പരിസ്ഥിതി നിയമങ്ങള്‍ ലംഘിക്കുന്നവര്‍ക്കു കോടിക്കണക്കിനു രൂപ പിഴശിക്ഷ ഈടാക്കാന്‍ കേന്ദ്ര സര്‍ക്കാരിന്റെ ശിപാര്‍ശ. അഞ്ചു കോടി മുതല്‍ 20 കോടി രൂപ വരെ പിഴ ഈടാക്കാനാണു നിര്‍ദേശം. പരിസ്ഥിതി നിയമങ്ങള്‍ പരിഷ്‌കരിക്കാനുള്ള ഭേദഗതി ബില്ലിന്റെ കരട് രേഖയിലാണു കേന്ദ്ര വനം-പരിസ്ഥിതി മന്ത്രാലയം പുതിയ വ്യവസ്ഥകള്‍ നിര്‍ദേശിക്കുന്നത്.
പരിസ്ഥിതിക്കു ദോഷമുണ്ടാക്കുന്ന പദ്ധതിയില്‍ നിന്ന് അഞ്ചു കിലോമീറ്റര്‍ അപ്പുറം മുതലുള്ള മേഖലകളിലെ പരിസ്ഥിതി നാശത്തിനാണു കോടികളുടെ പിഴയെങ്കില്‍ ചെറിയ രീതിയില്‍ പരിസ്ഥിതി നാശമുണ്ടായെന്നു ബോധ്യമായാല്‍ ആയിരം മുതല്‍ 10,000 രൂപ വരെ പിഴ ഈടാക്കാന്‍ ബന്ധപ്പെട്ട അധികാരികളെ ചുമതലപ്പെടുത്തുന്ന നിര്‍ദേശവും ബില്ലില്‍ ഉള്‍പ്പെടുത്തിയിട്ടുണ്ട്.
1986ലെ പരിസ്ഥിതി സംരക്ഷണ നിയമത്തിലും 2010ലെ ദേശീയ ഹരിത ട്രൈബ്യൂണല്‍ നിയമത്തിലും ഭേദഗതികള്‍ കൊണ്ടുവരുന്നതിനായി തയാറാക്കിയ കരട് ബില്‍ കേന്ദ്ര വനം, പരിസ്ഥിതി മന്ത്രാലയമാണ് പ്രസിദ്ധപ്പെടുത്തിയത്. പൊതുജനങ്ങളുടെ അഭിപ്രായങ്ങളും നിര്‍ദേശങ്ങളും ക്ഷണിച്ചുകൊണ്ട് മന്ത്രാലയത്തിന്റെ വെബ്‌സൈറ്റിലാണ് ഇതു പ്രസിദ്ധപ്പെടുത്തിയിരിക്കുന്നത്.
കരട് നിയമം സംബന്ധിച്ച് എതിര്‍പ്പുകളും നിര്‍ദേശങ്ങളും പരാതികളുമുണെ്ടങ്കില്‍ 15 ദിവസത്തിനുള്ളില്‍ കേന്ദ്ര വനം, പരിസ്ഥിതി സെക്രട്ടറിയെ കത്ത് മുഖേനെയോ ഇ-മെയില്‍ മുഖേനെയോ അറിയിക്കാനാണു നിര്‍ദേശം. 1986ലെ പരിസ്ഥിതി സംരക്ഷണ നിയമത്തില്‍ നിര്‍ദേശിക്കുന്ന തടവു ശിക്ഷകള്‍ അതേപടി നിലനിര്‍ത്തിയിട്ടുണ്ട്.
സ്ഥാപന ത്തിന്റെ അഞ്ചു കിലോമീറ്റര്‍ പ്രദേശത്തുള്ള പരിസ്ഥിതി നാശത്തിനു 15-ാം വകുപ്പ് പ്രകാരം അഞ്ചു കോടിയാണു കുറഞ്ഞ പിഴ. അതു കുറ്റത്തിന്റെ കാഠിന്യത്തിന് അനുസരിച്ച് 10 കോടി വരെയാകും. നാശം തുടരുകയാണെങ്കില്‍ അധിക പിഴയായി ഓരോ ദിവസ വും 50 ലക്ഷം രൂപ വീതവും ഈടാക്കണം. അഞ്ച് കിലോമീറ്ററിനു മുകളില്‍ പത്ത് കിലോമീറ്റര്‍ വരെ കുറഞ്ഞതു പത്ത് കോടിയും കൂടിയത് 15 കോടി രൂപയുമാണ്.
പരിസ്ഥിതി നാശം തുടരുകയാണെങ്കില്‍ ദിനംപ്രതി എഴുപത്തഞ്ചു ലക്ഷംരൂപ വീതം അധികം നല്‍കണം. പത്ത് മുതല്‍ 15 കിലോമീറ്റര്‍ വരെ 15 മുതല്‍ 20 കോടി രൂപ വരെയാണ് പിഴ. അധിക പിഴ ഓരോ ദിവസവും ഒരു കോടി വീതവും.

ചെറിയ തോതിലുള്ള പരി സ്ഥിതി നാശത്തിനും ആയിരം മുതല്‍ പതിനായിരം രൂപ വരെ പിഴയുണ്ട്. നാശം തുടരുകയാണെങ്കില്‍ ഓരോ ദിവസവും 5000 രൂപ വീതം നല്‍കുകയും വേണം. പദ്ധതികള്‍ക്കും നിര്‍മാണ പ്രവര്‍ത്തനങ്ങള്‍ക്കും പാരിസ്ഥിതിക അനുമതിയും അംഗീകാരവും തേടിയിട്ടില്ലെങ്കിലും പിഴ ഈടാക്കാന്‍ വ്യവസ്ഥയുണ്ട്. ഒരു ലക്ഷം മുതല്‍ അഞ്ച് കോടി വരെയാണ് ഇതിനുള്ള പിഴ. അധിക പിഴ ദിനംപ്രതി ഓരോ ലക്ഷം വീതവും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha