ദീപാവലിക്ക് പടക്കം പൊട്ടിക്കുന്നത് നിയന്ത്രിക്കാനാവില്ലെന്ന് സുപ്രീം കോടതി
ദീപാവലി ദിവസം രാത്രി 10 മണി മുതല് രാവിലെ ആറുമണിവരെ പടക്കം പൊട്ടിക്കരുതെന്ന നിര്ദേശം സുപ്രീം കോടതി ആവര്ത്തിച്ചു. അതേസമയം, പടക്കം പൊട്ടിക്കുന്നതു മറ്റൊരു തരത്തിലും നിയന്ത്രിക്കാനാകില്ലെന്നും സുപ്രീം കോടതി ചൂണ്ടിക്കാട്ടി. പടക്കം പൊട്ടിക്കുന്നതു നിരോധിക്കണമെന്നാവശ്യപ്പെട്ട് സമര്പ്പിച്ച പൊതുതാല്പ്പര്യ ഹര്ജി ചീഫ് ജസ്റ്റിസ് എച്ച്.എല്. ദത്തു അധ്യക്ഷനായ ബെഞ്ച് തള്ളി. ഒരിക്കലും നടപ്പില് വരുത്താന് സാധ്യതയില്ലാത്ത കാര്യങ്ങള് നടപ്പാക്കാന് ഉത്തരവിട്ട് സമയംകളയാനില്ലെന്നും കോടതി വ്യക്തമാക്കി.
ദീപാവലി പോലുള്ള ആഘോഷങ്ങള് പരിസ്ഥിതി മലിനീകരണത്തിന് കാരണമാകുന്നുവെന്ന് പറയാനാകില്ലെന്നു സുപ്രീം കോടതിയെ അറിയിച്ച കേന്ദ്ര സര്ക്കാര്, ദീപാവലിക്കു പടക്ക നിരോധനം ഏര്പ്പെടുത്തുന്നതിനെ അനുകൂലിക്കാനാകില്ലെന്നും വ്യക്തമാക്കി. പടക്ക നിര്മാതാക്കളുടെ സംഘടനകളും കേസില് കക്ഷിചേര്ന്നിരുന്നു. ദീപാവലിയുള്പ്പെടെയുള്ള ആഘോഷങ്ങള്ക്കു പടക്കം പൊട്ടിക്കുകയും മറ്റു വര്ണവസ്തുക്കള് കത്തിക്കുകയും ചെയ്യുന്നത് വലിയ തോതില് പരിസ്ഥിതി മലിനീകരണത്തിനും ദുരന്തങ്ങള്ക്കും കാരണമാവുന്നുവെന്നു ചൂണ്ടിക്കാട്ടി അര്ജുന് ഗോപാല്, ആരെ ബാന്ദാരി, സോയ റാവു ഭാസിന് എന്നിവരാണു ഹര്ജി നല്കിയത്. എല്ലാ ആഘോഷങ്ങളിലും പടക്കം പോലുള്ള വസ്തുക്കള് ഉപയോഗിക്കുന്നതു നിരോധിക്കണമെന്നും ഹര്ജിക്കാര് ആവശ്യപ്പെട്ടു.
ദീപാവലി ദിവസം രണ്ടുമണിക്കൂറെങ്കിലും പടക്കങ്ങള്ക്കു നിയന്ത്രണം ഏര്പ്പെടുത്തിക്കൂടേയെന്നു ഹര്ജിക്കാര്ക്കു വേണ്ടി ഹാജരായ മുതിര്ന്ന അഭിഭാഷകന് അഭിഷേക് മനു സിങ്വി അഭ്യര്ഥിച്ചു. എന്നാല്, ഇതും കോടതി പരിഗണിച്ചില്ല. എല്ലാ വിഭാഗം ആളുകളുടെയും അഭിപ്രായരൂപീകരണത്തിനു മുമ്പ് പടക്ക നിരോധനം ഏര്പ്പെടുത്താനാവില്ലെന്നു കോടതി പറഞ്ഞു.
പടക്കംമൂലമുള്ള അപകടങ്ങളെക്കുറിച്ചു പൊതുജനങ്ങളെ ബോധവാന്മാരാക്കണമെന്ന ഈ മാസം 16ലെ ഉത്തരവ് കേന്ദ്ര സര്ക്കാര് നടപ്പാക്കിയില്ലെന്നു സോളിസിറ്റര് ജനറലിനെ കോടതി ഓര്മിപ്പിച്ചു. ഈ മാസം 31 മുതല് അടുത്തമാസം 12 വരെ ഇതുസംബന്ധിച്ച് ബോധവല്ക്കരണം നടത്തണമെന്നു കോടതി നിര്ദേശം നല്കി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
