവനക്കാര് തങ്ങളുടെയും ആശ്രിതരുടെയും സ്വത്ത് സമ്പാദ്യവിവരങ്ങള്
ലോക്പാല് നിയമപ്രകാരം സമര്പ്പിക്കണമെന്ന നിര്ദേശം പാലിക്കാനുള്ള സമയപരിധി ആറുമാസത്തേക്കുകൂടി നീട്ടി.
നാലാം പ്രാവശ്യമാണ് വിവരങ്ങള് നല്കാന് സമയം നീട്ടുന്നത്. കഴിഞ്ഞദിവസം പുറപ്പെടുവിച്ച ഉത്തരവനുസരിച്ച് വിവരങ്ങള് രേഖാമൂലം നല്കാന് 2016 ഏപ്രില് 15 വരെ സാവകാശമുണ്ട്. നേരത്തേ, ഒക്ടോബര് 15 ആയിരുന്നു അവസാനതീയതി.
കേന്ദ്രജീവനക്കാര് തങ്ങളുടെയും ജീവിതപങ്കാളി, ആശ്രിതരായ മക്കള് എന്നിവരുടെയും ബാങ്ക് അക്കൗണ്ട് വിവരങ്ങള്, കൈയിലുള്ള പണം, നിക്ഷേപങ്ങള്, ഓഹരികള്, സ്വത്ത് സമ്പാദ്യങ്ങള്, ഇന്ഷുറന്സ് പോളിസികള്, കൈയിലുള്ള സ്വര്ണം, ആഭരണങ്ങള് ഉള്പ്പെടെ എല്ലാ വിവരങ്ങളും സര്ക്കാറിന് നല്കണമെന്നാണ് 2013ലെ ലോക്പാല് നിയമത്തിലെ 44ാം വകുപ്പുപ്രകാരം പുറപ്പെടുവിച്ച ഉത്തരവില് ആവശ്യപ്പെട്ടിരുന്നത്. സര്വീസ് ചട്ടങ്ങളനുസരിച്ച് സമര്പ്പിക്കേണ്ട സ്വത്തുവിവരങ്ങള്ക്ക് പുറമേയാണിത്. ഓരോ വര്ഷവും മാര്ച്ച് 31ന് മുമ്പ് വിവരങ്ങള് കൈമാറണമെന്നാണ് വ്യവസ്ഥ.
2014ലെ വിവരങ്ങള് സമര്പ്പിക്കാന് കഴിഞ്ഞകൊല്ലം സപ്തംബര് 15 വരെ സമയം നല്കിയിരുന്നു. അത് മൂന്നുതവണ നീട്ടി. ഇനി 2014 ആഗസ്റ്റ് ഒന്നുവരെയും 2015 മാര്ച്ച് 31 വരെയും ഉള്ള സ്വത്തുക്കളുടെ വിവരങ്ങള് നല്കേണ്ടതുണ്ട്.
ഏതെങ്കിലുമൊരു നിയമം നടപ്പാക്കുമ്പോള് നേരിടുന്ന പ്രായോഗിക ബുദ്ധിമുട്ടുകള് മറികടക്കുന്നതിന് ചില ഭേദഗതികള് വരുത്താന് ആ നിയമത്തില്തന്നെ ഒരു വകുപ്പുണ്ടാകും. അതനുസരിച്ചാണ് സമയപരിധി വീണ്ടും നീട്ടിയത്.
സമ്പാദ്യത്തിന്റെയും ആഭരണങ്ങളുടെയും മറ്റും വിശദാംശങ്ങള് പൊതുധാരണയില് കൊണ്ടുവരുന്നത് തങ്ങളുടെയും ഉറ്റവരുടെയും ജീവനും സ്വത്തിനും ഭീഷണി ആവുമെന്നാണ് ഉദ്യോഗസ്ഥരുടെ ആശങ്ക. സര്വീസ് ചട്ടപ്രകാരം നല്കുന്ന വിവരങ്ങള് സര്ക്കാറിന്റെ കൈയിലുണ്ടെന്നിരിക്കേ, വീണ്ടും വിവരങ്ങള് നല്കുന്നത് അനാവശ്യമാണെന്നാണ് വാദം. വിവരം സമര്പ്പിക്കാന് ആദ്യം നിര്ദേശമുണ്ടായപ്പോള് വളരെക്കുറച്ചുപേരെ അങ്ങനെ ചെയ്തുള്ളൂ. ഓരോ ആറുമാസവും സമയപരിധി നീട്ടിയതിനാല് ഭൂരിഭാഗവും വിവരങ്ങള് നല്കിയില്ല. ഉത്തരവ് പൂര്ണമായി പിന്വലിച്ചേക്കുമെന്ന് അതിനിടയില് അഭ്യൂഹമുണ്ടായിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
